ລັດຍັງຕ້ອງນຳໃຊ້ທຶນ 4.000 ຕື້ກວ່າກີບ ເພື່ອຟື້ນຟູຜົນເສຍຫາຍຈາກໄພພິບັດ

452 27 ພ.ຈ. 2018 ຂ່າວໜ້າ​ໜຶ່ງ

    ປີ 2018 ເປັນ​ປີ​ທີ່ ສປປ ລາວ ໄດ້​ຮັບ​ຜົນ​ກະ­ທົບ​ຈາກ​ໄພ­ພິ­ບັດ​ທຳ​ມະ​ຊາດ (ນ້ຳ​ຖ້ວມ) ໜັກ​ສົມ­ຄວນ ເຊິ່ງ​ມີ 124 ເມືອງ 2.382 ບ້ານ 126.619 ຄອບ­ຄົວ 616.477 ຄົນ ເສຍ​ຊີ­ວິດ 60 ຄົນ ສູນ­ຫາຍ 30 ຄົນ ແລະ ສ້າງ​ຄວາມ​ເສຍ​ຫາຍ​ໃຫ້​ທີ່​ພັກ​ພາ​ອາ­ໄສ​ຂອງ​ປະ­ຊາ­ຊົນ ສັງ­ຄົມ ແລະ ສິ່ງ­ແວ­ດລ້ອມ ພື້ນ­ຖານ​ໂຄງ​ລ່າງ​ດ້ານ​ເສດ­ຖະ­ກິດ ມູນ​ຄ່າ​ເສຍ​ຫາຍ​ກວ່າ 3.000 ຕື້​ກີບ ເຊິ່ງ​ການ​ປະ​ເມີນ​ມູນ​ຄ່າ​ກ່ຽວ​ກັບ​ການ​ກໍ່­ສ້າງ​ປັບ­ປຸງ ແລະ ຟື້ນ​ຟູ​ໃຫ້​ກັບ​ຄືນ​ສູ່​ສະ­ພາບ​ປົກ­ກະ­ຕິ ລັດ­ຖະ­ບານ​ຍັງ​ຕ້ອງ​ໃຊ້​ງົບ­ປະ­ມານ 4.000 ຕື້​ກວ່າ​ກີບ.

    ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ (ຮສສ) ປະ­ທານ​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ແຫ່ງ​ຊາດ ກ່າວ​ໃນ​ກອງ​ປະ­ຊຸມ​ສະ­ຫຼຸບ​ຖອດ​ຖອນ​ບົດ­ຮຽນ ກ່ຽວ​ກັບ​ການ​ແກ້​ໄຂ​ໄພ­ພິ­ບັດ​ທົ່ວ​ປະ­ເທດ ໃນ​ວັນ​ທີ 26 ພະ­ຈິກ 2018 ວ່າ: ປີ 2018 ລາວ​ໄດ້​ຮັບ​ຜົນ​ກະ­ທົບ​ຈາກ​ໄພ­ພິ­ບັດ​ທຳ​ມະ​ຊາດ​ໜັກ­ໜ່ວງ ໂດຍ​ສະ­ເພາະ​ເຫດ­ການ​ສັນ​ອ່າງ­ເກັບ­ນ້ຳ ສຳ­ຮອງ​ເຂື່ອນ​ເຊ​ປຽນ-ເຊ​ນ້ຳ​ນ້ອຍ​ແຕກ​ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ເຮັດ​ໃຫ້​ລັດ­ຖະ­ບານ​ປະ­ກາດ​ແຈ້ງ​ການ​ເອົາ​ເຂດ​ດັ່ງ­ກ່າວ ເປັນ​ເຂດ​ປະ­ສົບ​ໄພ­ພິ­ບັດ​ສຸກ​ເສີນ​ລະ­ດັບ​ຊາດ ພ້ອມ​ທັງ​ແຕ່ງ­ຕັ້ງ​ຄະ­ນະ​ຮັບ­ຜິດ­ຊອບ​ສະ­ເພາະ​ກິດ ເພື່ອ​ການ​ປະ­ສານ​ງານ​ທີ່​ສອດ­ຄ່ອງ ວ່ອງ­ໄວ ແລະ ແທດ­ເໝາະ​ກັບ​ຕົວ​ຈິງ ປັດ­ຈຸ­ບັນ​ເມືອງ​ສະ­ໜາມ​ໄຊ ຍັງ​ມີ​ຜູ້​ປະ­ສົບ​ໄພ 4.700 ກວ່າ​ຄົນ ຕ້ອງ​ໄດ້​ອາ­ໄສ​ຢູ່​ສະ­ຖານ­ທີ່​ພັກ­ຊົ່ວ­ຄາວ ວຽກ​ງານ​ຮັບ​ບໍ­ລິ­ຈາກ ແລະ ການ​ຊ່ວຍ­ເຫຼືອ​ຈາກ​ສາ­ກົນ ເລີ່ມ​ແຕ່​ວັນ​ທີ 24 ກໍ­ລະ­ກົດ 2018 ເປັນ­ຕົ້ນ​ມາ ສາ­ມາດ​ລະ­ດົມ​ທຶນ​ໄດ້​ຜ່ານ​ກະ­ຊວງ ຮສສ ໄດ້ 20.885.023.521 ກີບ 93.323.432,79 ບາດ 14.188.881,26 ໂດ​ລາ​ສະ­ຫະ­ລັດ ນອກ​ນີ້ ຍັງ​ມີ​ວັດ­ຖຸ​ອຸ­ປະ­ກອນ​ເຄື່ອງ­ນຸ່ງ​ຫົ່ມ​ອີກ​ຈຳ­ນວນ​ຫຼາຍ ໂດຍ​ຄະ­ນະ​ກຳ­ມະ­ການ​ຮັບ­ຜິດ­ຊອບ ໄດ້​ຈັດ​ສົ່ງ​ສູ່​ສະ­ຖານ­ທີ່​ປະ­ສົບ​ໄພ​ຢ່າງ​ຕໍ່​ເນື່ອງ.

    ສຳ­ລັບ​ແຜນ​ຟື້ນ​ຟູ​ຫຼັງ​ໄພ­ພິ­ບັດ ລັດ­ຖະ­ບານ​ມີ​ແຜນ​ແກ້​ໄຂ​ຟື້ນ​ຟູ​ທັງ​ໄລ­ຍະ​ສັ້ນ-ຍາວ​ນານ ແຕ່​ລະ​ດ້ານ​ຄື: ຂະ­ແໜງ​ສັງ­ຄົມ ຕ້ອງ­ການ​ງົບ­ປະ­ມານ 350,10 ຕື້​ກີບ ຂະ­ແໜງ­ການ​ຜະ­ລິດ 400,35 ຕື້​ກີບ ຂະ­ແໜງ­ການ​ໂຄງ​ລ່າງ​ພື້ນ­ຖານ 2.435,35 ຕື້​ກີບ ແລະ ຂະ­ແໜງ​ອື່ນໆ​ກ່ຽວ­ຂ້ອງ ລວມ​ທັງ​ລະ­ເບີດ​ບໍ່​ທັນ​ແຕກ​ຕົກ​ຄ້າງ 1.237,06 ຕື້​ກີບ ລວມ​ມູນ​ຄ່າ​ທັງ​ໝົດ​ທີ່​ຕ້ອງ­ການ​ຟື້ນ​ຟູ 4.422,86 ຕື້​ກີບ ໃນ​ນີ້ ໄລ­ຍະ​ສັ້ນ 1.331,47 ຕື້​ກີບ ໄລ­ຍະ​ກາງ 1.107,65 ຕື້​ກີບ ແລະ ໄລ­ຍະ​ຍາວ 2.001,74 ຕື້​ກີບ.

    ກອງ​ປະ­ຊຸມ​ດັ່ງ­ກ່າວ ຈັດ​ຂຶ້ນ​ວັນ​ທີ 26 ພະ­ຈິກ 2018 ຢູ່​ຫໍ​ປະ­ຊຸມ​ແຫ່ງ​ຊາດ ໂດຍ​ເປັນ​ປະ­ທານ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ​ສະ­ເພາະ​ກິດ ແກ້​ໄຂ​ໄພ­ພິ­ບັດ​ລະ­ດັບ​ຊາດ ມີ​ລັດ­ຖະ­ມົນ­ຕີ ແລະ ບັນ­ດາ​ຄະ­ນະ​ກຳ­ມະ­ການ​ແກ້​ໄຂ​ໄພ­ພິ­ບັດ​ຂັ້ນ​ສູນ​ກາງ ແລະ ທ້ອງ­ຖິ່ນ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ