ຂ່າວຫຼ້າສຸດ

Starbucks ຍົກເລີກ​ການ​ໃຊ້​ທໍ່ດູດ​ຢາງ ຢູ່​ໃນ​ຮ້ານ​ຄ້າ​ໃນ ສ ເກົາຫຼີ

281 04 ທ.ວ. 2018 ຂ່າວຕ່າງປະເທດ
Starbucks ຍົກເລີກ​ການ​ໃຊ້​ທໍ່ດູດ​ຢາງ ຢູ່​ໃນ​ຮ້ານ​ຄ້າ​ໃນ ສ ເກົາຫຼີ

    Starbucks Coffee Korea Co., ຊຶ່ງ​ເປັນ​ວິ​ສາ​ຫະ​ກິດ​ຮ່ວມ​ທຸລະ​ກິດ ລະຫວ່າງ Starbucks Coffee Internaltional Inc ກັບ​ບໍລິສັດ​ຂາຍຍ່ອຍ Shinsegae (ໃນ ສ ເກົາຫຼີ) ໄດ້​ແຈ້ງ​ອອກ​ມາ​ເມື່ອ​ວັນ​ທີ 26 ພະຈິກ​ທີ່​ຜ່ານ​ມາ ວ່າ​ໄດ້​ນຳ​ເອົາ​ທໍ່ດູດ​ຢາງ​ອອກ​ໄປ​ຈາກ​ຮ້ານ​ຄ້າ​ແຫ່ງ​ຕ່າງໆ​ຢູ່​ພາຍ​ໃນ​ປະເທດ (ສ ເກົາຫຼີ) ແລະ ແທນ​ທີ່​ດ້ວຍ​ທໍ່ດູດ​ທີ່​ຜະລິດ​ຈາກ​ເຈ້ຍ ໃນ​ຄວາມ​ພະຍາຍາມ​ເພື່ອ​ອະນຸລັກ​ສິ່ງແວດລ້ອມ.

    ການເຄື່ອນໄຫວ​ດັ່ງກ່າວ ມີ​ອອກ​ມາ​ຫຼັງ​ຈາກ​ທີ່ Starbucks ດຳເນີນ​ການ​ທົດ​ລອງ​ທໍ່ດູດ​ທີ່​ເຮັດ​ດ້ວຍ​ເຈ້ຍ ຢູ່​ໃນ​ຮ້ານ​ຄ້າ​ປະມານ 100 ແຫ່ງ ໃນ ສ ເກົາຫຼີ ເມື່ອ​ເດືອນ​ກັນຍາ​ທີ່​ຜ່ານ​ມາ. ຫຼັງ​ຈາກ​ການ​ທົດ​ລອງ​ດັ່ງກ່າວ Starbucks ເຫັນ​ໄດ້​ວ່າ ຜູ້​ບໍລິໂພກ​ມັກ​ໃຊ້​ທໍ່ດູດ​ທີ່​ເຮັດ​ດ້ວຍ​ເຈ້ຍ​ທີ່​ເປັນ​ສີຂາວ ຫຼາຍ​ກວ່າ​ສີຟ້າ ແລະ​ເພື່ອ​ແກ້​ໄຂ​ຄວາມ​ທົນ​ນານ​ນັ້ນ ທໍ່ດູດ​ທີ່​ເຮັດ​ດ້ວຍ​ເຈ້ຍ ຈຶ່ງ​ຖືກ​ເຄືອບ​ດ້ວຍ​ນ້ຳມັນ ໝາກ​ຖົ່ວເຫຼືອງ.  Starbucks ໃຫ້​ຮູ້​ວ່າ ສິ່ງ​ບັນຈຸ​ເຄື່ອງ​ດື່ມ​ທີ່​ປົນ​ນ້ຳ​ແຂງ​ຈະ​ມີ​ຝາ​ປິດ ໂດຍ​ທີ່​ບໍ່​ມີ​ທໍ່ດູດ.

    Starbucks Coffee Korea ໃຫ້​ຮູ້​ວ່າ ຢູ່​ໃນ ສ ເກົາຫຼີ ມີ​ຮ້ານ​ຄ້າ​ຂອງ  Starbucks ປະມານ 1.200 ແຫ່ງ ແລະ​ໃນ​ແຕ່​ລະ​ປີ ມີ​ທໍ່ດູດ​ດ້ວຍ​ຢາງ​ປະມານ 180 ລ້ານ​ທໍ່ ຖືກ​ນຳ​ໃຊ້​ຢູ່​ໃນ​ຮ້ານ​ຄ້າ​ເຫຼົ່ານັ້ນ.

    ໃນ​ຂະນະ​ດຽວ​ກັນ Starbucks ກໍ​ຈະ​ລຶບລ້າງ​ທໍ່ດູດ ແລະ​ບ່ວງ​ຢາງ ຊຶ່ງ​ຜູ້​ບໍລິໂພກ​ສາມາດ​ເອົາ​ໄດ້​ຕື່ມ ຢູ່​ໃນ​ຮ້ານ​ຄ້າ​ແຫ່ງ​ຕ່າງໆ ແລະ​ແທນ​ທີ່​ໃສ່​ນັ້ນ​ກໍ​ແມ່ນ​ການ​ສະໜອງ​ທໍ່ດູດ​ທໍ່​ໜຶ່ງ ໃຫ້​ແກ່​ເຄື່ອງ​ດື່ມ​ທີ່​ໃສ່​ນ້ຳ​ແຂງ​ແຕ່​ລະ​ຢ່າງ. Starbucks ຍັງ​ຈະ​ໄດ້​ເປີດ​ໂຕ​ບ່ວງ​ທີ່​ເຮັດ​ດ້ວຍ​ໄມ້ ແທນ​ທີ່​ໃຫ້​ແກ່​ບ່ວງ​ຢາງ​ຕື່ມ​ອີກ.

 

ຂ່າວທີ່ກ່ຽວຂ້ອງ