ບໍ່ຄວນຖືເບົາສຸຂະພາບ

218 05 ທ.ວ. 2018 ນານາສາລະ

    ມີ​ໂອ­ກາດ​ຂຶ້ນ​ເໜືອ-ລົງ​ໃຕ້​ພົບ​ປະ​ກັບ​ຜູ້​ຄົນ​ຫຼາຍ​ຊັ້ນ​ຄົນ ແລະ ຫຼາຍ​ອາ­ຊີບ ຕ່າງ​ກໍ່​ເປັນ​ເອ­ກະ​ພາບ​ກັນ​ວ່າ: ບາງ­ເທື່ອ​ເຮົາ​ຖື​ເບົາ​ເລື່ອງ​ສຸ­ຂະ­ພາບ ຫາ​ເງິນ ຫາ​ທີ່​ຕັ້ງ​ໃນ​ສັງ­ຄົມ​ຈົນ​ລືມ​ສຸ­ຂະ­ພາບ​ຕົນ​ເອງ ບາດ​ມີ​ເງິນ​ແລ້ວ​ຈຶ່ງ​ເລັ່ງ​ໃສ່​ສຸ­ຂະ­ພາບ ແຕ່​ກໍ່​ຊ້າ​ໄປ​ແລ້ວ ! ມັນ​ໂລດ​ຖືກ​ຄື​ເຖົ້າ​ແກ່​ບູ­ຮານ​ເພິ່ນ​ກ່າວ​ໄວ້​ວ່າ: “ຍາມ​ກິນ​ໄດ້​ບໍ່​ມີ​ເງິນ​ຊື້​ກິນ ຍາມ​ມີ​ເງິນ​ຊື້​ກິນ​ແຕ່​ກິນ​ບໍ່​ໄດ້”.

    ທັງ​ໝົດ​ນັ້ນ​ແມ່ນ​ຂາດ​ການ​ວາງ​ແຜນ​ຊີ­ວິດ ຜ່ານ​ການ​ອ່ານ​ຂໍ້​ມູນ​ຈາກ​ຕ່າງ­ປະ­ເທດ ກໍ່​ຄື ປະ­ສົບ​ການ​ຕົວ​ຈິງ​ທີ່​ພົບ­ພໍ້ ສະ­ແດງ​ໃຫ້​ເຫັນ​ວ່າ: ຄົນ​ເຮົາ​ຖື​ເບົາ​ເລື່ອງ​ຮັກ­ສາ​ສຸ­ຂະ­ພາບ​ເຊັ່ນ​ວ່າ: ຊື້​ຢາ​ລາ­ຄາ 1 ແສນ ຫາ 2 ແສນ​ກີບ ຈົ່ມ​ວ່າ​ແພງ ກົງ­ກັນ­ຂ້າມ​ເວ­ລາ​ຊຸມ​ແຊວ​ຈ່າຍ​ຄ່າ​ນ້ຳ​ເມົາ​ຫຼາຍ​ກວ່າ​ນັ້ນ ພັດ​ວ່າ​ກຳ­ໄລ​ຊີ­ວິດ ແປກ​ປະ­ຫຼາດ​ບໍ ?.

    ກັບ​ມາ​ເວົ້າ​ເລື່ອງ​ສຸ­ຂະ­ພາບ ທ້າຍ​ປີ​ຄວນ​ກວດ­ກາ​ຄືນ​ຢ່າງ​ເປັນ​ລະ­ບົບ ຫາກ​ມີ​ເງື່ອນ­ໄຂ​ທາງ​ເສດ­ຖະ­ກິດ ຄັນ​ແມ່ນ​ວ່າ​ເງື່ອນ­ໄຂ​ບໍ່​ຄົບ​ກໍ່​ຄວນ​ກວດ​ເລືອດ​ຊອກ​ຫາ​ຄວາມ­ດັນ ນ້ຳ­ຕານ​ໃນ​ເລືອດ ໄຂ­ມັນ ການ​ທຳ​ງານ​ຂອງ​ຕັບ​ເຫຼົ່າ​ນີ້​ເປັນ­ຕົ້ນ ເມື່ອ​ຊອກ​ເຫັນ​ແລ້ວ​ກໍ່​ປິ່ນ­ປົວ​ແຕ່​ຫົວ­ທີ ມັນ​ກໍ່​ສາ­ມາດ​ຂາດ​ຫາຍ ຫຼື ວ່າ​ຫຼຸດ­ຜ່ອນ​ລົງ​ໄດ້​ນໍ ? ໃນ​ສຸ­ຂະ­ພາບ ຍັງ​ມີ​ສຸ­ຂະ­ພາບ​ຈິດ ໂຕ​ນີ້​ອັນ­ຕະ­ລາຍ ເພາະ​ມັນ​ກະ­ທົບ​ຈິດ­ໃຈ​ແລ້ວ​ສຸ­ຂະ­ພາບ​ກໍ່​ຊຸດ­ໂຊມ​ທັນ­ທີ ເພາະ​ກິນ​ບໍ່​ໄດ້ ນອນ​ບໍ່​ຫຼັບ ໂດຍ​ສະ­ເພາະ ຜູ້​ທີ່​ວາງ​ບໍ່​ລົງ.

    ມີ​ຄຳ​ກ່າວ​ກ່ຽວ​ກັບ​ວຽກ​ງານ ໜ້າ­ທີ່​ຕຳ­ແໜ່ງ​ໄວ້​ວ່າ: ຕຳ­ແໜ່ງ ລວມ​ທັງ​ລາບ​ຍົດ​ສັນ­ລະ­ເສີນ ມັນ​ເປັນ​ສິ່ງ​ບໍ່​ໝັ້ນ­ຄົງ ແນ່­ນອນ ແລະ ບໍ່​ແມ່ນ​ຂອງ​ເຮົາ​ຕະ­ຫຼອດ​ໄປ ມັນ​ຄື​ຫົວ​ໂຂນ​ທີ່​ສວມ​ໃສ່​ຫົວ​ຄົນ​ເຮົາ ມີ​ແຕ່​ຄຸນ­ງາມ­ຄວາມ­ດີ ຄວາມ​ຮູ້ ຄວາມ​ສາ­ມາດ​ຂອງ​ເຮົາ​ເທົ່າ​ນັ້ນ ທີ່​ຈະ​ຕິດ​ຕົວ​ເຮົາ​ໄປ​ທຸກ​ຫົນ​ທຸກ​ແຫ່ງ ແລະ ເປັນ​ທີ່​ກ່າວ​ຂານ​ຂອງ​ຜູ້​ຄົນ​ໃນ​ສັງ­ຄົມ​ຕະ­ຫຼອດ​ກາ­ລະ​ນານ.

    ກັບ​ມາ­ສູ່​ການ​ວາງ​ແຜນ​ຊີ­ວິດ ຕ້ອງ​ຍອມ­ຮັບ​ວ່າ​ຄົນ​ເອີ​ຣົບ ຫຼື ປະ­ເທດ​ພັດ­ທະ­ນາ​ແລ້ວ​ເຂົາ​ວາງ​ແຜນ​ຊີ­ວິດ​ໄດ້​ດີ ເລີ່ມ​ແຕ່​ຈົບ​ມະ­ຫາ­ວິ­ທະ­ຍາ­ໄລ​ຈະ​ເຮັດ​ວຽກ​ຫຍັງ ເລາະ​ທ່ຽວ​ກ່ອນ​ບໍ ? ເພື່ອ​ເອົາ​ປະ­ສົບ​ການ ຫຼັງ​ຈາກ​ນັ້ນ​ຈຶ່ງ​ຄ່ອຍ​ມາ​ເຮັດ​ວຽກ ເຮັດ​ວຽກ​ນຳ​ສະ​ສົມ​ເງິນ​ນຳ​ເພື່ອ​ໄປ​ທ່ອງ​ທ່ຽວ ທັງ​ແຮ​ໄວ້​ສຳ­ລັບ​ການ​ປິ່ນ­ປົວ ຫຼື ວ່າ​ເຂົາ​ຊື້​ປະ­ກັນ​ໄພ​ຊີ­ວິດ​ໄວ້​ກ່ອນ​ແຕ່ງ­ງານ ຫຼື ຈະ​ໃຊ້​ຊີ­ວິດ​ຄູ່​ເຂົາ​ແຮ່ງ​ວາງ​ແຜນ​ຮັດ­ກຸມ ເຊັ່ນ: ເວ­ລາ​ໃດ​ຈະ​ເອົາ​ລູກ ຊື້​ລົດ ຊື້​ເຮືອນ​ກ່ອນ​ບໍ ? ມີ​ລູກ​ແລ້ວ​ຈະ​ສົ່ງ​ຮ່ຳ­ຮຽນ​ຮອດ​ໃສ ? ແລະ ສຸດ​ທ້າຍ​ເຂົາ​ຍັງ​ບໍ່​ລືມ​ບາດ​ເຖົ້າ​ແລ້ວ​ຈະ​ໄປ​ອາ­ໄສ​ໃຜ ? ບ້ານ​ພັກ​ຄົນ​ຊະ­ລາ​ບ່ອນ​ໃດ​ເໝາະ​ສົມ ? ກ່ອນ​ຈາກ​ໂລກ​ນີ້​ໄປ ຈະ​ເຮັດ​ຫຍັງ​ເພື່ອ​ໃຫ້​ສັງ­ຄົມ​ກ່າວ​ຂານ​ໃນ​ທາງ​ທີ່​ດີ ວາງ​ແຜນ​ປານ​ນັ້ນ​ກໍ່​ຍັງ​ບໍ່​ສາ­ມາດ​ປະ­ຕິ­ບັດ​ໄດ້ ? ຂະ​ຫຍອນ​ຄົນ​ອາ­ຊີ​ເຮົາ.

    ປີ 2018 ຈະ​ໝົດ​ແລ້ວ ! ເລີ່ມ​ວາງ​ແຜນ​ຊີ­ວິດ​ໃນ​ປີ 2019 ກໍ່​ບໍ່​ຫຼ້າ​ສວາຍ​ດອກ ! ທະ­ແນມ­ແຕ່​ວ່າ​ເຮົາ​ຈະ​ຈິງ​ຈັງ​ກັບ​ຊີ­ວິດ​ສ່ຳ​ໃດ໋​ນໍ ?.

    ທີ່​ກ່າວ​ມາ​ຂ້າງ​ເທິງ​ນັ້ນ ເປັນ​ຂໍ້​ສະ­ເໜີ​ເພື່ອ​ແລກ­ປ່ຽນ​ນຳ​ເພື່ອນ​ຜູ້​ອ່ານ ຫາກ​ທ່ານ​ໃດ​ມີ​ຂໍ້​ມູນ​ກໍ່​ສາ­ມາດ​ສົ່ງ​ຂ່າວ​ມາ​ແລກ­ປ່ຽນ​ກັນ​ໄດ້ ? ຄໍ​ລຳ​ພວກ​ເຮົາ​ຍິນ​ດີ​ຮັບ​ແລກ­ປ່ຽນ​ບັນ­ຫາ​ຊີ­ວິດ ແລະ ສັງ­ຄົມ​ເພື່ອ​ພ້ອມ​ກັນ​ສ້າງ­ສັນ​ຊີ­ວິດ​ທີ່​ດີ­ງາມ​ນໍ ?.

ແນວ​ລາວ

ຂ່າວທີ່ກ່ຽວຂ້ອງ