ປະທານບໍລິສັດ ພີເອັສ ຮັບໂທດຈຳຄຸກ 15 ປີ ແລະ ທົດແທນຄ່າເສຍຫາຍ 1.000 ຕື້ກວ່າກີບ

379 25 ພ.ຈ. 2018 ຂ່າວໜ້າ​ໜຶ່ງ
ປະທານບໍລິສັດ ພີເອັສ ຮັບໂທດຈຳຄຸກ 15 ປີ ແລະ ທົດແທນຄ່າເສຍຫາຍ 1.000 ຕື້ກວ່າກີບ

    ນາງ ສຸກ​ນາ­ລີ ເທບ​ສີ​ເມືອງ ປະ­ທານ​ບໍ­ລິ­ສັດ ພີ​ເອັສ (ຈຳ­ເລີຍ1) ແລະ ທ້າວ ປໍ​ເຮີ (ຈຳ­ເລີຍ 2) ຖືກ​ສານ​ຕັດ­ສິນ​ຈຳ​ຄຸກ​ຄົນ​ລະ 15 ປີ ພ້ອມ​ໃຊ້​ແທນ​ຄ່າ​ເສຍ​ຫາຍ​ໃຫ້​ໂຈດ​ທາງ​ແພ່ງ 237.772 ຄົນ ມູນ​ຄ່າ 1.000.412.000.000 ກີບ ໃນ​ສະ­ຖານ​ສໍ້​ໂກງ​ຊັບ​ພົນ­ລະ­ເມືອງ ໂຄ­ສະ­ນາ​ຕ້ານ ສປປ ລາວ ເຕົ້າ­ໂຮມ​ກຸ່ມ​ຄົນ​ເພື່ອ​ສ້າງ​ຄວາມ​ປັ່ນ​ປ່ວນ ຊື້-ຂາຍ​ອາ­ວຸດ​ເສິກ​ຜິດ​ກົດ­ໝາຍ ຄອບ​ຄອງ​ຊິ້ນ​ສ່ວນ​ສັດ­ປ່າ​ປະ­ເພດ​ຫວງ​ຫ້າມ ແລະ ຟອກ​ເງິນ.

    ວັນ​ທີ 21 ພະ­ຈິກ 2018 ຄະ­ນະ​ສານ​ອາ­ຍາ​ຂັ້ນ​ຕົ້ນ ນະ­ຄອນ­ຫຼວງ​ວຽງ​ຈັນ ຕັດ­ສິນ​ລົງ­ໂທດ​ຕັດ​ອິດ­ສະ­ຫຼະ­ພາບ​ນາງ ສຸກ​ນາ­ລີ ເທບ​ສີ​ເມືອງ ຈຳ​ຄຸກ 29 ປີ ແລະ ທ້າວ ປໍ​ເຮີ ຈຳ​ຄຸກ 27 ປີ ແຕ່​ອີງ​ຕາມ​ຫຼັກ­ການ​ຂອງ​ມາດ­ຕາ 45 ວັກ 2 ກົດ­ໝາຍ​ອາ­ຍາ​ສະ­ບັບ​ປັບ­ປຸງ​ປີ 2005 ສານ​ໄດ້​ໃຫ້​ນາງ ສຸກ​ນາ­ລີ ເທບ​ສີ​ເມືອງ ປະ­ຕິ­ບັດ​ໂທດ​ຕົວ​ຈິງ 15 ປີ ພ້ອມ​ປັບ​ໃໝ 2.846.000.000 ກີບ ແລະ ທ້າວ ປໍ​ເຮີ ປະ­ຕິ­ບັດ​ໂທດ​ຕົວ​ຈິງ 15 ປີ ພ້ອມ​ປັບ​ໃໝ 2.816.000.000 ກີບ ພ້ອມ​ນີ້​ຍັງ​ຕັດ­ສິນ​ລົງ­ໂທດ​ພະ­ນັກ­ງານ​ພາຍ​ໃນ​ບໍ­ລິ­ສັດ ພີ​ເອັສ ຄື: ທ້າວ ຈັນ​ຄຳ ພູ​ມະ­ນີ​ວົງ ຈຳ​ຄຸກ 3 ປີ 3 ເດືອນ ພ້ອມ​ປັບ​ໃໝ 6 ລ້ານ​ກີບ ຂໍ້​ຫາ​ມີ​ອາ­ວຸດ​ເສິກ​ຜິດ​ກົດ­ໝາຍ ແລະ ສໍ້​ໂກງ​ຊັບ​ພົນ­ລະ­ເມືອງ ທ້າວ ອາ​ນົງ​ສັກ ພົງ​ສະ​ຫວັດ ຈຳ​ຄຸກ 12 ປີ 3 ເດືອນ ພ້ອມ​ປັບ​ໃໝ 704 ລ້ານ​ກີບ ຂໍ້​ຫາ​ສໍ້​ໂກງ​ຊັບ​ພົນ­ລະ­ເມືອງ ແລະ ຟອກ​ເງິນ ທ້າວ ໄມ​ວັນ ພູ​ມະ­ນີ​ວົງ ຈຳ​ຄຸກ 2 ປີ 6 ເດືອນ ພ້ອມ​ປັບ​ໃໝ 5 ລ້ານ​ກີບ ຂໍ້​ຫາ​ສໍ້​ໂກງ​ຊັບ​ພົນ­ລະ­ເມືອງ ທ້າວ ຄຳ​ສິງ ພູ​ມະ­ນີ​ວົງ ຈຳ​ຄຸກ 3 ປີ 3 ເດືອນ ພ້ອມ​ປັບ​ໃໝ 7 ລ້ານ​ກີບ ຂໍ້​ຫາ​ຊື້-ຂາຍ​ອາ­ວຸດ​ເສິກ​ຜິດ​ກົດ­ໝາຍ ແລະ ສໍ້​ໂກງ​ຊັບ​ພົນ­ລະ­ເມືອງ ທ້າວ ໄຊ​ຊົງ ຈຳ​ຄຸກ 4 ປີ 9 ເດືອນ ພ້ອມ​ປັບ​ໃໝ 26 ລ້ານ​ກີບ ທ້າວ ບຸນ​ທຳ ຈຳ​ຄຸກ 5 ປີ ພ້ອມ​ປັບ​ໃໝ 27 ລ້ານ​ກີບ ທ້າວ ແກ້ວ ຈຳ​ຄຸກ 5 ປີ ພ້ອມ​ປັບ​ໃໝ 28 ລ້ານ​ກີບ ນາງ ຈັນ​ສະ­ໝອນ ແກ້ວ​ມະ­ນີ ຈຳ​ຄຸກ 5 ປີ ພ້ອມ​ປັບ​ໃໝ 27 ລ້ານ​ກີບ (ທັງ 4 ຈຳ­ເລີຍ) ຢູ່​ໃນ​ຂໍ້​ຫາ​ເຕົ້າ­ໂຮມ​ກຸ່ມ​ຄົນ​ເພື່ອ​ສ້າງ​ຄວາມ​ປັ່ນ​ປ່ວນ ແລະ ສໍ້​ໂກງ​ຊັບ​ພົນ­ລະ­ເມືອງ ທ້າວ ໄຊ​ດວງ​ສີ ຊົງ​ຈື ຈຳ​ຄຸກ 4 ປີ 6 ເດືອນ ພ້ອມ​ປັບ​ໃໝ 25 ລ້ານ​ກີບ ຂໍ້​ຫາ​ໂຄ­ສະ­ນາ​ຕ້ານ ສປປ ລາວ ແລະ ສໍ້​ໂກງ​ຊັບ​ພົນ­ລະ­ເມືອງ ທ້າວ ໄຈ​ເຮີ ຈຳ​ຄຸກ 5 ປີ ພ້ອມ​ປັບ​ໃໝ 30 ລ້ານ​ກີບ ຂໍ້​ຫາ​ໂຄ­ສະ­ນາ​ຕ້ານ ສປປ ລາວ ເຕົ້າ­ໂຮມ​ກຸ່ມ​ຄົນ​ເພື່ອ​ສ້າງ​ຄວາມ​ປັ່ນ​ປ່ວນ ແລະ ສໍ້​ໂກງ​ຊັບ​ພົນ­ລະ­ເມືອງ.

    ສຳ­ລັບ​ວັດ­ຖຸ​ຊັບ​ສິນ​ຕ່າງໆ​ເຊັ່ນ: ເງິນ ທີ່​ດິນ ອາ­ຄານ ພາ­ຫະ­ນະ ກົນ​ຈັກ ແລະ ອື່ນໆ​ຂອງ​ພວກ​ກ່ຽວ ທີ່​ເຈົ້າ​ໜ້າ­ທີ່​ໄດ້​ກວດ­ກາ​ລະ­ອຽດ​ແລ້ວ ໄດ້​ອາ​ຍັດ ແລະ ຢຶດ​ໄວ້​ນັ້ນ ສານ​ໄດ້​ຕັດ­ສິນ​ນຳ​ເອົາ​ວັດ­ຖຸ​ຊັບ​ສິນ​ດັ່ງ­ກ່າວ ມາ​ປະ­ຕິ­ບັດ​ພາງ​ໃຊ້​ແທນ​ໃຫ້​ບັນ­ດາ​ໂຈດ​ທາງ​ແພ່ງ​ຕາມ​ລະ­ບຽບ​ກົດ­ໝາຍ.

ຂ່າວທີ່ກ່ຽວຂ້ອງ