ຂ່າວຫຼ້າສຸດ

ຫວ້ານລືສີ ຢາພື້ນເມືອງທີ່ມີປະສິດທິຜົນໃນການແກ້ປວດເມື່ອຍ

219 25 ພ.ຈ. 2018 ຂ່າວໜ້າ​ໜຶ່ງ
ຫວ້ານລືສີ ຢາພື້ນເມືອງທີ່ມີປະສິດທິຜົນໃນການແກ້ປວດເມື່ອຍ

    ບຸນ​ນະ­ມັດ­ສະ­ການ​ພະ​ທາດ­ຫຼວງ ແລະ ວາງ­ສະ­ແດງ​ສິນ­ຄ້າ ໂອ­ກາດ​ບຸນ​ດັ່ງ­ກ່າວ ເປັນ​ຕະ­ຫຼາດ​ທີ່​ເປີດ​ກວ້າງ​ໃຫ້​ນັກ­ທຸ­ລະ­ກິດ ໂຮງ​ຈັກ ໂຮງ­ງານ ໄດ້​ນຳ​ເອົາ​ສິນ­ຄ້າ​ມາ​ວາງ­ສະ­ແດງ ແລະ ຈຳ­ໜ່າຍ ເຊິ່ງ​ນອກ­ຈາກ​ບັນ­ດາ​ຫ້າງ​ຮ້ານ ຫົວ­ໜ່ວຍ​ທຸ­ລະ​ກິດ​ໃຫຍ່ໆ​ແລ້ວ ຍັງ​ມີ​ອີກ​ຫຼາຍ​ຫົວ­ໜ່ວຍ​ທຸ­ລະ​ກິດ​ຄອບ­ຄົວ​ທີ່​ສ້າງ​ຂຶ້ນ​ດ້ວຍ​ກຳ­ລັງ​ແຮງ​ງານ ຫົວ­ຄິດ ແລະ ພູມ​ປັນ­ຍາ​ທ້ອງ­ຖິ່ນ ເພື່ອ​ປະ­ດິດ​ສ້າງ​ຂຶ້ນ​ເປັນ​ສິນ­ຄ້າ ແນ­ໃສ່​ສ້າງ​ລາຍ​ຮັບ ແລະ ຍົກ​ສູງ​ຄຸ­ນະ­ພາບ​ຊີ­ວິດ​ໃຫ້​ນັບ​ມື້​ດີ​ຂຶ້ນ.

    ທ່ານ ຕ່າຍ ເທບ​ພະ​ວົງ ປະ­ຊາ­ຊົນ​ບ້ານ​ໂນນ​ສະ­ຫວ່າງ ເມືອງ​ວຽງ​ຄຳ ແຂວງ​ວຽງ​ຈັນ ອະ­ດີດ​ພະ­ນັກ­ງານ​ຫ້ອງ​ສະ­ໝຸດ​ເມືອງ​ປາກ​ກະ­ດິງ ແຂວງ​ບໍ​ລິ​ຄຳ​ໄຊ ກໍ່​ເປັນ​ອີກ​ໜຶ່ງ​ຄົນ​ທີ່​ຫັນ​ມາ​ສ້າງ​ທຸ­ລະ​ກິດ​ຄອບ­ຄົວ ສ້າງ​ຄວາມ​ເຂັ້ມ­ແຂງ​ດ້ວຍ​ຕົນ​ເອງ ເພິ່ງ​ຕົນ​ເອງ ຕາມ​ແນວ­ທາງ​ນະ­ໂຍ­ບາຍ​ທີ່​ຂັ້ນ​ເທິງ​ວາງ​ອອກ ດ້ວຍ​ການ​ຜະ­ລິດ​ຢາ­ພື້ນ­ເມືອງ​ປະ­ເພດ​ຢາ​ນວດ ຢາ​ຄັ້ນ​ເສັ້ນ ກາ​ໝາຍ​ຫວ້ານ​ລື​ສີ ໂດຍ​ທ່ານ​ກ່າວ​ວ່າ: ເນື່ອງ​ຈາກ​ໄດ້​ມີ​ໂອ­ກາດ​ເດີນ­ທາງ​ໄປ​ປະ­ເທດ​ເພື່ອນ​ບ້ານ ແລະ ເຫັນ​ເຖິງ​ຄວາມ​ໝາຍ​ຄວາມ​ສຳ­ຄັນ​ຂອງ​ຢາ­ພື້ນ­ເມືອງ​ວ່າ ສາ­ມາດ​ສ້າງ​ລາຍ​ຮັບ​ເຂົ້າ​ຄອບ­ຄົວ​ໄດ້​ດີ ຖ້າ​ເຮົາ​ຮູ້­ຈັກ​ວິ­ທີ​ທີ່​ຖືກ­ຕ້ອງ ແລະ ມີ​ການ​ວາງ​ແຜນ­ການ​ຕະ­ຫຼາດ​ຢ່າງ​ຊັດ​ເຈນ ຫວ້ານ​ລື​ສີ ກໍ່​ເປັນ​ອີກ​ຢາ­ພື້ນ­ເມືອງ​ທີ່​ສຳ­ຄັນ ແລະ ຫຼາຍ​ຄົນ​ຄົງ​ຮັບ​ຮູ້​ເຖິງ​ສັບ­ພະ​ຄຸນ​ໃນ​ການ​ບຳ­ລຸງ​ຮ່າງ­ກາຍ ແກ້​ປວດ​ເມື່ອຍ​ຕາມ​ຕົນ​ໂຕ ມີ​ຄວາມ​ສາ­ມາດ​ໃນ​ການ​ຄາຍ​ເສັ້ນ​ຜ່ອນ­ຄາຍ ປິ່ນ​ປົ່ວ​ບາດ­ແຜ​ພາຍ​ນອກ​ໄດ້​ເປັນ​ຢ່າງ​ດີ ບຸນ­ທາດ­ຫຼວງ​ປີ​ນີ້ ນອກ­ຈາກ​ໄດ້​ນຳ​ເອົາ​ຢາ­ພື້ນ­ເມືອງ​ຫວ້ານ​ລື​ສີ­ມາ​ວາງ­ສະ­ແດງ ແລະ ຈຳ­ໜ່າຍ​ແລ້ວ ຍັງ​ໄດ້​ນຳ​ເອົາ​ຢາ­ພື້ນ­ເມືອງ​ທີ່​ມີ​ຄຸ­ນະ­ພາບ ໂດຍ​ສະ­ເພາະ ຢາ​ແກ້ ຫຼື ປິ່ນ​ປົ່ວ​ພະ­ຍາດ​ແມ່­ຍິງ ຜະ­ລິດ​ຕະ​ພັນ​ຢາ­ພື້ນ­ເມືອງ​ທີ່​ຊ່ວຍ​ໃນ​ການ​ປູກ​ຜົມ​ໃຫ້​ເສັ້ນ​ຜົມ​ແຂງ­ແຮງ​ງາມ​ຂຶ້ນ ໂດຍ​ທຸກ​ຜະ­ລິດ​ຕະ​ພັນ​ແມ່ນ​ໃຊ້​ວັດ­ຖຸ​ທີ່​ຫາ​ໄດ້​ຕາມ​ທຳ​ມະ​ຊາດ ແລະ ຜ່ານ​ການ​ກວດ­ກາ​ຈາກ​ເຈົ້າ​ໜ້າ­ທີ່​ກ່ຽວ­ຂ້ອງ​ຄົບ​ຖ້ວນ.

    ສຳ­ລັບ​ບຸນ­ທາດ­ຫຼວງ​ປີ​ນີ້ ເປັນ​ປີ​ທີ​ສອງ​ທີ່​ຂ້າ­ພະ­ເຈົ້າ​ນຳ​ເອົາ​ຜະ­ລິດ​ຕະ​ພັນ​ຢາ­ພື້ນ­ເມືອງ​ມາ​ວາງ­ສະ­ແດງ ແລະ ຈຳ­ໜ່າຍ ເຊິ່ງ​ໄດ້​ຮັບ​ການ​ຕອບ-ຮັບ​ດີ​ສົມ­ຄວນ​ຈາກ​ລູກ​ຄ້າ ເຊິ່ງ​ຄາດ​ວ່າ​ຈະ​ສາ­ມາດ​ສ້າງ​ລາຍ​ຮັບ​ເຂົ້າ​ຄອບ­ຄົວ​ຫຼາຍ​ລ້ານ​ກີບ ໂດຍ​ໃນ​ປີ­ຜ່ານ­ມາ ສາ­ມາດ​ສ້າງ​ລາຍ​ຮັບ​ຈາກ​ການ­ຈຳ­ໜ່າຍ​ຢູ່​ບຸນ​ພະ​ທາດ­ຫຼວງ 10 ລ້ານ​ກີບ ສຳ­ລັບ​ທ່ານ​ໃດ​ສົນ­ໃຈ​ກ່ຽວ​ກັບ​ຜະ­ລິດ​ຕະ​ພັນ​ຢາ­ພື້ນ­ເມືອງ ກໍ່​ສາ­ມາດ​ຢ້ຽມ​ຊົມ​ຮ້ານ​ໄດ້​ທີ່​ບຸນ​ນະ­ມັດ­ສະ­ການ​ພະ​ທາດ­ຫຼວງ​ວຽງ​ຈັນ ຫຼື ຕິດ­ຕໍ່​ໂດຍ​ກົງ​ໄດ້​ທີ່​ເບີ​ໂທ 020 23988833.

ຂ່າວທີ່ກ່ຽວຂ້ອງ