Jeju Air ສັ່ງ​ຊື້​ເຮືອບິນ​ໂບ​ອິງ​ລຸ້ນ​ໃໝ່​ຈຳນວນ 40 ລຳ

104 22 ພ.ຈ. 2018 ຂ່າວຕ່າງປະເທດ
Jeju Air ສັ່ງ​ຊື້​ເຮືອບິນ​ໂບ​ອິງ​ລຸ້ນ​ໃໝ່​ຈຳນວນ 40 ລຳ

     ເມື່ອ​ວັນ​ທີ 20 ພະຈິກ​ນີ້ ບໍລິສັດ​ການບິນ​ລາຄາ​ຖືກ Jeju Air ຂອງ ສ ເກົາຫຼີ ໄດ້​ສັ່ງ​ຊື້​ເຮືອບິນ B737-MAX 8 ຈຳນວນ 40 ລຳ ຈາກ​ບໍລິສັດ​ຜະລິດ​ເຮືອບິນ​ໂບ​ອິງ ຂອງ ສ ອາ​ເມ​ຣິ​ກາ ໃນ​ມູນ​ຄ່າ​ລວມ 4,4 ຕື້​ໂດ​ລາ​ສະຫະລັດ ໂດຍ​ມີ​ກຳນົດ​ສົ່ງ​ມອບ​ສິນຄ້າ ແຕ່​ປີ 2020 ຮອດ​ປີ 2026.

    Jeju Air ໃຫ້​ຮູ້​ວ່າ​ເຮືອບິນ​ລຸ້ນ​ໃໝ່​ດັ່ງກ່າວ ມີ​ຂະໜາດ​ບິນ​ໄກ​ປະມານ 6.500 ​ກມ ນັບ​ວ່າ ໄກ​ກວ່າ 1.000​ ກມ ເມື່ອ​ທຽບໃສ່ B737-800NG ຊຶ່ງ​ບໍລິສັດ​ດັ່ງກ່າວ​ໃຊ້​ຢູ່​ໃນ​ປັດຈຸບັນ.

    B737 MAX ໄດ້​ຮັບ​ການ​ອອກ​ແບບ​ມີ 189 ບ່ອນ​ນັ່ງ ແລະ​ ນຳ​ໃຊ້​ເພື່ອ​ປະຕິບັດ​ຖ້ຽວ​ບິນ ຂະໜາດ​ກາງ ແລະ​ ຍາວ ເພາະວ່າ​ມັນ​ປະຢັດ​ເຊື້ອ​ໄຟ​ໄດ້​ຫຼາຍ​ກວ່າ.

    Jeju Air ມີ​ສຳນັກງານ​ໃຫຍ່​ຕັ້ງ​ຢູ່​ເທິງ​ເກາະ​ເຈ​ຊູ ທີ່​ເປັນ​ສະຖານທີ່​ທ່ອງ​ທ່ຽວ​ສຳຄັນ​ຂອງ ສ ເກົາຫຼີ. ປັດຈຸບັນ​ນີ້ ບໍລິສັດ​ດັ່ງກ່າວ ນຳ​ໃຊ້​ເຮືອບິນ B737-800 ຈຳນວນ 38 ລຳ ຊຶ່ງ​ຕົ້ນຕໍ​ແມ່ນ ປະຕິບັດ​ການບິນ​ຂະໜາດ​ໃກ້ ໄປ​ຍັງ​ຈີນ ຍີ່ປຸ່ນ ແລະ ​ບັນດາ​ປະເທດ ໃນ​ເຂດ​ອາຊີ​ຕາເວັນ​ອອກ​ສ່ຽງ​ໃຕ້.

 

ຂ່າວທີ່ກ່ຽວຂ້ອງ