ເບິ່ງບ້ານເຂົາເອົາບົດຮຽນ 27/11/2018

160 27 ພ.ຈ. 2018 ຫົວຂໍ້ຂ່າວອື່ນໆ

    ມື້­ນີ້ ຂໍ​ສະ­ເໜີ​ຂ່າວ​ເລື່ອງ​ນະ­ໂຍ­ບາຍ​ຂອງ​ປະ­ທາ­ນາ­ທິ­ບໍ­ດີ ສ ອາ​ເມ​ຣິ​ກາ ກ່ຽວ​ກັບ​ການ­ເຄື່ອນ­ໄຫວ​ຂອງ​ສື່​ເລື່ອງ​ຝຣັ່ງ ປະ­ກາດ​ຫ້າມ​ໃຊ້​ຍາ​ຂ້າ​ແມງ­ໄມ້​ທີ່​ເປັນ​ອັນ­ຕະ­ລາຍ ແລະ ຂ່າວ​ກ່ຽວ​ກັບ​ແຜນ​ຂຶ້ນ​ພາ­ສີ ເຄື່ອງ​ດື່ມ​ທີ່​ມີ​ລົດ​ຫວານ​ຢູ່ ມາ​ເລ​ເຊຍ.

    ທີ່ ສ ອາ​ເມ​ຣິ​ກາ: ໜັງ­ສື­ພິມ ລາວ​ພັດ­ທະ­ນາ ສະ­ບັບ​ວັນ​ທີ 20 ເດືອນ​ພະ­ຈິກ​ນີ້ ໄດ້​ສະ­ເໜີ​ກ່ຽວ​ກັບ​ຄຳ​ປະ­ກາດ​ຂອງ​ທ່ານ ໂດ​ນັນ ທຣຳ ວ່າ​ຈະ​ອອກ​ກົດ­ໝາຍ ແລະ ລະ­ບຽບ​ການ​ກ່ຽວ​ກັບ​ການ​ປະ­ພຶດ​ຂອງ​ບັນ­ດາ​ຄົນ​ສື່​ຈາກ​ທຸກ​ສຳ­ນັກ­ງານ ເພື່ອ​ໃຫ້​ຢູ່​ພາຍ​ໃຕ້​ກົດ​ລະ­ບຽບ​ທີ່​ເປັນ​ເອ­ກະ​ພາບ ແລະ ມີ​ຄວາມ​ສະ­ເໝີ­ພາບ ສຳ­ລັບ​ການ­ເຄື່ອນ­ໄຫວ ກໍ່​ຄື ວິ­ທີ​ການ​ຕັ້ງ​ຄຳ​ຖາມ​ບົນ​ພື້ນ​ຖາມ ມາ­ລະ­ຍາດ​ອັນ​ດີ ແລະ ເຄົາ­ລົບ​ເຊິ່ງ​ກັນ ແລະ ກັນ ຄຳ​ປະ­ກາດ​ນີ້​ມີ​ຂຶ້ນ​ໃນ​ກາງ​ເດືອນ​ພະ­ຈິກ​ປີ​ນີ້​ເອງ ທ່ານ​ປະ­ທາ­ນາ­ທິ­ບໍ­ດີ ຕ້ອງ­ການ​ໃຫ້​ນັກ​ສື່​ຂ່າວ​ທຸກ​ຄົນ ມີ​ໂອ­ກາດ​ເທົ່າ​ທຽມ ແລະ ທົ່ວ​ເຖິງ​ກັນ ໃນ​ການ​ຕັ້ງ​ຄຳ​ຖາມ ບໍ່​ແມ່ນ​ວ່າ​ຈະ​ປ່ອຍ​ໃຫ້​ໃຜ​ຜູ້​ໜຶ່ງ​ໄດ້​ປຽບ​ຕັ້ງ​ຄຳ​ຖາມ​ຕິດໆ​ຕໍ່ໆກັນ​ພຽງ​ຄົນ​ດຽວ ໂດຍ​ບໍ່​ປ່ອຍ​ໂອ­ກາດ​ໃຫ້​ຄົນ​ອື່ນ ທຳ​ນຽບ​ຂ່າວ​ຕ້ອງ­ການ​ປົກ​ປ້ອງ​ເສລີ­ພາບ​ຂອງ​ສື່​ມວນ​ຊົນ​ບົນ​ພື້ນ­ຖານ​ລະ­ບຽບ​ກົດ­ໝາຍ ເຊິ່ງ​ຜູ້​ລະ­ເມີດ​ຕ້ອງ​ມີ​ການ​ຕໍ່­ສູ້​ກັນ ໃນ​ສານ​ຄັກ­ແນ່ ໂດຍ​ຫາງ​ສຽງ​ທົ່ວ​ໄປ​ແລ້ວ ສື່​ມວນ​ຊົນ ສ ອາ​ເມ​ຣິ​ກາ ຖື​ວ່າ​ທ່ານ​ປະ­ທາ­ນາ­ທິ­ບໍ­ດີ ກີດ​ກັ້ນ​ເສລີ­ພາບ​ໃນ​ການ­ເຄື່ອນ­ໄຫວ​ຂອງ​ວົງ​ການ​ສື່​ມວນ​ຊົນ.

    ທີ່ ປະ­ເທດ​ຝຣັ່ງ: ມີ​ຂ່າວ​ຈາກ​ນະ­ຄອນ­ຫຼວງ​ປາ​ຣີ ທີ່​ໃຫ້​ຊາບ​ວ່າ: ລັດ­ຖະ­ບານ​ຝຣັ່ງ ໄດ້​ປະ­ກາດ​ໃນ​ວັນ​ທີ 5 ເດືອນ​ພະ­ຈິກ​ນີ້ ກ່ຽວ​ກັບ​ການ​ຫ້າມ​ໃຊ້​ຕະ­ຫຼອດ​ການ ສານ​ຊະ­ນິດ​ໜຶ່ງ​ໃນ​ຢາ​ຂ້າ​ແມງ­ໄມ້ ທີ່​ນິ­ຍົມ​ໃຊ້​ກັນ​ຢ່າງ​ແຜ່​ຫຼາຍ ທີ່​ເອີ້ນ​ວ່າ: “ແທມ​ໂຊ­ດຽມ” ວ່າ​ນັບ​ແຕ່​ເດືອນ​ກັນ­ຍາ​ປີ​ນີ້ ສານ​ແທມ​ໂຊ­ດຽມ ໄດ້​ກາຍ­ເປັນ​ສາ­ເຫດ​ເຮັດ​ໃຫ້​ມີ​ກໍ­ລະ­ນີ​ເຈັບ­ເປັນ​ໃນ​ເຂດ​ປົກ­ຄອງ ເມນ​ອາ​ລົວ ສານ​ທີ່​ວ່າ​ນັ້ນ ໃນ​ເມື່ອ​ກ່ອນ​ເຊື່ອ​ວ່າ​ຈະ​ບໍ່​ລະ­ບາດ​ກັບ​ພືດ ແລະ ຄົນ​ພາຍ​ໃນ​ຟາມ ມັນ​ເປັນ­ສານ​ທີ່​ຕ້ອງ​ໄດ້​ນຳ​ໃຊ້​ເປັນ​ຈຳ­ນວນ​ຫຼາຍ ຈຶ່ງ​ຈະ​ໃຫ້​ຜົນ​ການ​ຂ້າ​ເຊື້ອ​ພະ­ຍາດ​ໃນ​ດິນ ໂດຍ​ສະ­ເລ່ຍ​ແລ້ວ ການ​ໃຊ້​ສານ ແທມ​ໂຊ­ດຽມ ຕໍ່​ປີ​ໃນ​ປະ­ເທດ​ຝຣັ່ງ ນັ້ນ​ມີ​ສຽງ​ເຖິງ 700 ໂຕນ ແຕ່​ໃນ​ທີ່​ສຸດ ທາງ​ການ​ຂອງ​ຝຣັ່ງ ໄດ້​ຄົ້ນ​ພົບ​ຜົນ​ຮ້າຍ​ຂອງ​ສານ​ດັ່ງ­ກ່າວ ທີ່​ມີ​ຕໍ່​ສຸ­ຂະ­ພາບ​ຂອງ​ບັນ­ດາ​ຊາວ​ກະ­ສິ­ກອນ​ຢູ່​ຕາມ​ຟາມ ເຮັດ​ໃຫ້​ເກີດ​ອາ­ການ​ແສບ​ຕາ ແສບ​ຄໍ ຫາຍ­ໃຈ​ລຳ­ບາກ ສ່ວນ​ຢູ່​ສະ­ຫະ­ລັດ​ອາ​ເມ​ຣິ​ກາ​ນັ້ນ ສຳ­ນັກ­ງານ​ຄຸ້ມ​ຄອງ​ສິ່ງ­ແວ­ດລ້ອມ ກໍ່​ໄດ້ ອອກ​ມາ​ລະ­ບຸ​ວ່າ ສານ​ແທມ​ໂຊ­ດຽມ ທີ່​ໃຊ້​ເປັນ​ສ່ວນ​ປະ­ສົມ​ຢາ​ຂ້າ​ແມງ­ໄມ້​ນັ້ນ ອາດ​ເປັນ “ສານ​ກໍ່​ມະ​ເຮັງ​ໃນ​ມະ­ນຸດ” ໄດ້​ຢາ​ຂ້າ​ແມງ­ໄມ້​ທີ່​ມີ​ສ່ວນ​ປະ­ສົມ​ຂອງ​ສານ​ແທມ​ໂຊ­ດຽມ​ນີ້ ມີ​ຫຼາຍ​ຍີ່­ຫໍ້ ເຊັ່ນ: ວາ​ປາມ (Vapam) ແລະ ເຊັກ​ຕາ​ກອນ (Sectagon) ທີ່​ໄດ້​ຮັບ​ອະ­ນຸ­ຍາດ​ໃຫ້​ໃຊ້​ໃນ​ເອີ​ຣົບ ໄດ້​ເຖິງ​ປີ 2022 ກ່ອນ​ຈະ​ມີ​ການ​ທົບ​ທວນ​ດ້ານ​ຄວາມ​ປອດ​ໄພ​ຄືນ­ໃໝ່.

    ທີ່ ມາ​ເລ​ເຊຍ: ເຊັ່ນ​ດຽວ​ກັບ​ຢູ່​ປະ­ເທດ​ຝຣັ່ງ ລັດ­ຖະ­ບານ​ປະ­ເທດ​ມາ​ເລ​ເຊຍ ໄດ້​ໃຫ້​ຄວາມ​ສຳ­ຄັນ​ເປັນ​ພິ­ເສດ ເລື່ອງ​ສຸ­ຂະ­ພາບ​ຂອງ​ພົນ­ລະ­ເມືອງ ກ່ຽວ​ກັບ​ບັນ­ຫາ​ນີ້ ໄດ້​ມີ​ຂ່າວ​ອອກ​ມາ​ໃນ​ຕົ້ນ ເດືອນ​ພະ­ຈິກ​ນີ້​ວ່າ: ທາງ​ການ​ຂອງ​ປະ­ເທດ​ນີ້​ພວມ​ກຽມ​ພິ­ຈາ­ລະ­ນາ ຂຶ້ນ​ພາ­ສີ​ເຄື່ອງ​ດື່ມ​ທີ່​ມີ​ລົດ​ຫວານ​ເກີນ​ກຳ­ນົດ​ທີ່​ເປັນ​ສາ­ເຫດ​ກໍ່­ໃຫ້­ເກີດ​ພະ­ຍາດ​ຕຸ້ຍ ພະ­ຍາດ​ເບົາ­ຫວານ ກໍ່​ຄື ພະ­ຍາດ​ທີ່​ບໍ່​ຕິດ­ຕໍ່​ອື່ນໆ ສ່ວນ​ຢູ່​ບັນ­ດາ​ປະ­ເທດ​ໃກ້​ຄຽງ ເຊັ່ນ: ບຼູ​ໄນ ໄທ ແລະ ຟີ​ລິບ​ປິນ ນັ້ນ ກໍ່​ໄດ້​ມີ​ການ​ເກັບ​ພາ­ສີ ເຄື່ອງ​ດື່ມ​ລົດ​ຫວານ ມາ​ກ່ອນ​ແລ້ວ ເປົ້າ​ໝາຍ​ຂອງ​ມາດ​ຕະ­ການ​ຂຶ້ນ​ພາ­ສີ​ເຄື່ອງ​ດື່ມ ລົດ​ຫວາ​ນີ້ ແມ່ນ​ເພື່ອ​ສົ່ງ­ເສີມ​ສຸ­ຂະ­ພາບ​ຂອງ​ປະ­ຊາ­ຊົນ ມາດ​ຕະ­ການ​ຂຶ້ນ​ພາ­ສີ ຈະ​ຢູ່​ພາຍ​ໃຕ້​ການ​ຄຸ້ມ​ຄອງ ແລະ ຕິດ­ຕາມ​ກວດ​ຂອງ​ກະ­ຊວງ​ສາ­ທາ­ລະ­ນະ​ສຸກ ພາຍ­ຫຼັງ​ລັດ­ຖະ­ບານ​ໄດ້​ຕົກ­ລົງ​ເຫັນ​ດີ​ປະ­ກາດ​ໃຊ້​ຢ່າງ​ເປັນ​ທາງ​ການ.

ຂ່າວທີ່ກ່ຽວຂ້ອງ