ເຈົ້າ​ໜ້າທີ່ ​ສປຊ ຕ້ອງ​ໄດ້​ລາ​ອອກ​ຈາກ​ຕຳແໜ່ງ​ຍ້ອນ​ຈ່າຍ​ເງິນ​ຫຼາຍ

105 22 ພ.ຈ. 2018 ຂ່າວຕ່າງປະເທດ
ເຈົ້າ​ໜ້າທີ່ ​ສປຊ ຕ້ອງ​ໄດ້​ລາ​ອອກ​ຈາກ​ຕຳແໜ່ງ​ຍ້ອນ​ຈ່າຍ​ເງິນ​ຫຼາຍ

     ທ່ານ ເອ​ຣິກ ໂຊລ​ເຮມ ຜູ້ອຳນວຍການ​ຝ່າຍ​ບໍລິຫານ​ໂຄງການ​ສິ່ງແວດລ້ອມ ຂອງ​ສະຫະ​ປະຊາ​ຊາດ ຕ້ອງ​ໄດ້​ລາ​ອອກ​ຈາກ​ຕຳແໜ່ງ​ເມື່ອ​ວັນ​ທີ 20 ພະຈິກ​ນີ້ ຍ້ອນ​ວ່າ​ເຂົາ ຖືກ​ຄັດຄ້ານ​ຢ່າງ​ແຮງ ຫຼັງ​ຈາກ​ທີ່​ຜູ້​ກວດກາ​ບັນຊີ​ຂອງ​ສະຫະ​ປະຊາ​ຊາດ (​ສປຊ) ກວດ​ພົບ ບ້ວງ​ເງິນ​ໃຊ້​ຈ່າຍ​ອັນ​ໃຫຍ່​ໂຕ ໃນ​ການ​ເດີນທາງ​ໄປ​ມາ ໃນ​ຂະນະ​ທີ່ ​ສປຊ ພວມ​ກິ້ງເກືອກ​ລີເລືອ ກັບ​ງົບປະມານ​ທີ່​ຖືກ​ຮັດ​ແຄບ​ລົງ.

   ທ່ານ ເອ​ຣິກ ໂຊລ​ເຮມ ເປັນ​ອະດີດ​ລັດຖະມົນຕີ​ສິ່ງແວດລ້ອມ​ຂອງ​ນອກ​ແວ ແລະ ເປັນ​ຜູ້ອຳນວຍການ​ຝ່າຍ​ບໍລິຫານ​ໂຄງການ​ສິ່ງແວດລ້ອມ​ຂອງ ​ສປຊ ປະຈຳ ໄນ​ໂຣ​ບີ (ປະເທດ​ເຄນ) ມາ​ແຕ່​ເດືອນ​ມິຖຸນາ ປີ 2016.

    ການ​ກວດກາ​ບັນຊີ​ຂອງ ​ສປຊ ພົບ​ເຫັນ​ວ່າ​ທ່ານ ເອ​ຣິກ ໂຊລ​ເຮມ ຈ່າຍ​ເງິນ​ໄປ​ເກືອບ  500.000 ໂດ​ລາ​ສະຫະລັດ ໃຫ້​ແກ່​ການ​ເດີນທາງ​ໄປ​ມາ ແລະ​ເຫັນ​ວ່າ​ທ່ານ​ໄດ້​ຮຽກຮ້ອງ ຄ່າ​ໃຊ້​ຈ່າຍ​ທີ່​ບໍ່​ສົມ​ເຫດ​ສົມ​ຜົນ ໃນ​ເວລາ​ທີ່ ​ສປຊ ປະ​ເຊີນ​ກັບ​ບັນຫາ​ງົບປະມານ​ຖືກ​ຮັດ​ແຄບ.

    ການ​ເດີນທາງ​ໄປ​ທົ່ວ​ທຸກ​ແຫ່ງ​ໃນ​ໂລກ​ຂອງ​ທ່ານ ເອ​ຣິກ ໂຊລ​ເຮມ ໄດ້​ເຮັດ​ໃຫ້​ເກີດ ການ​ກ່າວ​ຫາ​ວ່າ​ທ່ານ​ສະແດງ​ອອກ ວ່າ​ເປັນ​ຄົນ​ທີ່​ໃຫ້​ຄວາມ​ໃສ່ໃຈ​ໜ້ອຍ ຕໍ່​ສິ່ງແວດລ້ອມ ແລະ ​ຄວາມ​ພະຍາຍາມ ເພື່ອ​ຫຼຸດຜ່ອນ​ການ​ປ່ອຍ​ແກ​​ັສ​ກາກ​ບອນ ທີ່​ມີ​ອອກ​ມາ​ຈາກ​ການ​ເດີນທາງ ໄປ​ມາ​ດ້ວຍ​ເຮືອບິນ.

 

ຂ່າວທີ່ກ່ຽວຂ້ອງ