ຝຣັ່ງ ໂຈະ​ການ​ຂຶ້ນ​ພາສີ​ເຊື້ອ​ໄຟ

254 06 ທ.ວ. 2018 ຂ່າວຕ່າງປະເທດ
ຝຣັ່ງ ໂຈະ​ການ​ຂຶ້ນ​ພາສີ​ເຊື້ອ​ໄຟ

    ນາຍົກລັດຖະມົນຕີ​ຝຣັ່ງ ເອດ​ວາດ ຟີ​ລິບ ແຈ້ງ​ໃຫ້​ຮູ້ເມື່ອ​ຄ່ຳ​ຄືນ​ຂອງ​ວັນ​ທີ 4 ທັນວາ​ນີ້ ວ່າ​ຈະ​ໂຈະ​ການ​ຂຶ້ນ​ພາສີ​ເຊື້ອ​ໄຟ ໃນ​ຮອບ​ເວລາ 6 ເດືອນ. ນີ້​ເປັນ​ໜຶ່ງ​ໃນ​ບັນດາ​ມາດ​ຕະການ ທີ່​ມີ​ເນື້ອ​ແທ້​ຍິນ​ຍອມ ຂອງ​ອຳນາດ​ການ​ປົກຄອງ​ຂອງ​ຝຣັ່ງ ພາຍ​ໃຕ້​ການ​ນຳພາ​ຂອງ​ປະທານາທິບໍດີ ເອມ​ມາ​ນູ​ແອນ ມາກ​ຣົງ ເພື່ອ​ຫຼຸດຜ່ອນ​ຄວາມ​ເຄັ່ງ​ຕຶງ ຍ້ອນ​ການ​ປະ​ທ້ວງ​ຂອງ​ກຸ່ມ​ທີ່​ເອີ້ນ​ວ່າ “ເສື້ອ​ເຫຼືອງ” ທີ່​ໄດ້ແກ່​ຍາວ​ມາ​ເປັນ​ເວລາ​ຫຼາຍ​ອາທິດ​ທີ່​ຜ່ານ​ມາ.

    ນາຍົກລັດຖະມົນຕີ ຟີ​ລິບ ກ່າວ​ຜ່ານ​ທາງ​ໂທລະພາບ​ວ່າ ເປັນ​ໄປ​ບໍ່​ໄດ້​ທີ່​ຈະ​ໃຫ້ການ​ຂຶ້ນ​ພາສີ ເຊື້ອ​ໄຟ ມາ​ຍູ້​ໃຫ້​ຄວາມ​ສາມັກຄີ​ພາຍ​ໃນ​ຊາດ ໃຫ້​ຕົກ​ຢູ່​ໃນ​ທ່າ​ອັນຕະລາຍ.

    ການ​ຍິນ​ຍອມ​ອື່ນໆ​ອີກ​ຂອງ​ລັດຖະບານ​ຝຣັ່ງ ຍັງ​ລວມ​ເຖິງ​ການ​ໂຈະ​ຂຶ້ນ​ລາຄາ​ແກ​​ັສ ແລະ ​ໄຟຟ້າ ທີ່​ຄາດ​ວ່າ​ຈະ​ມີ​ຜົນ​ບັງຄັບ​ໃຊ້​ນັບ​ແຕ່​ເດືອນ​ມັງກອນ ປີ 2019 ເປັນຕົ້ນ​ໄປ​ນັ້ນ ໃນ​ຮອບ​ເວລາ 3 ເດືອນ​ຂອງ​ລະດູ​ໜາວ. ນອກຈາກ​ນັ້ນແລ້ວ ແຜນການ​ຮັດ​ເຄັ່ງ​ຕໍ່​ການ​ຕີ​ລາຄາ ທາງ​ດ້ານ​ເຕັກນິກ​ຕໍ່​ລົດ​ໂອ​ໂຕ ເປັນ​ການ​ແນໃສ່​ລົດ​ລຸ້ນ​ເກົ່າ ທີ່​ພາໃຫ້​ເກີດ​ມົນ​ລະ​ພິດ​ຕໍ່​ສິ່ງແວດລ້ອມ ກໍ​ຖືກ​ໂຈະ​ໃນ​ຮອບ​ເວລາ 6 ເດືອນ.

    ນາຍົກລັດຖະມົນຕີ ຟີ​ລິບ ເວົ້າ​ວ່າ ໃນ​ໄລຍະ​ເວລາ 6 ເດືອນ ລັດຖະບານ​ຝຣັ່ງ ຈະ​ປຶກສາ​ຫາລື​ເຖິງ​ມາດ​ຕະການ  ເພື່ອ​ຊ່ວຍເຫຼືອ​ກຸ່ມ​ແຮງ​ງານ​ທີ່​ທຸກ​ຍາກ ຊຶ່ງ​ຂຶ້ນ​ກັບ​ພາຫະນະ ການ​ຄົມມະນາຄົມ.

 

ຂ່າວທີ່ກ່ຽວຂ້ອງ