ຂ່າວຫຼ້າສຸດ

ເອີ​ຣົບ​ສິ້ນ​ເປືອງ​ຄ່າ​ໃຊ້​ຈ່າຍ 60 ຕື້​ເອີ​ໂຣ ຍ້ອນ​ການ​ປ່ອຍ​ແກ​​ັສ​ຈາກ​ລົດຍົນ

220 04 ທ.ວ. 2018 ຂ່າວຕ່າງປະເທດ
ເອີ​ຣົບ​ສິ້ນ​ເປືອງ​ຄ່າ​ໃຊ້​ຈ່າຍ 60 ຕື້​ເອີ​ໂຣ ຍ້ອນ​ການ​ປ່ອຍ​ແກ​​ັສ​ຈາກ​ລົດຍົນ

     ຜົນ​ການ​ຄົ້ນຄວ້າ​ທີ່​ຈັດ​ທຳ​ໂດຍ​ສູນ CE Delft ຂອງ​ໂຮນ​ລັງ ທີ່​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 27 ພະຈິກ​ທີ່​ຜ່ານ​ມາ ໃຫ້​ຮູ້​ວ່າ ຄ່າ​ໃຊ້​ຈ່າຍ​ໃນ​ແຕ່​ລະ​ປີ​ໃຫ້​ແກ່​ການ​ປິ່ນປົວ​ພະຍາດ ທີ່​ກ່ຽວຂ້ອງ​ເຖິງ​ອາກາດ​ເປັນ​ພິດ​ຈາກ​ການ​ປ່ອຍ​ແກ​​ັສ​ໂດຍ​ລົດຍົນ ຢູ່​ໃນ​ເອີ​ຣົບ​ນັ້ນ​ໄດ້​ມີ​ເກີນ 60 ຕື້​ເອີ​ໂຣ (ເທົ່າ​ກັບ​ເກືອບ 68 ຕື້ ໂດ​ລາ​ສະຫະລັດ).

   ການ​ຄົ້ນຄວ້າ​ດັ່ງກ່າວ ເປັນ​ການ​ສັ່ງ​ວຽກ​ຈາກ ສະຫະພາບ​ເອີ​ຣົບ ເພື່ອ​ສຸຂະພາບ​ຂອງ​ຊຸມ​ຊົນ (EPHA) ຊຶ່ງ​ເປັນ​ອົງການ​ທີ່​ບໍ່​ຂຶ້ນ​ກັບ​ລັດຖະບານ ໂດຍ​ເຕົ້າໂຮມ​ເອົາ​ກວ່າ 100 ສະມາຄົມ ແລະ​ຊ່ຽວຊານ​ດ້ານ​ການ​ແພດ.

    ການ​ຄົ້ນຄວ້າ​ດັ່ງກ່າວ ແມ່ນ​ອີງໃສ່​ຂໍ້​ມູນ ທີ່​ເກັບ​ກຳມາ​ໄດ້​ໃນ​ປີ 2016 ຈາກ 9 ປະເທດ ອັນ​ປະກອບ​ດ້ວຍ ເຢຍ​ລະ​ມັນ ໂປ​ໂລຍ ແອັດ​ສະ​ປາຍ ໂອ​ຕຣິ​​ສ ຮົງ​ກາ​ຣີ ສະ​ໂລ​ເວ​ນີ ບູນ​ກາ​ຣີ ຣູ​ມາ​ນີ ແລະ​ເອ​​ສ​ໂຕ​ນີ. ໂດຍ​ອີງໃສ່​ມາດຖານ​ຂອງ​ເອີ​ຣົບ ກ່ຽວ​ກັບ​ການ​ປ່ອຍ​ແກ​​ັສ ພາໃຫ້​ເກີດ​ມົນ​ລະ​ພິດ​ຈາກ​ລົດຍົນ​ນັ້ນ ບັນດາ​ນັກ​ຄົ້ນຄວ້າ​ກໍ​ຄິດໄລ່​ໄດ້​ເຖິງ​ຍອດ​ຄ່າ​ໃຊ້​ຈ່າຍ​ດ້ານ​ສາທາລະນະ​ສຸກ ທີ່​ມີ​ເຖິງ 66,7 ຕື້ ເອີ​ໂຣ (ເທົ່າ​ກັບ​ປະມານ 75,5 ຕື້​ໂດ​ລາ​ສະຫະລັດ). ເງິນ​ຈຳນວນ​ດັ່ງກ່າວ ແມ່ນ​ໃຊ້​ເຂົ້າ​ໃນ​ການ​ປິ່ນປົວ​ພະຍາດ​ທາງ​ເດີນ​ຫາຍໃຈ ແລະ​ພະຍາດຫົວໃຈ ແລະ​ເສັ້ນເລືອດ ໂດຍ​ທີ່​ສາເຫດ​ຕົ້ນຕໍ​ພາໃຫ້​ເກີດ​ພະຍາດ ກໍ​ແມ່ນ​ຍ້ອນ​ທາດ ໂອ​ຊິດ ນີ​ເຕີ (NOx) ທີ່​ເປັນ​ພິດ​ມາ​ຈາກ​ເຄື່ອງ​ຈັກ​ໃຊ້​ນ້ຳມັນ​ດີ​ເອ​ແຊລ (ກວມ​ເອົາ​ເຖິງ 83%).

    ງົບປະມານ​ແຫ່ງ​ຊາດ ຮັບຜິດຊອບ​ຊຳລະ 3/4 ຂອງ​ຄ່າ​ໃຊ້​ຈ່າຍ​ດັ່ງກ່າວ ໂດຍ​ຜ່ານ​ລະບົບ​ປະກັນ​ໄພ​ສັງຄົມ. ເງິນ​ຈຳນວນ​ດັ່ງກ່າວ ອາດ​ຈະ​ຫຼຸດ​ລົງ​ຫຼາຍ​ພໍ​ສົມຄວນ ຖ້າ​ຫາ​ກວ່າ​ລັດຖະບານ​ປະເທດ​ຕ່າງໆ ຊຸກຍູ້​ການ​ຜະລິດ ແລະ​ຈຳໜ່າຍ​ເຄື່ອງ​ຈັກ​ທີ່​ເປັນ​ມິດ​ກັບ​ສິ່ງແວດລ້ອມ​ຫຼາຍ​ຂຶ້ນ. ຄາດ​ວ່າ ເມື່ອ​ຮອດ​ປີ 2030 ຄ່າ​ໃຊ້​ຈ່າຍ​ດ້ານ​ສາທາລະນະ​ສຸກ​ດັ່ງກ່າວ ອາດ​ຈະ​ຫຼຸດ​ລົງ​ປະມານ 80% ເມື່ອ​ລົດຍົນ​ທີ່​ປ່ອຍ​ແກ​​ັສ​ພິດ​ອອກ​ມາ​ໜ້ອຍ ຖືກ​ນຳ​ໃຊ້​ຢ່າງ​ກວ້າງຂວາງ.

 

ຂ່າວທີ່ກ່ຽວຂ້ອງ