ເບິ່ງບ້ານເຂົາເອົາບົດຮຽນ 04/12/2018

107 04 ທ.ວ. 2018 ຫົວຂໍ້ຂ່າວອື່ນໆ

    ມື້­ນີ້ ຈະ​ໃຫ້​ທ່ານ​ຜູ້​ອ່ານ​ຮູ້­ຈັກ​ກັບ​ມາດ​ຕະ­ການ​ປ້ອງ​ກັນ​ໄພ​ຂົ່ມ­ຂືນ​ຢູ່​ເນ​ປານ ແລະ ການ​ລົງ­ໂທດ​ບໍ­ລິ­ສັດ​ຈັດ​ຫາ​ງານ​ຂອງ​ສິງ­ກະ­ໂປ ຍ້ອນ​ລົງ​ເວັບ​ໄຊ​ຈ່າວ​ຂາຍ​ແຮງ​ງານ​ຕ່າງ­ປະ­ເທດ.

    ທີ່ ເນ​ປານ: ບັນ­ຫາ​ການ​ຂົ່ມ­ຂືນ​ຝືນ​ໃຈ​ຢູ່​ປະ­ເທດ​ເນ​ປານ​ນັ້ນ ໄດ້​ກາຍ­ເປັນ​ອາ​ຊະ​ຍາ​ກຳ​ທີ່​ເກີດ​ຂຶ້ນ​ນັບ​ມື້​ຖີ່ ແລະ ກໍ­ລະ­ນີ​ຮ້າຍ​ແຮງ​ທີ່​ສຸດ​ໄດ້​ເກີດ​ຂຶ້ນ​ກັບ​ເດັກ​ຍິງ ອາ­ຍຸ 13 ປີ ໃນ​ເດືອນ​ກໍ­ລະ­ກົດ​ປີ​ນີ້ ເຊິ່ງ​ເຫຍື່ອ​ເປັນ​ເດັກ​ນັກ­ຮຽນ​ທີ່​ຖືກ​ຂົ່ມ­ຂືນ ແລະ ຂ້າ​ຖິ້ມ​ຢ່າງ​ໂຫດ­ຮ້າຍ​ປ່າ​ເຖື່ອນ ເຫດ­ການ​ສະ­ຫຍອງ​ຂວັນ​ນີ້ ໄດ້​ເອີ້ນ​ໃຫ້​ລຸກ​ປຸກ​ໃຫ້​ຕື່ນ​ຄວາມ​ຄຽດ​ແຄ້ນ​ໃນ​ທົ່ວ​ສັງ­ຄົມ ເນ​ປານ ຈົນ​ເກີດ​ມີ​ການ​ປະ​ທ້ວງ​ທົ່ວ​ປະ­ເທດ ທວງ​ໃຫ້​ລັດ­ຖະ­ບານ​ເຂັ້ມ​ງວດ​ໃນ​ການ​ປ້ອງ​ກັນ​ອາ​ຊະ​ຍາ​ກຳ​ຊ້ຳ​ເຮື້ອ ດັ່ງ­ກ່າວ ຜູ້​ປະ​ທ້ວງ​ໄດ້​ກ່າວ​ຫາ​ທາງ​ການ​ວ່າ ບໍ່​ຈິງ​ຈັງ ແລະ ຈິງ​ໃຈ​ແກ້​ໄຂ​ບັນ­ຫາ​ດັ່ງ­ກ່າວ ໂດຍ​ໄດ້​ຍົກ​ຕົວ­ຢ່າງ​ກໍ­ລະ­ນີ ເຈົ້າ​ໜ້າ­ທີ່​ຕຳ­ຫຼວດ​ບໍ່​ໄດ້​ເອົາ​ຫົວ​ໃສ່­ໃຈ​ຊາ​ກ່ຽວ​ກັບ​ການ​ສືບ­ສວນ-ສອບ​ສວນ​ຄະ­ດີ​ຂົ່ມ­ຂືນ ເພື່ອ​ລົງ­ໂທດ​ຜູ້​ກະ­ທຳ​ຜິດ ພາຍ­ຫຼັງ​ເຫດ­ການ​ຂົ່ມ­ຂືນ​ນັກ­ຮຽນ​ຍິງ ອາ­ຍຸ 13 ປີ​ດັ່ງ­ກ່າວ ທາງ​ການ​ເນ​ປານ​ກໍ່​ໄດ້​ສັ່ງ​ປິດ​ເວບ​ໄຊ ວີ​ດີ​ໂອ ລາ­ມົກ​ໂປ້​ເປືອຍ ທີ່​ມີ​ທັງ​ໝົດ​ຫຼາຍ​ກວ່າ 24.000 ແຫ່ງ ໂດຍ​ອ້າງ​ເຫດ­ຜົນ​ວ່າ ເວັບ​ໄຊ​ເຫຼົ່າ​ນີ້​ລະ​ເປັນ­ຕົ້ນ​ເຫດ​ກໍ່​ຊະ​ນວນ​ອາ​ຊະ​ຍາ​ກຳ​ຂົ່ມ­ຂືນ ກະ­ທຳ​ສຳ​ເລົາ ແຕ່​ພາກ­ສ່ວນ​ທີ່​ເຄື່ອນ​ໄຫວ​ປົກ​ປ້ອງ​ສິດ­ທິ​ຂອງ​ແມ່­ຍິງ​ນັ້ນ ຜັດ​ເຫັນ​ວ່າ​ຂໍ້​ອ້າງ​ຂອງ​ທາງ​ການ​ນັ້ນ ເປັນ “ເລື່ອງ​ຕະ­ຫຼົກ” ທີ່​ໄຮ້​ປະ­ສິດ­ທິ­ພາບ ເພາະ​ເປັນ​ການ​ແກ້​ບັນ­ຫາ​ທີ່​ປາຍ​ເຫດ​ຊື່ໆ ສິ່ງ​ທີ່​ທາງ​ການ​ຄວນ​ເຮັດ ກໍ່​ຄື ມາດ​ຕະ­ການ​ທາງ​ກົດ­ໝາຍ​ທີ່​ເດັດ­ຂາດ ແລະ ເຂັ້ມ​ງວດ ການ​ສືບ­ສວນ-ສອບ​ສວນ ແລະ ການ​ລົງ­ໂທດ​ຜູ້​ກະ­ທຳ​ຜິດ.

    ທີ່ ສິງ­ກະ­ໂປ: ມີ​ຂ່າວ​ຈາກ​ໜັງ­ສື­ພິມ​ເດິ​ເນ​ເຊິນ (The Nation) ສະ­ບັບ​ວັນ​ທີ 21 ເດືອນ​ກັນ­ຍາ​ປີ​ນີ້​ວ່າ ທາງ​ການ​ສິງ­ກະ­ໂປ ໄດ້​ສັ່ງ​ຢຸດ​ໃບ​ອະ­ນຸ­ຍາດ​ຂອງ​ບໍ­ລິ­ສັດ​ຈັດ​ຫາ​ງານ​ທີ່​ມີ​ຊື່­ວ່າ: SRC Recruitment LLP ຍ້ອນ​ໄດ້​ລົງ​ເວັບ​ໄຊ​ໂຄ­ສະ­ນາ​ຂາຍ​ຄົນ​ງານ​ຊາວ​ອິນ​ໂດ​ເນ​ເຊຍ ທ່ານ ເກ​ວິນ ທຽວ (Kevin Teoh) ຜູ້​ຮັບ­ຜິດ­ຊອບ​ການ­ເຄື່ອນ­ໄຫວ​ຂອງ​ບັນ­ດາ​ອົງ­ການ​ຈ້າງ​ງານ​ໄດ້​ກ່າວ​ກ່ຽວ​ກັບ​ກໍ­ລະ­ນີ​ນີ້​ວ່າ “ພວກ​ຂ້າ­ພະ­ເຈົ້າ​ກ່າວ​ປະ­ນາມ​ຢ່າງ​ຮຸນ​ແຮງ​ຕໍ່​ການ​ໂຄ­ສະ­ນາ ຈ່າວ​ຂ່າຍ​ແຮງ​ງານ​ຕ່າງ­ປະ­ເທດ​ແບບ​ສິນ­ຄ້າ ໃນ​ລັກ­ສະ­ນະ​ຕ່ຳ​ຊ້າ​ນີ້ ເຊິ່ງ​ເປັນ​ການ​ກະ­ທຳ​ທີ່​ບໍ່​ເໝາະ​ສົມ ແລະ ຍອມ­ຮັບ​ບໍ່​ໄດ້​ເດັດ­ຂາດ ເວບ​ໄຊ ເຈົ້າ​ບັນ­ຫາ​ດັ່ງ­ກ່າວ​ນັ້ນ ມີ​ຫົວ­ຂໍ້​ວ່າ: “ການ​ຊອກ​ຫາ​ຄົນ​ໃຊ້” ເຊິ່ງ​ສະ­ເໜີ​ໃຫ້​ບໍ­ລິ­ການ​ຈັດ​ຫາ​ແຮງ​ງານ​ອິນ​ໂດ​ເນ​ເຊຍ ມາ​ເປັນ​ຄົນ​ໃຊ້​ປະ­ຈຳ​ຄົວ​ເຮືອນ ເນື້ອ​ໃນ​ສ່ວນ​ໜຶ່ງ​ຂອງ​ເວັບ​ໄຊ ໄດ້​ເວົ້າ​ກ່ຽວ​ກັບ​ຈຳ­ນວນ​ແຮງ​ງານ​ທີ່​ຖືກ​ຂາຍ​ໄປ​ເປັນ​ຄົນ​ໃຊ້ ເຫດ­ການ​ເວັບ​ໄຊ​ຈ່າວ​ຂາຍ​ແຮງ​ງານ​ອິນ​ໂດ​ເນ​ເຊຍ ແບບ​ສິນ­ຄ້າ​ນີ້ ໄດ້​ສ້າງ​ຄວາມ​ແຄ້ນ​ເຄືອງ​ໃນ​ທົ່ວ​ສັງ­ຄົມ​ອິນ​ໂດ​ເນ​ເຊຍ ເຊິ່ງ​ໄດ້​ປຸກ​ໃຫ້​ອົງ­ການ​ປົກ​ປ້ອງ​ແຮງ​ງານ​ຢູ່​ປະ­ເທດ​ນີ້ ລຸກ­ຂຶ້ນ​ມາ​ກ່າວ​ປະ­ນາມ ແລະ ທວງ​ໃຫ້​ປິດ​ເວບ​ໄຊ​ດັ່ງ­ກ່າວ ສ່ວນ​ທ່ານ​ນາງ ໂຈ​ເຊ​ຟິນ ທຽວ (Josephine Teo) ລັດ­ຖະ­ມົນ­ຕີ​ກະ­ຊວງ​ແຮງ​ງານ​ສິງ­ກະ­ໂປ ກໍ່​ໄດ້​ມີ​ຄຳ​ເຫັນ​ຜ່ານ​ເຟດ​ບຸ​ກວ່າ: “ມີ​ຄວາມ​ກະ­ທົບ­ກະ­ເທືອນ​ຈິດ­ໃຈ​ຢ່າງ​ໜັກ ກ່ຽວ​ກັບ​ບັນ­ຫາ​ນີ້” ແລະ ວ່າ “ສຳ­ລັບ​ພວກ​ເຮົາ​ຊາວ​ສິງ­ກະ­ໂປ ຈຳ­ນວນ​ຫຼວງ­ຫຼາຍ​ແລ້ວ ແຮງ​ງານ​ເປັນ​ຄົນ​ໃຊ້​ຈາກ​ຕ່າງ­ປະ­ເທດ​ນັ້ນ ແມ່ນ​ສ່ວນ​ໜຶ່ງ​ຂອງ​ສະ­ມາ­ຊິກ​ຄອບ­ຄົວ ດັ່ງ­ນັ້ນ ພວກ​ເຮົາ​ຕ້ອງ​ປະ­ຕິ­ບັດ​ຕໍ່​ພວກ​ເຂົາ­ເຈົ້າ​ດ້ວຍ​ຄວາມ​ເຄົາ­ລົບ”.

ຂ່າວທີ່ກ່ຽວຂ້ອງ