​ສປຊ ຮຽກຮ້ອງ​ໃຫ້​ຢຸດຕິ​ການ​ກະທຳ​ຮຸນ​ແຮງ​ຕໍ່​ແມ່ຍິງ ແລະ ເດັກນ້ອຍ​ເພດ​ຍິງ

127 22 ພ.ຈ. 2018 ຂ່າວຕ່າງປະເທດ
​ສປຊ ຮຽກຮ້ອງ​ໃຫ້​ຢຸດຕິ​ການ​ກະທຳ​ຮຸນ​ແຮງ​ຕໍ່​ແມ່ຍິງ ແລະ ເດັກນ້ອຍ​ເພດ​ຍິງ

    ທ່ານ ອັນໂຕ​ນີ​ໂອ ກູ​ເຕີ​ເຣ​​ສ ເລຂາທິການ​ໃຫຍ່​ສະຫະ​ປະຊາ​ຊາດ (​ສປຊ) ກ່າວ​ຢູ່​ໃນ ພິທີ​ລະນຶກ ວັນ​ສາກົນ​ລຶບລ້າງ​ການ​ກະທຳ​ຮຸນ​ແຮງ​ຕໍ່​ແມ່ຍິງ ຊຶ່ງ​ຈັດ​ຂຶ້ນ​ເມື່ອ​ວັນ​ທີ 19 ພະຈິກ​ນີ້​ວ່າ “ການ​ໃຊ້​ຄວາມ​ຮຸນ​ແຮງ​ຕໍ່​ແມ່ຍິງ ແລະ​ເດັກນ້ອຍ​ເພດ​ຍິງ ພາຍ​ໃຕ້​ຮູບ​ການ​ໃດໆ​ກໍ​ຕາມ ຕ່າງ​ກໍ​ເປັນ​ການສະແດງ​ອອກ ເຖິງ​ຄວາມ​ບໍ່​ນັບຖື​ຢ່າງ​ເລິກເຊິ່ງ ແລະ​ເປັນ​ການ​ບໍ່​ຍອມຮັບ​ຮູ້​ສິດທິ ສະເໝີພາບ​ທີ່​ມີ​ຢູ່​ແລ້ວ​ຂອງ​ແມ່ຍິງ.” ການ​ກະທຳ​ຮູນ​ແຮງ​ຕໍ່​ແມ່ຍິງ ເປັນ​ສາເຫດ​ຮ້າຍ​ແຮງ ທີ່​ພາໃຫ້​ເກີດ ຄວາມ​ເສຍ​ຫາຍ ແລະ​ຍິ່ງ​ໄປ​ກວ່າ​ນັ້ນ ຍັງ​ເປັນ​ການ​ນຳໄປ​ສູ່​ຄວາມ​ຕາຍ​ຂອງ​ແມ່ຍິງ​ຈຳນວນ​ຫຼາຍ ທີ່ຢູ່​ໃນ​ໄວ​ໜຸ່ມ​ນ້ອຍ.

    ​ສປຊ ລະນຶກ​ວັນ​ສາກົນ​ລຶບລ້າງ​ການ​ກະທຳ​ຮຸນ​ແຮງ​ຕໍ່​ແມ່ຍິງ ໃນ​ວັນ​ທີ 25 ພະຈິກ​ຂອງ​ທຸກໆ​ປີ. ໃນ​ປີ​ນີ້ ເຫດການ​ດັ່ງກ່າວ ມີ​ຂຶ້ນ​ພາຍ​ໃຕ້​ຫົວຂໍ້​ວ່າ “ຈົ່ງ​ທາ​ສີໝາກກ້ຽງ​ໃຫ້​ແກ່​ໂລກ: ຈົ່ງ​ເຊື່ອ​ຟັງ​ຂ້ອຍ” ໂດຍ​ຈະ​ເລີ່ມ​ລາຍການ​ເປັນ​ເວລາ 16 ວັນ ດ້ວຍ​ການ​ດຳເນີນ​ການ​ທີ່ແທ້​ຈິງ ໂດຍ​ແມ່ນ ​ສປຊ ເປັນ​ຜູ້​ເລີ່ມ​ຂຶ້ນ ເພື່ອ​ຮຽກຮ້ອງ​ໄປ​ຍັງ​ທຸກໆ​ຄົນ ຢູ່​ໃນ​ຫຼາຍ​ຂົງເຂດ​ທີ່​ແຕກ​ຕ່າງ​ກັນ ໃຫ້​ຮ່ວມ​ແຮງ​ຮ່ວມ​ໃຈ​ກັນ ໃນ​ຄວາມ​ພະຍາຍາມ​ເພື່ອ​ລຶບລ້າງ​ຄວາມ​ຮຸນ​ແຮງ​ຕໍ່​ແມ່ຍິງ ແລະ​ເດັກນ້ອຍ ເພດ​ຍິງ.

    ປັດຈຸບັນ​ນີ້ ມີ​ແມ່ຍິງ​ຫຼາຍ​ຮ້ອຍ​ລ້ານ​ຄົນ​ໃນ​ທົ່ວ​ໂລກ ຍັງ​ຄົງ​ເປັນ​ຜູ້​ໄດ້​ຮັບ​ເຄາະ​ຮ້າຍ ຂອງ​ຄວາມ​ຮຸນ​ແຮງ ແລະ ການ​ລວນ​ລາມ​ທາງ​ເພດ. ​ສປຊ ໃຫ້​ຮູ້​ວ່າ  ແມ່ຍິງຈຳນວນ 35% ໃນ​ທົ່ວ​ໂລກ ໄດ້​ຖືກ​ກະທຳ​ຮຸນ​ແຮງ​ຕໍ່​ຮ່າງກາຍ ຫຼື​ຖືກ​ກະທຳ​ລວນ​ລາມ​ທາງ​ເພດ ແລະ ມີ​ເຖິງ  38% ຂອງ​ກໍລະນີ​ເຂັ່ນຂ້າ​ແມ່ຍິງ ພັດ​ແມ່ນ​ຄູ່​ຮ່ວມ​ຊີວິດ​ຂອງ​ພວກ​ເຂົາ​ເປັນ​ຜູ້​ກໍ່​ຂຶ້ນ.

 

ຂ່າວທີ່ກ່ຽວຂ້ອງ