ທ່ານນາຍົກ ຢ້ຽມຊົມງານ ບຸນມະນັດສະການພະທາດຫຼວງ

208 22 ພ.ຈ. 2018 ຂ່າວໜ້າ​ໜຶ່ງ
ທ່ານນາຍົກ ຢ້ຽມຊົມງານ ບຸນມະນັດສະການພະທາດຫຼວງ

    ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ຢ້ຽມ­ຢາມ ແລະ ທ່ຽວ​ຊົມ​ງານ​ບຸນ​ມະ​ນັດ​ສະ­ການ​ພະ​ທາດ­ຫຼວງ ແລະ ວາງ­ສະ­ແດງ​ສິນ­ຄ້າ ປະ­ຈຳ​ປີ 2018 ວັນ​ທີ 21 ພະ­ຈິກ 2018 ເພື່ອ​ຊຸກ­ຍູ້ ແລະ ໃຫ້​ກຳ­ລັງ​ໃຈ​ຫົວ­ໜ່ວຍ​ທຸ­ລະ​ກິດ ຜູ້​ປະ­ກອບ​ການ ແລະ ພົບ​ປະ​ປະ­ຊາ­ຊົນ​ທີ່​ມາ​ທ່ຽວ​ງານ​ບຸນ​ດັ່ງ­ກ່າວ ໂດຍ​ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ປະ­ທານ​ຈັດ​ງານ​ບຸນ​ມະ​ນັດ​ສະ­ການ​ພະ​ທາດ­ຫຼວງ ປະ­ຈຳ​ປີ 2018 ໃຫ້­ການ​ຕ້ອນ­ຮັບ.

    ໂອ­ກາດ​ນີ້ ທ່ານ​ນາ­ຍົກ ພ້ອມ​ຄະ­ນະ ໄດ້​ຢ້ຽມ​ຊົມ​ບັນ­ດາ​ຮ້ານ​ຄ້າ​ທັງ​ພາຍ​ໃນ ແລະ ຕ່າງ­ປະ­ເທດ ໂດຍ​ສະ­ເພາະ ຮ້ານ​ຄ້າ​ໜຶ່ງ​ເມືອງ​ໜຶ່ງ​ຜະ­ລິດ​ຕະ​ພັນ (ODOP) ຮ້ານ​ວາງ­ສະ­ແດງ ແລະ ຂາຍ​ສິນ­ຄ້າ​ຫັດ­ຖະ­ກຳ ເຄື່ອງ​ກົນ​ຈັກ​ທັນ​ສະ­ໄໝ​ເຂົ້າ​ໃນ​ຂະ­ແໜງ­ການ​ອຸດ­ສາ­ຫະ­ກຳ-ກະ­ສິ­ກຳ ເຊິ່ງ​ທ່ານ​ໄດ້​ໃຫ້​ຄວາມ​ສົນ­ໃຈ ແລະ ໂອ້​ລົມ​ສົນ­ທະ­ນາ​ກັບ​ບັນ­ດາ​ຜູ້​ປະ­ກອບ​ການ ພ້ອມ​ກັບ​ຍ້ອງ­ຍໍ​ໜ່ວຍ​ງານ​ຮັບ­ຜິດ­ຊອບ​ຈັດ​ງານ ທີ່​ມີ​ຄວາມ​ເອົາ­ໃຈ­ໃສ່ ເຮັດ​ໃຫ້​ງານ​ບຸນ​ມີ​ຫົວ­ໜ່ວຍ​ທຸ­ລະ​ກິດ​ຫຼາຍ​ພາກ­ສ່ວນ​ເຂົ້າ​ຮ່ວມ​ຢ່າງ​ຫຼວງ­ຫຼາຍ ພ້ອມ​ນີ້ ຍັງ​ໄດ້​ເນັ້ນ​ໃຫ້​ຄະ­ນະ​ຮັບ​ຊອບ​ຈັດ​ງານ​ບຸນ ສືບ­ຕໍ່​ເອົາ­ໃຈ­ໃສ່​ຕິດ­ຕາມ​ກວດ­ກາ​ງານ​ບຸນ​ໃຫ້​ມີ​ຄວາມ​ສະ­ຫງົບ​ປອດ​ໄພ ແລະ ເປັນ​ລະ­ບຽບ​ຮຽບ​ຮ້ອຍ.

    ງານ​ບຸນ​ມະ​ນັດ​ສະ­ການ​ພະ​ທາດ­ຫຼວງ ແລະ ວາງ­ສະ­ແດງ​ສິນ­ຄ້າ ປະ­ຈຳ​ປີ 2018 ມີ​ຫ້າງ​ຮ້ານ ແລະ ຜູ້​ປະ­ກອບ​ການ​ດ້ານ​ທຸ­ລະ​ກິດ​ນ້ອຍ-ໃຫຍ່​ເກືອບ 800 ຮ້ານ ໃນ​ນີ້ ຢູ່​ສູນ​ການ​ຄ້າ​ລາວ-ໄອ​ເຕັກ 242 ຮ້ານ ຄາດ​ວ່າ​ຈະ​ມີ​ເງິນ​ໝູ­ນວຽນ​ໄລ­ຍະ​ບຸນ​ຫຼາຍ​ຕື້​ກີບ.

ຂ່າວທີ່ກ່ຽວຂ້ອງ