ເດືອນແຫ່ງບຸນ

240 28 ພ.ຈ. 2018 ນານາສາລະ

    ຫຼັງ​ຈາກ​ອອກ​ພັນ​ສາ ຕົກ​ມາ­ໄລ​ຍະ​ເດືອນ 11-12 ສາ­ມາດ​ເວົ້າ​ໄດ້​ວ່າ​ເປັນ​ເດືອນ​ແຫ່ງ​ບຸນ ເພາະ​ໄລ­ຍະ​ນີ້​ມີ​ທັງ​ບຸນ​ຜ້າ­ປ່າ-ກະ­ຖິນ ແລະ ບຸນ­ທາດ­ຫຼວງ ເຊິ່ງ​ສຳ­ລັບ​ຄົນ​ລາວ​ແລ້ວ​ໃຜ​ກໍ່​ຢາກ​ໄດ້​ບຸນ ແຕ່​ອາດ​ມີ​ໜ້ອຍ​ຄົນ​ທີ່​ເຂົ້າ­ໃຈ​ແຈ້ງ­ວ່າ: ບຸນ​ແທ້​ຈິງ​ເປັນ​ແນວ­ໃດ ? ແລະ ເຮັດ­ບຸນ​ແນວ­ໃດ​ຈຶ່ງ​ຈະ​ໄດ້​ບຸນ ? ຜູ້​ຂຽນ​ຈະ​ບໍ່​ຂໍ​ເວົ້າ​ເຖິງ​ຄວາມ​ເປັນ​ມາ​ຂອງ​ບຸນ​ຕ່າງໆ ເພາະ​ຫຼາຍ​ຄົນ​ເຂົ້າ​ໄປ​ຄົ້ນ​ຢູ່​ອິນ​ເຕີ​ເນັດ ຫຼື ເປີດ​ຢູ​ທູບ (You Tube) ເບິ່ງ​ກໍ່​ສາ­ມາດ​ຮູ້​ໄດ້​ທັນ­ທີ ແຕ່​ຈະ​ຂໍ​ນຳ​ສະ­ເໜີ​ບາງ​ຂໍ້​ສັງ­ເກດ ເພື່ອ​ໃຫ້​ເກີດ​ຂໍ້​ຄິດ​ຮ່ວມ​ກັນ.

    ບຸນ ເປັນ​ນາມ​ມະ​ທຳ ເປັນ​ຊື່​ຂອງ​ຄວາມ​ດີ ດັ່ງ­ນັ້ນ ຜົນ​ຂອງ​ການ​ສ້າງ​ຄວາມ​ດີ​ກໍ່​ຈະ​ໄດ້​ຄວາມ­ສຸກ ກົງ­ກັນ­ຂ້າມ​ກັບ​ຄວາມ​ຊົ່ວ ຜູ້​ໃດ​ເຮັດ​ຊົ່ວ​ກໍ່​ຈະ​ໄດ້​ບາບ ຜົນ​ຂອງ​ການ​ເຮັດ​ບາບ ກໍ່​ຄື ຄວາມ­ທຸກ ສຳ­ລັບ​ບຸນ​ຜ້າ­ປ່າ-ກະ­ຖິນ ຊາວ​ພຸດ​ນິ­ຍົມ​ເຮັດ​ກັນ​ຕາມ​ຂອບ​ເຂດ​ຂອງ​ເວ­ລາ​ຫຼັງ​ຈາກ​ອອກ​ພັນ​ສາ ໂດຍ​ຊັກ​ຊວນ​ອວນ​ເອີ້ນ​ຜູ້​ມີ​ຈິດ​ສັດ­ທາ​ລວບ​ລວມ​ເງິນ (ປັດ​ໄຈ) ວັດ­ຖຸ​ຕ່າງໆ​ມີ ຈີ­ວອນ ເພື່ອ​ໄປ​ຖວາຍ​ແດ່​ພະ­ສົງ ບາງ​ວັດ​ມີ​ສິ່ງ​ກໍ່­ສ້າງ​ຈຳ­ເປັນ ເຊັ່ນ: ກຸດ­ຕິ ທີ່​ພັກ​ຂອງ​ພະ­ສົງ ບາງ​ວັດ​ຮ່ວມ​ກັບ​ບ້ານ​ສ້າງ​ໂຮງ­ຮຽນ​ໃຫ້​ລູກ​ຫຼານ​ໄດ້​ມີ​ຫ້ອງ​ຮຽນ​ສະ­ດວກ​ຂຶ້ນ ນີ້​ຖື​ວ່າ​ໄດ້​ບຸນ​ຫຼາຍ ເພາະ​ສັງ­ຄົມ​ໄດ້​ປະ­ໂຫຍດ ປະ­ເດັນ​ທີ່​ໜ້າ​ຄິດ ຄື: ວິ­ທີ​ການ​ເຮັດ­ບຸນ​ຂອງ​ເຈົ້າ­ພາບ ຫຼື ຄະ­ນະ​ຈັດ​ຕັ້ງ (ກຳ­ມະ­ການ​ທັງ​ວັດ ແລະ ບ້ານ) ນັ້ນ​ມີ​ເຈດ​ຕະ​ນາ​ແທ້​ຈິງ​ແບບ​ໃດ ? ເພາະ​ຜ່ານ​ມາ​ມີ​ຫາງ​ສຽງ​ທັງ​ລົບ ແລະ ບວກ​ປົນ​ກັນ ເຊັ່ນ: ເຮັດ­ບຸນ​ເອົາ­ໜ້າ ເຮັດ­ບຸນ​ແບບ​ກຳ­ມະ­ການ​ເຄິ່ງ​ໜຶ່ງ ວັດ​ເຄິ່ງ​ໜຶ່ງ ສຸດ​ທ້າຍ​ບຸນ​ທີ່​ໄດ້​ກໍ່​ຈະ​ບໍ່​ເຕັມ​ຕາມ​ເຈດ​ຕະ​ນາ.

    ການ​ເຮັດ­ບຸນ ກໍ່​ຄື ການ​ໃຫ້​ທານ ການ​ເຝິກ​ສະ­ມາ­ທິ​ກໍ່​ເປັນ​ບຸນ ການ​ສຶກ​ສາ​ຄົ້ນ­ຄວ້າ​ເພື່ອ​ໃຫ້​ປັນ­ຍາ​ເກີດ​ຂຶ້ນ​ກໍ່​ເປັນ​ບຸນ ດັ່ງ­ນັ້ນ ບຸນ​ຈຶ່ງ​ມີ​ຫຼາຍ​ແບບ ເພາະ​ສັງ­ເກດ​ເຫັນ​ໄດ້​ວ່າ ກະ­ແສ​ການ​ເຮັດ­ບຸນ​ໃຫຍ່​ໃນ​ສັງ­ຄົມ ເຫັນ​ແຕ່​ການ​ໃຫ້​ທານ ຮອງ​ລົງ​ມາ​ກໍ່​ນັ່ງ​ສະ­ມາ­ທິ ແຕ່​ຍັງ​ຂາດ​ເລື່ອງ​ການ​ສ້າງ​ປັນ­ຍາ ຫຼື ສັງ­ເກດ​ການ​ສັ່ງ­ສອນ​ອະ­ທິ­ບາຍ​ທຳ ກໍ່​ມີ​ແຕ່​ເລື່ອງ​ການ​ໃຫ້​ທານ ແຕ່​ມີ​ໜ້ອຍ​ຈະ​ເອີ່ຍ​ເຖິງ​ເລື່ອງ​ປັນ­ຍາ ດັ່ງ­ນັ້ນ ຖ້າ­ວ່າ​ມີ​ແຕ່​ການ​ໃຫ້​ທານ ມີ​ແຕ່​ສອນ​ເລື່ອງ​ສັດ­ທາ ກໍ່​ຈະ​ຫຼົງ​ລືມ​ເລື່ອງ​ປັນ­ຍາ ເຖິງ​ວ່າ​ບາງ​ທ່ານ​ຈະ​ທ່ອງ​ຂຶ້ນ​ໃຈ​ຕິດ​ສະ­ໝອງ​ວ່າ ສັດ­ທາ​ກໍ່​ໄປ​ຄູ່​ກັບ​ປັນ­ຍາ ແຕ່​ເບິດ​ປັນ­ຍາ​ທີ່​ຈະ​ສອນ​ເລື່ອງ​ປັນ­ຍາ ເຮັດ​ໃຫ້​ສັງ­ຄົມ​ມີ​ແຕ່​ສັດ­ທາ.

    ພະ­ພຸດ­ທະ­ເຈົ້າ​ສອນ​ວ່າ: ກ່ອນ​ຈະ​ໃຫ້​ທານ​ຕ້ອງ​ມີ​ການ​ວິ­ໄຈ​ກ່ອນ ໝາຍ​ຄວາມ​ວ່າ ການ​ໃຫ້​ທານ​ກໍ່​ຕ້ອງ​ໃຊ້​ປັນ­ຍາ ດັ່ງ­ນັ້ນ ຈຶ່ງ​ບໍ່​ໝາຍ​ຄວາມ​ວ່າ ຜູ້​ໃດ​ຖວາຍ​ເງິນ​ຫຼາຍ​ຈະ​ໄດ້​ບຸນ​ຫຼາຍ​ເຕັມ​ຮ້ອຍ ເພາະ​ຖ້າ​ເຮັດ­ບຸນ​ຜິດ​ຄົນ ຜິດ​ເຈດ​ຕະ​ນາ ກໍ່​ສ່ຳ​ກັບ​ຖອກ​ນ້ຳ​ໃສ່​ກອງ​ຊາຍ ຖ້າ​ສັງ­ຄົມ​ມີ​ແຕ່​ການ​ໃຫ້​ທານ ແຕ່​ຂາດ​ສິນ ສະ­ມາ­ທິ ແລະ ປັນ­ຍາ ກໍ່​ຈະ​ຂາດ​ຄວາມ​ສົມ​ດຸນ​ໃນ​ການ​ພັດ­ທະ­ນາ ເພາະ​ຜູ້​ມີ​ແຕ່​ສັດ­ທາ ແຕ່​ຂາດ​ປັນ­ຍາ ກໍ່​ເທົ່າ​ກັບ​ງົມ­ງວາຍ.

ດັ້ນກີບເມກ

ຂ່າວທີ່ກ່ຽວຂ້ອງ