ສສຊ ຮັບຮອງເອົາສອງຕຳແໜ່ງລັດ ແລະ ຊົນເຜົ່າບຣູ

190 06 ທ.ວ. 2018 ຂ່າວໜ້າ​ໜຶ່ງ

    ການ​ດຳ­ເນີນ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 5 ທັນ­ວາ 2018 ໂດຍ​ເປັນ​ປະ­ທານ​ຂອງ​ທ່ານ ພົນ​ໂທ ແສງ​ນວນ ໄຊ​ຍະ​ລາດ ຮອງ​ປະ­ທານ​ສະ­ພາ​ແຫ່ງ​ຊາດ ບັນ­ດາ​ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ໄດ້​ພິ­ຈາ­ລະ­ນາ​ຮັບ­ຮອງ​ເອົາ​ສອງ​ຕຳ­ແໜ່ງ​ທີ່​ສຳ­ຄັນ ຄື: ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ແລະ ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ຕາມ​ໜັງ­ສື​ສະ­ເໜີ​ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ.

    ສຳ­ລັບ​ພາກ​ເຊົ້າ ສສຊ ໄດ້​ພິ­ຈາ­ລະ­ນາ ແລະ ເຫັນ​ດີ​ລົງ​ຄະ­ແນນ​ສຽງ​ເປັນ​ສ່ວນ​ຫຼາຍ ຮັບ­ຮອງ​ເອົາ​ການ​ແຕ່ງ­ຕັ້ງ​ທ່ານ ພົນ​ໂທ ວິ­ໄລ ຫຼ້າ​ຄຳ​ຟອງ ຮອງ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ເປັນ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ຄວາມ​ສະ­ຫງົບ​ຄົນ​ໃໝ່​ແທນ​ທ່ານ ພົນ​ຕີ ສົມ​ແກ້ວ ສີ​ລາ​ວົງ ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ຄວາມ​ສະ­ຫງົບ​ຜູ້​ເກົ່າ ທີ່​ຈະ​ໄປ​ຮັບ​ໜ້າ­ທີ່​ໃໝ່​ຢູ່​ກະ­ຊວງ​ປ້ອງ​ກັນ​ປະ­ເທດ ດ້ວຍ​ຄະ­ແນນ 114 ສຽງ ເທົ່າ​ກັບ 90% ແລະ ເຫັນ​ດີ​ຮັບ­ຮອງ​ເອົາ​ທ່ານ ສອນ​ໄຊ ສິດ​ພະ​ໄຊ ຮັກ­ສາ​ການ​ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ເປັນ​ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ຜູ້​ໃໝ່ ດ້ວຍ​ຄະ­ແນນ​ສຽງ 108 ສຽງ ເທົ່າ​ກັບ 87%.

ຂ່າວທີ່ກ່ຽວຂ້ອງ