ມວນຊົນຊາວນະຄອນຫຼວງ ເຂົ້າຮ່ວມພິທີແຫ່ຜາສາດເຜີ້ງ

177 22 ພ.ຈ. 2018 ຂ່າວໜ້າ​ໜຶ່ງ
ມວນຊົນຊາວນະຄອນຫຼວງ ເຂົ້າຮ່ວມພິທີແຫ່ຜາສາດເຜີ້ງ

    ປະ­ເພ­ນີ​ແຫ່​ຜາ­ສາດ​ເຜີ້ງ ເປັນ​ພິ­ທີ­ກຳ​ທາງ​ສາ­ສະ­ໜາ ແມ່ນ​ວັດ­ທະ­ນະ­ທຳ​ອັນ​ດີ­ງາມ​ທີ່​ສະ­ແດງ​ເຖິງ​ຄວາມ​ພາກ​ພຽນ ການ​ປະ­ດິດ​ຄິດ​ສ້າງ ແລະ ການ​ເຕົ້າ­ໂຮມ​ຄວາມ​ສາ­ມັກ­ຄີ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ ໂດຍ​ສະ­ເພາະ ປະ­ຊາ­ຊົນ​ຊາວ​ນະ­ຄອນ­ຫຼວງ​ວຽງ​ຈັນ (ນວ) ທີ່​ສືບ​ທອດ​ກັນ​ມາ​ແຕ່​ບູ­ຮານ​ນະ​ການ ໂດຍ​ແຕ່​ລະ​ປີ​ໄດ້​ມີ​ການ​ຈັດ​ຂຶ້ນ​ມື້​ຂຶ້ນ 14 ຄ່ຳ​ເດືອນ​ສິບ​ສອງ ໃນ​ໂອ­ກາດ​ງານ​ສະ­ເຫຼີມ­ສະ­ຫຼອງ​ບຸນ​ນະ­ມັດ­ສະ­ການ​ພະ​ທາດ­ຫຼວງ ເພື່ອ​ເປັນ​ການ​ສືບ​ສານ​ວັດ­ທະ­ນະ­ທຳ​ອັນ​ດີ­ງາມ ໃຫ້​ຄົງ​ຢູ່​ກັບ​ປະ­ຊາ­ຊົນ​ລາວ​ຕະ­ຫຼອດ​ໄປ.

    ວັນ​ທີ 21 ພະ­ຈິກ 2018 ໄດ້​ຈັດ​ຂະ​ບວນ​ແຫ່​ຜາ­ສາດ​ເຜີ້ງ ປະ­ຈຳ​ປີ ພສ 2561 ຂຶ້ນ ຢູ່​ກົມ​ມະ​ລຽນ​ພະ​ທາດ­ຫຼວງ ໂດຍ​ມີ​ພະ​ເຖ­ລາ­ນຸ­ເຖລະ ການ​ນຳ​ພັກ-ລັດ ແລະ ມວນ​ຊົນ​ຊາວ ນວ ເຂົ້າ​ຮ່ວມ​ຢ່າງ​ເປັນ​ຂະ​ບວນ​ຄຶກ­ຄື້ນ ແລະ ຮັກ­ສາ​ໄດ້​ຮີດ­ຄອງ​ປະ­ເພ­ນີ​ອັນ​ດີ­ງາມ.

    ການ​ແຫ່​ຜາ­ສາດ​ເຜີ້ງ​ໃນ​ປີ​ນີ້ ໄດ້​ເຄື່ອນ​ຍ້າຍ​ຂະ​ບວນ​ແຫ່​ຈາກ​ຖະ­ໜົນ​ໜອງ​ບອນ ແລ້ວ​ເຂົ້າ​ສູ່​ກົມ​ມະ​ລຽນ​ພະ​ທາດ­ຫຼວງ​ເບື້ອງ​ທິດ­ຕາ­ເວັນ­ອອກ ໃນ​ນີ້ ນຳ​ໜ້າ​ດ້ວຍ​ຂະ​ບວນ​ແຫ່​ຂອງ​ພະ­ສົງ ສຳ​ມະ​ເນນ ການ​ນຳ​ພັກ-ລັດ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ພ້ອມ​ດ້ວຍ​ການ​ນຳ ນວ ອົງ​ການ­ຈັດ­ຕັ້ງ​ມະ­ຫາ­ຊົນ ເຖົ້າ​ແກ່​ແນວ​ໂຮມ ຕາມ​ດ້ວຍ​ຂະ​ບວນ​ດົນ­ຕີ​ພື້ນ­ເມືອງ ຂະ​ບວນ​ຂອງ​ເມືອງ​ຕ່າງໆ ສຳ­ນັກ­ງານ-ອົງ­ການ ແລະ ປະ­ຊາ­ຊົນ​ລາວ​ບັນ­ດາ­ເຜົ່າ ໂດຍ​ຂະ​ບວນ​ການ​ແຫ່​ຜາ­ສາດ​ເຜີ້ງ ໄດ້​ເຄື່ອນ​ຜ່ານ​ປະ­ຕູ­ໂຂງ​ດ້ານ​ສະ­ໜາມ​ຫຼວງ ແລ້ວ​ແຫ່​ອ້ອມ​ພະ­ທາດ 3 ຮອບ ຈາກ​ນັ້ນ ກໍ່​ໄດ້​ຖວາຍ​ຜາ­ສາດ​ເຜິ້ງ ຟັງ​ທຳ​ມະ​ເທ­ສະ­ໜາ 1 ກັນ ແລະ ກາບ​ໄຫວ້​ຊັກ​ກະ​ລະ​ບູ­ຊາ​ພະ​ທາດ­ຫຼວງ ແລ້ວ​ສິ້ນ​ສຸດ​ພິ­ທີ ສຳ­ລັບ​ວັນ​ທີ 22 ພະ­ຈິກ 2018 ເວ­ລາ 7:00 ໂມງ ຢູ່​ເດີ່ນ​ພະ​ທາດ­ຫຼວງ ຈະ​ມີ​ພິ­ທີ​ໃສ່​ບາດ ເວ­ລາ 13:30 ໂມງ ພິ­ທີ​ແຫ່​ລູກ​ຄີ ແລະ ກີ­ລາ​ຕີ­ຄີ ຢູ່​ເດີ່ນ​ສະ­ໜາມ​ຫຼວງ ສ່ວນ​ຕອນ​ຄ່ຳ​ມີ​ວຽນ­ທຽນ ຈູດ​ບັ້ງ­ໄຟ­ດອກ ແລະ ຄົບ­ງັນ​ຕາມ​ປະ­ເພ­ນີ.

ຂ່າວທີ່ກ່ຽວຂ້ອງ