ຊອກຫາວິທີແກ້ໄຂສ້າງຄວາມເຂັ້ມແຂງ ດ້ານເສດຖະກິດຢູ່ລາວ

165 06 ທ.ວ. 2018 ຂ່າວໜ້າ​ໜຶ່ງ
ຊອກຫາວິທີແກ້ໄຂສ້າງຄວາມເຂັ້ມແຂງ ດ້ານເສດຖະກິດຢູ່ລາວ

    ກອງ​ປະ­ຊຸມ​ໂຕະ­ມົນ​ປະ­ຈຳ​ປີ 2018 ດຳ­ເນີນ​ມາ​ເປັນ​ເວ­ລາ 2 ວັນ ໄດ້​ສຳ­ເລັດ​ລົງ​ໃນ​ວັນ​ທີ 5 ທັນ­ວາ 2018 ຈັດ​ຂຶ້ນ​ທີ່​ຫໍ​ປະ­ຊຸມ​ແຫ່ງ​ຊາດ ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຮ່ວມ​ຂອງ​ທ່ານ ສຸ­ພັນ ແກ້ວ​ມີ​ໄຊ ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ແລະ ທ່ານ​ນາງ ຄາ​ຣິ​ນາ ອິມ​ໂມ​ເນັນ ຜູ້​ປະ­ສານ​ງານ​ອົງ­ການ​ສະ­ຫະ​ປະ­ຊາ​ຊາດ ທັງ​ເປັນ​ຜູ້­ຕາງ­ໜ້າ​ອົງ­ການ​ສະ­ຫະ​ປະ­ຊາ​ຊາດ ເພື່ອ​ການ​ພັດ­ທະ­ນາ ປະ­ຈຳ​ລາວ ເປັນ​ກຽດ​ເຂົ້າ​ຮ່ວມ​ຂອງ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ທ່ານ​ນາງ ວາ​ເລີ​ຣິ ຄລິ​ຟ ຮອງ​ຜູ້­ອຳ­ນວຍ­ການ​ຮັບ­ຜິດ­ຊອບ​ພາກ​ພື້ນ​ອາ­ຊີ-ປາ​ຊີ​ຟິກ ອົງ­ການ​ສະ­ຫະ​ປະ­ຊາ​ຊາດ​ເພື່ອ​ການ​ພັດ­ທະ­ນາ ທັງ​ເປັນ​ຫົວ­ໜ້າ​ຫ້ອງ­ການ​ປະ­ຈຳ​ພາກ​ພື້ນ ປະ­ຈຳ​ບາງ­ກອກ ຜູ້­ຕາງ­ໜ້າ​ຈາກ​ສະ­ພາ​ແຫ່ງ​ຊາດ ກະ­ຊວງ ຂະ­ແໜງ­ການ ແລະ ທ້ອງ­ຖິ່ນ ພ້ອມ​ທັງ​ຄູ່​ພັດ­ທະ­ນາ ອົງ​ການ­ຈັດ­ຕັ້ງ​ທີ່​ບໍ່​ສັງ­ກັດ​ລັດ­ຖະ­ບານ ອົງ­ການ​ທີ່​ບໍ່​ຫວັງ​ຜົນ​ກຳ­ໄລ ແລະ ພາກ​ເອ­ກະ​ຊົນ.

    ກອງ​ປະ­ຊຸມ​ໂຕະ­ມົນ​ປະ­ຈຳ​ປີ 2018 ໄດ້​ປຶກ­ສາ​ຫາ­ລື​ກ່ຽວ​ກັບ​ປະ­ເດັນ​ຕ່າງໆ​ຕິດ​ພັນ​ກັບ​ຫົວ­ຂໍ້​ຂອງ​ກອງ​ປະ­ຊຸມ​ເຊັ່ນ: ຜົນ​ຂອງ​ການ​ສະ­ຫຼຸບ​ກາງ​ສະ­ໄໝ ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ VIII ຜົນ​ຂອງ​ການ­ຈັດ­ຕັ້ງ​ຜັນ​ຂະ­ຫຍາຍ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ (SDGs) ຜົນ​ຂອງ​ການ​ປະ​ເມີນ​ເງື່ອນ­ໄຂ​ການ​ຫຼຸດ​ພົ້ນ​ອອກ​ຈາກ​ສະ­ຖາ­ນະ​ພາບ​ປະ­ເທດ​ດ້ອຍ​ພັດ­ທະ­ນາ ແລະ ການ​ກຽມ​ຄວາມ​ພ້ອມ​ຮັບ​ມື​ກັບ​ໄພ­ພິ­ບັດ​ທາງ​ທຳ​ມະ​ຊາດ​ທີ່​ເກີດ​ຂຶ້ນ​ຢູ່​ລາວ.

    ທ່ານ ສົມ​ດີ ດວງ​ດີ ໄດ້​ກ່າວ​ວ່າ: ປີ 2018 ລາວ​ໄດ້​ຖືກ​ຜົນ​ກະ­ທົບ​ຈາກ​ໄພ­ພິ­ບັດ​ທາງ​ທຳ​ມະ​ຊາດ​ຢ່າງ​ຮ້າຍ​ແຮງ ສົ່ງ​ຜົນ​ກະ­ທົບ​ໂດຍ​ກົງ​ເຖິງ 16 ແຂວງ ນອກ​ນັ້ນ ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ໄດ້​ຖືກ​ກະ­ທົບ​ຈາກ​ເຂື່ອນ​ສຳ­ຮອງ ໂຄງ­ການ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ​ແຕກ ຕາມ​ບົດ​ປະ​ເມີນ​ຄວາມ​ຕ້ອງ­ການ​ຫຼັງ​ໄພ­ພິ­ບັດ ຜົນ​ເສຍ​ຫາຍ​ເບື້ອງ​ຕົ້ນ 3.166 ຕື້​ກີບ ເຊິ່ງ​ກອງ​ປະ­ຊຸມ​ຄັ້ງ​ນີ້​ໄດ້​ສຸມ​ໃສ່​ປຶກ­ສາ​ຫາ­ລື ແລະ ແລກ­ປ່ຽນ​ຄວາມ​ຄິດ​ຄວາມ​ເຫັນ​ນຳ​ກັນ​ຢ່າງ​ສ້າງ­ສັນ ກົງ​ໄປ​ກົງ​ມາ ເພື່ອ​ພ້ອມ​ກັນ​ຊອກ​ຫາ​ສາ­ເຫດ ແລະ ວິ­ທີ​ແກ້​ໄຂ​ຮ່ວມ​ກັນ ແນ­ໃສ່​ເຮັດ​ໃຫ້​ເສດ­ຖະ­ກິດ​ແຫ່ງ​ຊາດ​ມີ​ຄວາມ​ເຂັ້ມ­ແຂງ ແລະ ໝັ້ນ​ທ່ຽງ​ຍິ່ງ​ຂຶ້ນ ຊອກ​ຊ່ອງ​ທາງ​ຂຸດ​ຄົ້ນ​ທ່າ­ແຮງ​ທີ່​ບົ່ມ​ຊ້ອນ​ພາຍ​ໃນ ເພື່ອ​ເພີ່ມ​ແຫຼ່ງ​ລາຍ​ຮັບ ການ​ສ້າງ​ຂີດ​ຄວາມ​ຮູ້​ຄວາມ​ສາ­ມາດ​ທາງ​ດ້ານ​ວິ­ຊາ​ການ ໃນ​ການ​ຄຸ້ມ​ຄອງ​ທາງ​ດ້ານ​ເສດ­ຖະ­ກິດ ການ​ຜະ­ລິດ ແລະ ການ​ບໍ­ລິ­ການ​ໃຫ້​ທັນ​ສະ­ໄໝ ແລະ ແທດ­ເໝາະ ເພື່ອ​ຕອບ​ສະ­ໜອງ​ໄດ້​ຄວາມ​ຮຽກ­ຮ້ອງ​ຕ້ອງ­ການ​ຂອງ​ການ​ພັດ­ທະ­ນາ​ໃນ​ໄລ­ຍະ​ໃໝ່ ຕາມ​ທິດ​ພັດ­ທະ­ນາ​ສີ­ຂຽວ ແລະ ເຊື່ອມ​ໂຍງ​ດ້ານ​ເສດ­ຖະ­ກິດ​ເຂົ້າ​ກັບ​ພາກ​ພື້ນ ແລະ ສາ­ກົນ ສືບ­ຕໍ່​ຈັດ​ຕັ້ງ​ປະ­ຕິ­ບັດ​ວາ­ລະ​ຂອງ​ການ​ພັດ­ທະ­ນາ ກໍ່​ຄື ການ­ຈັດ­ຕັ້ງ​ປະ­ຕິ­ບັດ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ (SDGs) ແລະ ການ​ຫຼຸດ​ພົ້ນ​ອອກ​ຈາກ​ສະ­ຖາ­ນະ​ພາບ ການ​ເປັນ​ປະ­ເທດ​ດ້ອຍ​ພັດ­ທະ­ນາ​ຕາມ​ຄາດ­ໝາຍ​ທີ່​ກຳ­ນົດ​ໄວ້.

    ທ່ານ​ນາງ ວາ​ເລີ​ຣິ ຄລິ​ຟ ໄດ້​ກ່າວ​ເນັ້ນ​ໃຫ້​ເຫັນ​ເຖິງ​ຄວາມ​ສຳ­ຄັນ​ຂອງ​ການ​ຊ່ວຍ­ເຫຼືອ​ກຸ່ມ​ຄົນ​ດ້ອຍ​ໂອ­ກາດ ຕໍ່​ກັບ​ໄພ­ພິ­ບັດ​ທີ່​ເກີດ​ຂຶ້ນ​ນັ້ນ ໄດ້​ສົ່ງ​ຜົນ​ກະ­ທົບ​ກັບ​ປະ­ຊາ­ຊົນ​ຜູ້​ທຸກ​ຍາກ ແລະ ກຸ່ມ​ຄົນ​ດ້ອຍ​ໂອ­ກາດ ເພື່ອ​ໃຫ້​ສາ­ມາດ​ບັນ­ລຸ​ເປົ້າ​ໝາຍ​ຂອງ​ການ​ບໍ່​ປ່ອຍ​ຜູ້​ໃດ​ຢູ່​ເບື້ອງ​ຫຼັງ ແລະ ເຂົ້າ​ຫາ​ຜູ້​ທີ່­ຢູ່​ໄກ​ທີ່​ສຸດ​ກ່ອນ­ໝູ່​ນັ້ນ ຄວນ​ສ້າງ​ຄວາມ​ເຂັ້ມ­ແຂງ​ໃຫ້​ແກ່​ຂັ້ນ​ຕອນ​ການ​ປະ​ເມີນ ແລະ ຫຼຸດ­ຜ່ອນ​ຄວາມ​ສ່ຽງ​ໃນ​ຂັ້ນ​ແຂວງ ແລະ ຂັ້ນ​ເມືອງ ເຊິ່ງ​ມີ​ຄວາມ​ສ່ຽງ​ສູງ​ທີ່​ສຸດ.

    ສຳ­ລັບ​ປັດ​ໄຈ​ພາຍ​ໃນ ແລະ ພາຍ​ນອກ ລວມ​ທັງ​ໄພ­ພິ­ບັດ​ນ້ຳ​ຖ້ວມ​ຢ່າງ​ໜັກ­ໜ່ວງ ໃນ​ຂອບ​ເຂດ​ທົ່ວ​ປະ­ເທດ ເຫັນ​ວ່າ​ອັດ­ຕາ​ການ​ເພີ່ມ​ຂຶ້ນ​ຂອງ GDP ໝົດ​ປີ ຈະ​ເຕີບ​ໂຕ​ຢູ່​ໃນ​ລະ­ດັບ​ພຽງ​ແຕ່ 6,5% ເຖິງ​ວ່າ​ມີ​ຜົນ​ກະ­ທົບ​ໃນ​ຫຼາຍ​ດ້ານ ແຕ່​ຍັງ​ສາ­ມາດ​ຮັກ­ສາ​ການ​ເຕີບ​ໂຕ​ທາງ​ດ້ານ​ເສດ­ຖະ­ກິດ​ຢູ່​ໃນ​ລະ­ດັບ​ດັ່ງ­ກ່າວ ເປັນ​ລະ­ດັບ​ສູງ​ສົມ­ຄວນ ທຽບ­ໃສ່​ບັນ­ດາ​ປະ­ເທດ​ພາກ​ພື້ນ ແລະ ໃນ​ໂລກ ອັນ​ພົ້ນ​ເດັ່ນ​ແມ່ນ​ປະ­ເທດ​ມີ​ຄວາມ​ສະ­ຫງົບ​ດ້ານ​ການ­ເມືອງ ປະ­ຊາ­ຊົນ​ມີ​ຄວາມ​ສາ­ມັກ­ຄີ​ປອງ​ດອງ​ແໜ້ນ​ແກ່ນ ການ​ດຳ­ລົງ​ຊີ­ວິດ​ຂອງ​ປະ­ຊາ­ຊົນ​ບັນ­ດາ­ເຜົ່າ ໄດ້​ຮັບ​ການ​ຍົກ​ລະ­ດັບ​ດີ​ຂຶ້ນ ສ່ວນ​ໝາກ­ຜົນ​ຂອງ​ບົດ​ລາຍ​ງານ​ແຫ່ງ​ຊາດ ແບບ​ສະ­ໝັກ​ໃຈ ກ່ຽວ​ກັບ​ການ​ພັດ­ທະ­ນາ​ແບບ​ຍືນ​ຍົງ​ຂອງ​ລາວ ເຊິ່ງ​ຈຸດ​ສຳ­ຄັນ​ແມ່ນ​ຕ້ອງ​ແກ້​ໄຂ​ຄວາມ​ບໍ່​ເທົ່າ​ທຽມ​ກັນ​ຢ່າງ​ຕໍ່​ເນື່ອງ ພ້ອມ​ດຽວ​ກັບ​ຜົນ​ໄດ້​ຮັບ​ໃນ​ຫຼາຍ​ດ້ານ​ຂອງ​ການ­ຈັດ­ຕັ້ງ​ປະ­ຕິ­ບັດ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ​ຄັ້ງ​ທີ VIII ສປປ ລາວ ຍັງ​ມີ​ກຸ່ມ​ຜູ້​ດ້ອຍ​ໂອ­ກາດ​ໃນ​ຫຼາຍ​ຂົງ­ເຂດ ເຊິ່ງ​ຕ້ອງ​ໄດ້​ສ້າງ​ຄວາມ​ອາດ​ສາ­ມາດ​ໃນ​ການ​ປັບ​ໂຕ​ໃນ​ຂົງ­ເຂດ​ເສດ­ຖະ­ກິດ-ສັງ­ຄົມ ແລະ ສິ່ງ­ແວ­ດລ້ອມ ເພີ່ມ​ທະ­ວີ​ຄວາມ​ເປັນ​ເຈົ້າ​ການ​ແກ້​ໄຂ​ຄວາມ​ແຕກ​ໂຕນ ແລະ ຄວາມ​ບໍ່​ເທົ່າ​ທຽມ​ກັນ​ໃນ 2 ຂົງ­ເຂດ​ຫຼັກ​ທີ່​ຕິດ​ພັນ​ກັບ​ວາ­ລະ​ເພື່ອ​ການ​ພັດ­ທະ­ນາ 2030.

    ເພື່ອ​ເປັນ​ການ­ຈັດ­ຕັ້ງ​ປະ­ຕິ­ບັດ​ນະ­ໂຍ­ບາຍ​ພັດ­ທະ­ນາ​ສີ­ຂຽວ ກອງ​ປະ­ຊຸມ​ໂຕະ­ມົນ​ປະ­ຈຳ​ປີ 2018 ໄດ້​ຊຸກ­ຍູ້​ໃຫ້​ມີ​ການ​ຫຼຸດ­ຜ່ອນ​ການ​ນຳ​ໃຊ້​ປະ­ລາ­ສະ­ຕິກ ແລະ ເຈ້ຍ​ໃນ​ກອງ​ປະ­ຊຸມ​ຄັ້ງ​ນີ້.

ຂ່າວທີ່ກ່ຽວຂ້ອງ