ຂ່າວຫຼ້າສຸດ

ເມັກ​ຊິກ ຄົ້ນ​ພົບ​ບໍ່​ນ້ຳມັນ​ເທິງ​ດິນ​ຕໍ່​ແຜ່ນ

394 04 ທ.ວ. 2018 ຂ່າວຕ່າງປະເທດ
ເມັກ​ຊິກ ຄົ້ນ​ພົບ​ບໍ່​ນ້ຳມັນ​ເທິງ​ດິນ​ຕໍ່​ແຜ່ນ

     ທ່ານ ກາກ​​ລົສ ເຕຣ​ວີ​ໂນ ຜູ້ອຳນວຍການ​ໃຫຍ່​ຂອງ​ກຸ່ມ​ບໍລິສັດ​ນ້ຳມັນ​ແຫ່ງ​ຊາດ​ເມັກ​ຊິກ (Pemex) ແຈ້ງ​ໃຫ້​ຮູ້​ວ່າ ຫຼັງ​ຈາກ​ທີ່​ໄດ້​ເຈາະ​ເພີ່ມ​ເຕີມ 2 ຫຼຸມ ກໍ​ໄດ້​ຄົ້ນ​ພົບ​ບໍ່​ນ້ຳມັນ Ixachi-1 ຢູ່​ໃນ​ລັດ ເວ​ຣາ​ຄລຸ​​ສ ທີ່ຢູ່​ຕິດ​ກັບ​ອ່າວ​ເມັກ​ຊິກ ໂດຍ​ມີ​ປະລິມານ​ນ້ຳມັນ​ສະ​ສົມ 3P (ກວດ​ສອບ ສາມາດ​ເກີດ​ຂຶ້ນ ແລະ​ສາມາດ​ເປັນ​ໄປ​ໄດ້) ໄລ່​ເປັນ​ນ້ຳມັນ​ຫຼາຍ​ເຖິງ 1,3 ຕື້ ບາ​ເຣນ.

    ດ້ວຍ​ປະລິມານ​ສະ​ສົມ​ດັ່ງກ່າວ ບໍ່​ນ້ຳມັນ Ixachi-1 ໄດ້​ຮັບ​ການ​ກຳນົດ​ວ່າ​ເປັນ​ບໍ່​ນ້ຳມັນ-ແກ​​ັສ ທີ່​ໃຫຍ່​ທີ່​ສຸດ ຊຶ່ງ​ຄົ້ນ​ພົບ​ຢູ່​ເທິງ​ດິນ​ຕໍ່​ແຜ່ນ ຢູ່​ໃນ​ເມັກ​ຊິກ ໃນ​ຮອບ 25 ປີ​ທີ່​ຜ່ານ​ມາ ແລະ​ເປັນ​ອັນ​ດັບ​ສີ່​ໃນ​ໂລກ ຖັດ​ຈາກ​ບໍ່​ນ້ຳມັນ Falhad-1 ຂອງ​ອີ​ຣັກ (ມີ​ນ້ຳມັນ​ສະ​ສົມ​ປະມານ 2,7 ຕື້​ບາ​ເຣນ) ບໍ່​ນ້ຳມັນ Moxi-8 ຂອງ​ຈີນ (1,759 ຕື້​ບາ​ເຣນ) ແລະ​ບໍ່​ນ້ຳມັນ Hazem-1 ຂອງ​ອາ​ຣາ​ບີ ຊາ​ອຸ​ດິດ (1,5 ຕື້​ບາ​ເຣນ).

    Pemex ໃຫ້ການ​ຄາດ​ຄະເນ​ການ​ລົງທຶນ​ໃຫ້​ແກ່​ການ​ເຈາະ​ນ້ຳມັນ 40 ຫຼຸມ ຢູ່​ໃນ​ບໍ່​ນ້ຳມັນ Ixachi ນັ້ນ​ມີ​ເຖິງ 1,5 ຕື້​ໂດ​ລາ​ສະຫະລັດ ແລະ​ ເມື່ອ​ເຂົ້າ​ສູ່​ການເຄື່ອນໄຫວ​ແລ້ວ  Ixachi-1 ຈະ​ປະກອບສ່ວນ​ໃຫ້​ແກ່​ປະລິມານ​ການ​ຜະລິດ​ນ້ຳມັນ​ດິບ​ຂອງ​ເມັກ​ຊິກ ໄດ້​ທີ່ 80.000 ບາ​ເຣນ/ວັນ ແລະ ​ແກ​​ັສ​ໄດ້ 700 ລ້ານ​ແມັດ​ກ້ອນ/ວັນ ພາຍ​ໃນ​ປີ 2022. ຄາດ​ວ່າ Ixachi-1 ຈະ​ເຂົ້າ​ສູ່​ການເຄື່ອນໄຫວ ນັບ​ແຕ່​ປີ 2019 ເປັນຕົ້ນ​ໄປ.

 

ຂ່າວທີ່ກ່ຽວຂ້ອງ