ສ ອາ​ເມ​ຣິ​ກາ - ຈີນ ເຫັນ​ດີ​ງົດ​ການ​ຂຶ້ນ​ພາສີ​ສິນຄ້າ

405 05 ທ.ວ. 2018 ຂ່າວຕ່າງປະເທດ
ສ ອາ​ເມ​ຣິ​ກາ - ຈີນ ເຫັນ​ດີ​ງົດ​ການ​ຂຶ້ນ​ພາສີ​ສິນຄ້າ

     ວັນ​ທີ 1 ທັນວາ​ນີ້ ທ່ານ ວາງ​ຢີ້ ລັດຖະມົນຕີ​ກະຊວງ​ການ​ຕ່າງປະເທດ​ຈີນ ໄດ້​ຈັດ​ກອງ​ປະຊຸມ​ຖະແຫຼງ​ຂ່າວ​ຕໍ່​ສື່​ມວນ​ຊົນ​ຈີນ ແລະ ​ຕ່າງປະເທດ ຢູ່​ທີ່​ນະຄອນຫຼວງ ບູ​ເອນ​​ົສ ໄອ​ເຣ​​ສ (ປະເທດ​ອາກ​ຊັງ​ຕິນ) ກ່ຽວ​ກັບ​ການ​ພົບ​ປະ​ລະຫວ່າງ​ປະມຸກ​ລັດ​ຈີນ-ສ ອາ​ເມ​ຣິ​ກາ. ທ່ານ ວາງ​ຢີ້ ກ່າວ​ວ່າ ສອງ​ຝ່າຍ​ຈີນ-ສ ອາ​ເມ​ຣິ​ກາ ໄດ້​ປຶກສາ​ຫາລື​ຢ່າງ​ຕັ້ງໜ້າ ແລະ​ ມີ​ລັກສະນະ​ສ້າງ​ສັງ ກ່ຽວ​ກັບ​ບັນຫາ​ເສດຖະກິດ-ການ​ຄ້າ ໂດຍ​ປະມຸກ​ລັດ​ທັງ​ສອງ ໄດ້​ກ້າວ​ເຖິງ​ຂັ້ນ​ມີ​ຄວາມ​ເຫັນ​ເປັນ​ເອກະ​ພາບ​ກັນ ໃນ​ການ​ງົດ​ການ​ຂຶ້ນ​ພາສີ​ສິນຄ້າ​ເທື່ອ​ໃໝ່​ຕໍ່​ກັນ ຫຼັງ​ວັນ​ທີ 1 ມັງກອນ ປີ 2019.

    ສື່ສານ​ຂອງ​ຈີນ ລາຍ​ງານ​ວ່າ ໃນ​ການ​ພົບ​ປະ​ແບບ​ສອງ​ຝ່າຍ ຊຶ່ງ​ຈັດ​ຂຶ້ນ​ຢູ່​ນອກ​ກອງ​ປະຊຸມ​ສຸດ​ຍອດ ຂອງ​ກຸ່ມ​ບັນດາ​ພື້ນຖານ​ເສດຖະກິດ​ພັດທະນາ ແລະ​ ເກີດ​ໃໝ່ (G20) ຢູ່​ທີ່​ປະເທດ​ອາກ​ຊັງ​ຕິນ ນັ້ນ ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ແລະ​ປະທານ​ປະເທດ​ຈີນ ສີ​ຈິ້ນ​ຜິງ ໄດ້​ເຫັນ​ດີ​ນຳ​ກັນ​ວ່າ​ຈະ​ງົດ​ການ​ປະຕິບັດ​ລະດັບ​ພາສີ​ໃໝ່ “ຫຼັງ​ວັນ​ທີ 1 ມັງກອນ” ທີ່​ເປັນ​ຈຸດ​ເວລາ​ທີ່ ສ ອາ​ເມ​ຣິ​ກາ ຄາດ​ວ່າ​ຈະ​ປະຕິບັດ​ລະດັບ​ພາສີ​ໃສ່​ສິນຄ້າ​ທີ່​ນຳ​ເຂົ້າ​ຈາກ​ຈີນ ເປັນ​ມູນ​ຄ່າ​ລວມ 200 ຕື້ ໂດ​ລາ​ສະຫະລັດ.

    ກ່ອນ​ໜ້າ​ນັ້ນ ໃນ​ວັນ​ດຽວ​ກັນ ປະທານາທິບໍດີ ໂດ​ນາ​​ລ ທຣຳ ແລະ ​ປະທານ ສີ​ຈິ້ນ​ຜິງ ໄດ້​ເຂົ້າ​ຮ່ວມ​ຮັບ​ປະທານ​ອາຫານ​ຄ່ຳ​ປະກອບ​ກັບ​ການ​ເຮັດ​ວຽກ​ຮ່ວມ​ກັນ ຢູ່​ນອກ​ກອງ​ປະຊຸມ G20 ເພື່ອ​ຫາລື​ການ​ແກ້​ໄຂ​ຄວາມ​ຂັດ​ແຍ່ງ ທີ່​ເປັນຄວາມ​ສ່ຽງ​ເຮັດ​ໃຫ້​ເກີດ​ຄວາມ​ເສຍ​ຫາຍ ຕໍ່​ສອງ​ພື້ນຖານ​ເສດຖະກິດ​ທີ່​ມີ​ຂະໜາດ​ໃຫຍ່​ສຸດ​ໃນ​ໂລກ ໃນ​ລະຫວ່າງ​ການ​ເຮັດ​ສົງຄາມ​ການ​ຄ້າ.

    ໃນ​ຂະນະ​ດຽວ​ກັນ ຂ່າວສານ AFP ລາຍ​ງານ​ໃນ​ວັນ​ດຽວ​ກັນ​ວ່າ ທາງ​ການ ສ ອາ​ເມ​ຣິ​ກາ ແຈ້ງ​ໃຫ້​ຮູ້​ວ່າ ໃນ​ການ​ພົບ​ປະ​ສຸດ​ຍອດ​ດັ່ງກ່າວ ສ ອາ​ເມ​ຣິ​ກາ​ໄດ້​ເຫັນ​ດີ​ທີ່​ຈະ​ງົດ​ການ​ປະຕິບັດ​ພາສີ​ໃໝ່ ພາຍ​ໃນ​ເວລາ 90 ວັນ ຕໍ່​ສິນຄ້າ​ຂອງ​ຈີນ ທ່າມກາງ​ທີ່​ສອງ​ປະເທດ ພວມ​ຊອກ​ຫາ​ວິທີ​ຢຸດຕິ​ການ​ພິພາດ​ດ້ານ​ການ​ຄ້າ. ທຳ​ນຽບ​ຂາວ​ແຈ້ງ​ໃຫ້​ຮູ້​ວ່າ ການ​ຂຶ້ນ​ພາສີ​ຈາກ 10% ຂຶ້ນ​ເປັນ 25% ຕໍ່​ສິນຄ້າ​ຈີນ ໃນ​ມູນ​ຄ່າ 200 ຕື້​ໂດ​ລາ​ສະຫະລັດ ຊຶ່ງ​ຄາດ​ວ່າ​ຈະ​ມີ​ຜົນ​ບັງຄັບ​ໃຊ້​ແຕ່​ວັນ​ທີ 1 ມັງກອນ ປີ 2019 ເປັນຕົ້ນ​ໄປ​ນັ້ນ ຈະ​ໄດ້​ຖືກ​ໂຈະ​ໄວ້​ພາຍ​ໃນ 90 ວັນ. ຖະແຫຼງການ​ຂອງ​ທຳ​ນຽບ​ຂາວ ຊີ້​ແຈງ​ວ່າ ຖ້າ​ຫາ​ກວ່າ​ໃນ​ທ້າຍ​ກຳນົດ​ເວລາ​ດັ່ງກ່າວ ສອງ​ຝ່າຍ​ບໍ່​ສາມາດ​ບັນລຸ​ຂໍ້​ຕົກລົງ​ກັນ​ໄດ້​ແລ້ວ ລະດັບ​ພາສີ 10% ກໍ​ຈະ​ເພີ່ມ​ຂຶ້ນ​ເປັນ 25%./.

 

ຂ່າວທີ່ກ່ຽວຂ້ອງ