ຊີວິດ 3 ຈໍ

298 30 ພ.ຈ. 2018 ນານາສາລະ

    ກະ­ແສ​ເມຍ 2018 ຍັງ​ມາ​ແຮງ​ຮິດ​ຮັອດ​ກັນ​ໃນ​ວັງ​ການ​ສັງ­ຄົມ ເຊິ່ງ​ນີ້​ຄື​ອິດ​ທິ​ພົນ​ວັດ­ທະ­ນະ­ທຳ​ຂອງ​ໂທລະ­ພາບ​ບ້ານ​ໃກ້​ເຮືອນ​ຄຽງ ເຊິ່ງ​ຫຼາຍ​ຄົນ​ອາດ​ຄິດ​ເປັນ​ເລື່ອງ​ທຳ​ມະ​ດາ ແຕ່​ສຳ­ລັບ​ຜູ້​ຄິດ​ໄກ​ຄິດ​ຍາວ​ຍ່ອມ​ຮູ້­ສຶກ​ເປັນ​ຫ່ວງ​ໃນ​ສ່ວນ​ເລິກ​ຂອງ​ໝາກ​ຫົວ­ໃຈ ຍຸກ​ນີ້​ເອີ້ນ​ກັນ​ວ່າ 4.0 ເປັນ​ຍຸກ​ຂອງ​ການ​ປະ­ຕິ­ວັດ​ເຕັກ​ໂນ​ໂລ​ຊີ ເຊິ່ງ​ສ່ວນ​ໃຫຍ່​ຊີ­ວິດ​ຜູ້​ຄົນ​ໃນ​ສັງ­ຄົມ​ກ້ຽວ​ວຽນ​ຢູ່​ກັບ 3 ໜ້າ​ຈໍ​ເປັນ​ຫຼັກ.

    ຊີ­ວິດ​ຍຸກ 3 ຈໍ ຂອງ​ຄົນ​ເມືອງ ແລະ ຄົນ​ຊົນ­ນະ­ບົດ​ກຳ­ລັງ​ຮັບ​ເອົາ​ອິດ​ທິ​ພົນ​ຂອງ​ມັນ ຄື: ໜ້າ​ຈໍ​ທີ​ໜຶ່ງ​ແມ່ນ​ໜ້າ​ຈໍ​ຂອງ​ໂທລະ­ສັບ ເຊິ່ງ​ສາ­ມາດ​ຫາ​ຄຳ​ຕອບ​ຫຼາຍ​ດ້ານ​ໃນ​ການ​ດຳ­ເນີນ​ຊີ­ວິດ ເພາະ​ການ​ຕິດ­ຕໍ່​ມັນ​ວ່ອງ­ໄວ​ທັນ­ໃຈ ໜ້າ​ຈໍ​ທີ​ສອງ ຄື​ຈໍ​ຂອງ​ຄອມ​ພິວ​ເຕີ ເວົ້າ​ສະ­ເພາະ​ມະ­ນຸດ​ເງິນ­ເດືອນ​ທີ່​ໜ້າ​ວຽກ​ກ່ຽວ​ກັບ​ຂໍ້​ມູນ​ຂ່າວ­ສານ ຫຼື ສ້າງ​ວຽກ​ງານ-ວາງ​ແຜນ ແລະ ຂຽນ​ແຜນ​ນະ­ໂຍ­ບາຍ​ທີ່​ຕ້ອງ​ໃຊ້​ຈໍ​ຄອມ​ພິວ​ເຕີ ລວມ​ທັງ​ຫຼິ້ນ​ອິນ​ເຕີ​ເນັດ (ລົມ​ວຽກ​ງານ​ຜ່ານ​ເຄື່ອງ­ມື​ທັນ​ສະ­ໄໝ) ຈໍ​ທີ​ສາມ ແມ່ນ​ໜ້າ​ຈໍ​ຂອງ​ໂທລະ­ພາບ ສັງ­ເກດ​ເຫັນ​ສ່ວນ​ໜຶ່ງ​ກໍ່​ແມ່ນ​ຢູ່​ຕາມ​ຮ້ານ​ໃນ​ຕະ­ຫຼາດ (ແມ່​ຄ້າ​ເບິ່ງ​ໜັງ ຫຼື ລະ­ຄອນ) ຫຼື ຢູ່​ບ້ານ​ເຮືອນ​ຫຼັງ​ຈາກ​ອາ­ຫານ​ແລງ​ແລ້ວ ກິດ­ຈະ­ກຳ​ອັດ­ຕະ­ໂນ­ມັດ​ຂອງ​ຜູ້​ມີ​ອິດ​ທິ​ພົນ​ຢູ່​ບ້ານ​ເຮືອນ ຫ້າມ​ສະ­ມາ­ຊິກ​ຄອບ­ຄົວ​ຄົນ​ອື່ນ​ມາ​ຍາດ Remote Control.

    ສຳ­ລັບ 3 ໜ້າ​ຈໍ​ທີ່​ໜ້າ​ຄິດ​ກໍ່​ແມ່ນ​ຜູ້​ໃຊ້ ຜູ້​ເສບ​ສື່­ສານ​ເຫຼົ່າ­ນັ້ນ​ວ່າ​ຈະ​ຕົກ​ໃນ​ລັກ­ສະ­ນະ​ຫົວ​ອ່ອນ ເສບ​ຕິດ​ແລ້ວ​ຄ້ອຍ​ຕາມ​ເຫັນ​ດີ​ເຫັນ​ງາມ ດຶງ​ເອົາ​ໄມ້​ເດັດ​ໃນ​ບົດ​ລະ­ຄອນ​ມາ​ໃຊ້​ເປັນ​ສູດ​ຊີ­ວິດ​ຈິງ​ກໍ່​ມີ ໂດຍ​ບໍ່​ຮູ້­ສຶກ​ໂຕ ຫຼື ຜູ້​ເສບ​ຈະ​ມີ​ສະ­ຕິ​ປັນ­ຍາ​ຮູ້​ເທົ່າ​ທັນ ຫຼື ບໍ່ ? ຄຳ​ຕອບ​ອາດ​ມີ​ໃນ​ໃຈ​ທ່ານ​ຜູ້​ອ່ານ ຕໍ່​ມາ​ທີ່​ໜ້າ​ເປັນ​ຫ່ວງ ຄື: ເຍົາ­ວະ​ຊົນ ເຊິ່ງ​ເປັນ​ລູກ​ຫຼານ​ຍັງ​ອາ­ຍຸ​ນ້ອຍ​ທີ່​ຕິດ​ໜ້າ​ຈໍ​ດັ່ງ­ກ່າວ ໂດຍ​ຍັງ​ບໍ່​ສາ­ມາດ​ແຍກ​ແຍະ​ຂໍ້​ມູນ​ເໝາະ​ສົມ ຖືກ­ຕ້ອງ​ກັບ​ໄວ​ອາ­ຍຸ​ຕົນ ເພາະ​ສິ່ງ​ທີ່​ມາ​ໃນ​ໜ້າ​ຈໍ​ດັ່ງ­ກ່າວ​ມັນ​ມີ​ຂໍ້​ມູນ​ຫຼາຍ​ປະ­ເພດ ຍົກ​ຕົວ­ຢ່າງ: ເມື່ອ​ພໍ່​ແມ່​ຜູ້​ປົກ­ຄອງ​ມີ​ກິດ­ຈະ­ກຳ​ຕຳ​ຈອກ ໂດຍ​ຄິດ​ວ່າ​ບໍ່​ຢາກ​ໃຫ້​ລູກ​ມາ​ວຸ້ນ­ວາຍ​ນຳ​ເລີຍ ປ່ອຍ​ໃຫ້​ພວກ​ເຂົາ​ຫຼິ້ນ​ໂທລະ­ສັບ​ແບບ​ຈຸ​ໃຈ ບາງ​ລາຍ​ພໍ່​ແມ່​ຕຳ​ຈອກ​ດົນ​ໄປ ທັງ​ເມົາ ທັງ​ມຶນ ເກີດ​ຜິດ​ຖຽງ​ເລືອງ​ເກົ່າ​ເລົ່າ­ຄືນ ບໍ່​ມີ​ໃຜ​ຍອມ​ໃຜ ເກີດ​ຕົບ​ຕີ​ມີ​ປາກ​ສຽງ​ຕໍ່­ໜ້າ​ລູກ.

    ຊີ­ວິດ​ຍຸກ 3 ຈໍ ຈຶ່ງ​ບໍ່​ຄວນ​ຖື​ເບົາ​ໃນ​ການ​ໃຫ້​ເວ­ລາ​ແກ່​ລູກ​ຫຼານ​ເຍົາ­ວະ​ຊົນ ແນະ­ນຳ​ພວກ​ເຂົາ​ເລືອກ​ໃຊ້ ເລືອກ​ເສບ​ຂໍ້​ມູນ​ທີ່​ເໝາະ​ສົມ ບາງ​ໂຮງ­ຮຽນ​ໃນ​ຕ່າງ­ປະ­ເທດ ເວ­ລາ​ເປີດ​ປະ­ຖົມ​ນິ­ເທດ​ເຂົາ​ເຊີນ​ພໍ່​ແມ່​ຜູ້​ປົກ­ຄອງ​ເຂົ້າ​ຮ່ວມ​ນຳ ເພື່ອ​ແນະ­ນຳ​ໃຫ້​ຜູ້​ປົກ­ຄອງ​ເຂົ້າ­ໃຈ​ບັນ­ຫາ​ການ​ໃຊ້​ໂທລະ­ສັບ ຫຼື ຄອມ​ພິວ​ເຕີ ຖ້າ​ສັງ­ຄົມ​ຕື່ນ​ໂຕ​ຕໍ່​ປັນ­ຫາ​ຕັດ​ໄຟ​ແຕ່​ຕົ້ນ​ລົມ ປັນ­ຫາ​ອາດ​ບໍ່​ບານ​ປາຍ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ