ທັດສະນະສຶກສາ ຟາມພັນເພັດ ຕົວແບບດ້ານການຜະລິດກະສິກຳ

327 25 ພ.ຈ. 2018 ຂ່າວໜ້າ​ໜຶ່ງ
ທັດສະນະສຶກສາ ຟາມພັນເພັດ ຕົວແບບດ້ານການຜະລິດກະສິກຳ

    ຄະ­ນະ​ຜູ້​ແທນ​ກອງ​ປະ­ຊຸມ​ອາ­ຊີ­ວະ​ສຶກ​ສາ ລະ­ດັບ​ພາກ​ພື້ນ 60 ຄົນ ຈາກ 16 ປະ­ເທດ ໄປ​ຢ້ຽມ­ຢາມ​ທັດ­ສະ­ນະ​ສຶກ​ສາ​ຢູ່​ບໍ­ລິ­ສັດ ພັນ​ເພັດ​ພັດ­ທະ­ນາ​ກະ­ສິ­ກຳ ຈຳ­ກັດ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ວັນ​ທີ 20 ພະ­ຈິກ 2018 ໃນ​ໂອ­ກາດ​ເດີນ­ທາງ​ມາ​ເຂົ້າ​ຮ່ວມ​ກອງ​ປະ­ຊຸມ​ຢູ່​ນະ­ຄອນ­ຫຼວງ​ວຽງ​ຈັນ ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ທອງ​ສະ­ຫວັນ ມີ​ບຸນ ປະ­ທານ​ບໍ­ລິ­ສັດ ພັນ​ເພັດ​ພັດ­ທະ­ນາ​ກະ­ສິ­ກຳ ຈຳ­ກັດ.

    ບໍ­ລິ­ສັດ ພັນ​ເພັດ​ພັດ­ທະ­ນາ​ກະ­ສິ­ກຳ ຈຳ­ກັດ ເປັນ​ບໍ­ລິ­ສັດ​ຕົວ​ແບບ​ດ້ານ​ການ​ຜະ­ລິດ​ກະ­ສິ­ກຳ​ຄົບ​ວົງ​ຈອນ ເຊິ່ງ​ຢູ່​ຟາມ​ມີ​ເນື້ອ­ທີ່ 30 ກວ່າ​ເຮັກ­ຕາ ໂດຍ​ໄດ້​ຈັດ​ແບ່ງ​ເປັນ​ຫຼາຍ​ເຂດ​ເພື່ອ​ຜະ­ລິດ​ປູກ­ຝັງ-ລ້ຽງ­ສັດ ເປັນ­ຕົ້ນ ເນື້ອ­ທີ່​ຜະ­ລິດ​ແນວ​ພັນ​ເຂົ້າ​ຮຸ່ນ 3 ໜອງ​ປາ ປູກ​ຜັກ​ປອດ​ສານ­ພິດ ລ້ຽງ​ໝູ​ປ່າ ປູກ​ເຫັດ ໂຮງ​ອົບ​ເຂົ້າ ສາງ​ເກັບ​ມ້ຽນ​ເຂົ້າ ແລະ ອື່ນໆ ໂດຍ​ບໍ­ລິ­ສັດ​ຍັງ​ໄດ້​ສົ່ງ­ເສີມ​ຊາວ​ກະ­ສິ­ກອນ​ເຂດ​ເມືອງ​ຫາດ​ຊາຍ​ຟອງ ປູກ​ເຂົ້າ​ສອງ​ລະ­ດູ ປູກ​ຕະ­ກຸນ​ຖົ່ວ ແລະ ປູກ​ໝາກ­ພ້າວ​ຫອມ ໃນ​ເນື້ອ­ທີ່​ຫຼາຍ​ຮ້ອຍ​ເຮັກ­ຕາ​ຢ່າງ​ມີ​ປະ​ສິດ­ທິ​ຜົນ ຈຶ່ງ​ເຮັດ​ໃຫ້​ບໍ­ລິ­ສັດ​ກາຍ­ເປັນ​ຕົວ​ແບບ​ດ້ານ​ການ​ຜະ­ລິດ​ກະ­ສິ­ກຳ ໄລ­ຍະ​ຜ່ານ​ມາ ໄດ້​ມີ​ການ​ນຳ​ພັກ-ລັດ​ຂັ້ນ​ສູງ ຄະ­ນະ​ຜູ້​ແທນ​ຈາກ​ຕ່າງ­ປະ­ເທດ ຊາວ​ກະ­ສິ­ກອນ​ທົ່ວ​ປະ­ເທດ ແລະ ພາກ­ສ່ວນ​ຕ່າງໆ​ມາ​ທັດ­ສະ­ນະ​ສຶກ​ສາ ແລະ ແລກ­ປ່ຽນ​ຖອດ​ຖອນ​ບົດ­ຮຽນ​ດ້ານ​ການ​ຜະ­ລິດ​ກະ­ສິ­ກຳ​ຢູ່​ຟາມ​ຂອງ​ບໍ­ລິ­ສັດ​ຈຳ­ນວນ​ຫຼາຍ ຄະ­ນະ​ຜູ້​ແທນ​ກອງ​ປະ­ຊຸມ​ອາ­ຊີ­ວະ​ສຶກ​ສາ​ລະ­ດັບ​ພາກ​ພື້ນ​ຄັ້ງ​ນີ້ ກໍ່​ເປັນ​ຄະ­ນະ​ໜຶ່ງ​ທີ່​ໃຫ້​ຄວາມ​ສົນ­ໃຈ​ການ​ຜະ­ລິດ​ກະ­ສິ­ກຳ​ຢູ່​ລາວ ທີ່​ນຳ​ໃຊ້​ກົນ​ຈັກ​ກະ­ສິ­ກຳ​ທັນ​ສະ­ໄໝ​ເຂົ້າ​ຊ່ວຍ​ເພື່ອ​ຫຼຸດ­ຜ່ອນ​ຕົ້ນ​ທຶນ ແລະ ແຮງ​ງານ​ຄົນ.

    ຜ່ານ​ການ​ລົງ​ຢ້ຽມ­ຢາມ​ຕົວ​ຈິງ ໄດ້​ສ້າງ​ຄວາມ​ສົນ­ໃຈ​ໃຫ້​ຄະ­ນະ​ຜູ້​ແທນ ເຊິ່ງ​ຄົນ​ລາວ​ກໍ່​ມີ​ການ​ພັດ­ທະ­ນາ​ດ້ານ​ການ​ຜະ­ລິດ​ກະ­ສິ­ກຳ​ທັນ​ສະ­ໄໝ ເຊັ່ນ​ດຽວ​ກັນ​ກັບ​ປະ­ເທດ​ທີ່​ມີ​ການ​ພັດ­ທະ­ນາ ແລະ ມີ​ຄວາມ​ເຊື່ອ​ໝັ້ນ​ວ່າ​ໃນ​ອະ­ນາ­ຄົດ​ບໍ­ລິ­ສັດ ຈະ​ປະ­ສົບ​ຜົນ­ສຳ­ເລັດ​ເປັນ​ກ້າວໆ ໃນ​ການ​ຜະ­ລິດ​ກະ­ສິ­ກຳ​ຮູບ​ແບບ​ໃໝ່ ທີ່​ຈະ​ເປັນ​ຕົວ​ແບບ​ທີ່​ດີ​ໃຫ້​ແກ່​ຊາວ​ກະ­ສິ­ກອນ​ລາວ.

ຂ່າວທີ່ກ່ຽວຂ້ອງ