ຂ່າວຫຼ້າສຸດ

ກຽມພັດທະນາໂຄງການພະລັງງານແສງຕາເວັນເທິງໜ້ານ້ຳ

307 22 ພ.ຈ. 2018 ຂ່າວໜ້າ​ໜຶ່ງ
ກຽມພັດທະນາໂຄງການພະລັງງານແສງຕາເວັນເທິງໜ້ານ້ຳ

    ກະ­ຊວງ​ແຜນ­ການ-ການ​ລົງ­ທຶນ ຕາງ­ໜ້າ​ໃຫ້​ລັດ­ຖະ­ບານ​ລາວ ຮ່ວມ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ (MOU) ວ່າ​ດ້ວຍ​ການ​ສຶກ​ສາ​ສຳ​ຫຼວດ​ຄວາມ​ເປັນ​ໄປ​ໄດ້ ໃນ​ການ​ພັດ­ທະ­ນາ​ໂຄງ­ການ​ພະ­ລັງ­ງານ​ໄຟ­ຟ້າ​ແສງ​ຕາ­ເວັນ​ເທິງ​ໜ້າ­ນ້ຳ​ງື່ມ 1 ກັບ​ບໍ­ລິ­ສັດ Hangzhou Safe Found Technology Company Limited ແລະ ບໍ­ລິ­ສັດ ລາວ​ພີ​ພີ​ເອ ທີ່​ປຶກ­ສາ​ບັນ­ຊີ ແລະ ກວດ​ສອບ ຈຳ­ກັດ.

    ທ່ານ ຫຼຸຍ ຈ້າວ (Rui Zhao) ປະ­ທານ​ບໍ­ລິ­ສັດ Hangzhou Safe Found Technology Company Limited ກ່າວ​ວ່າ: ໂຄງ­ການ​ດັ່ງ­ກ່າວ​ແມ່ນ​ຢູ່​ໃນ​ເຂດ​ຈຸດ​ສຸມ​ໂພນ​ສະ­ຫວາດ ເມືອງ​ລ້ອງ​ຊານ ແຂວງ​ໄຊ​ສົມ­ບູນ ຈຸດ​ເດັ່ນ​ຂອງ​ໂຄງ­ການ​ແມ່ນ​ປະ­ຢັດ​ເນື້ອ­ທີ່​ໂດຍ​ສ້າງ​ຢູ່​ເທິງ​ໜ້າ­ນ້ຳ ບໍ່​ກວມ​ເອົາ​ເນື້ອ­ທີ່​ດິນ​ສະ­ເພາະ ສາ­ມາດ​ຍົກ​ລະ­ດັບ​ປະ­ລິ­ມານ​ການ​ຜະ­ລິດ​ກະ­ແສ​ໄຟ­ຟ້າ ເຊິ່ງ​ຈາກ​ການ​ວິ­ເຄາະ ແລະ ສົມ​ທຽບ ເຫັນ​ວ່າ​ໂຮງ­ງານ​ຜະ­ລິດ​ໄຟ­ຟ້າ​ເທິ່ງ​ໜ້າ­ນ້ຳ ຈະ​ເພີ່ມ​ປະ­ລິ­ມານ​ການ​ຜະ­ລິດ​ໄຟ­ຟ້າ​ຂຶ້ນ​ເຖິງ 10% ພ້ອມ​ນັ້ນ ຍັງ​ສາ­ມາດ​ຫຼຸດ­ຜ່ອນ​ການ​ລະ​ເຫີຍ-ອັດ­ຕາ​ການ​ຂະ­ຫຍາຍ­ຕົວ​ຂອງ​ໄຄ​ໃນ​ນ້ຳ ການ​ນຳ​ໃຊ້-ຮັກ­ສາ​ງ່າຍ ຊ່ວຍ​ທົດ​ແທນ​ກັນ​ລະ­ຫວ່າງ​ນ້ຳ-ແສງ ພ້ອມ​ສາ­ມາດ​ເກັບ​ກູ້​ອຸ­ປະ­ກອນ​ໄດ້​ຄືນ ແລະ ຍັງ​ສ້າງ​ຜົນ​ປະ­ໂຫຍດ​ດ້ານ​ການ­ທ່ອງ­ທ່ຽວ.

    ໃນ​ໄລ­ຍະ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ ທາງ​ບໍ­ລິ­ສັດ​ຈະ​ໄດ້​ຢຶດ​ໝັ້ນ​ຕາມ​ຫຼັກ­ການ 4 ດີ ລະ­ຫວ່າງ ລາວ-ຈີນ ຄື: ເພື່ອນ​ບ້ານ​ທີ່​ດີ ໝູ່​ທີ່​ດີ ສະ­ຫາຍ​ທີ່​ດີ ແລະ ຄູ່​ຮ່ວມ​ມື​ທີ່​ດີ ພ້ອມ​ນັ້ນ ກໍ່​ດຳ­ເນີນ​ການ​ພັດ­ທະ­ນາ ແລະ ຮ່ວມ​ມື​ດ້ານ​ພະ­ລັງ­ງານ​ຕາມ​ນະ­ໂຍ­ບາຍ ໜຶ່ງ​ແລວ ໜຶ່ງ​ເສັ້ນ­ທາງ.

    ບົດ​ບັນ­ທຶກ​ຄວາມ​ເຂົ້າ­ໃຈ​ສະ­ບັບ​ນີ້ ມີ​ໄລ­ຍະ​ການ­ຈັດ­ຕັ້ງ​ປະ­ຕິ­ບັດ 24 ເດືອນ ພາຍ­ຫຼັງ​ທີ່​ໄດ້​ລົງ​ນາມ ແລະ ສາ­ມາດ​ຕໍ່​ໄດ້​ຕາມ​ການ​ເຫັນ​ດີ​ຂອງ​ລັດ­ຖະ­ບານ ບົນ​ພື້ນ­ຖານ​ຜູ້​ພັດ­ທະ­ນາ​ໂຄງ­ການ ໄດ້​ປະ­ຕິ­ບັດ​ບົດ​ບັນ­ທຶກ​ຄວາມ​ເຂົ້າ­ໃຈ ໄດ້​ຢ່າງ​ໜ້ອຍ (2/3) ຂອງ​ໜ້າ​ວຽກ​ທັງ​ໝົດ.

    ສຳ­ລັບ​ພິ​ທິ​ລົງ​ນາມ​ບົດ​ບັນ­ທຶກ​ດັ່ງ­ກ່າວ ຈັດ​ຂຶ້ນ​ໃນ​ວັນ​ທີ 20 ພະ­ຈິກ 2018 ທີ່​ກະ­ຊວງ​ແຜນ­ການ ແລະ ການ​ລົງ­ທຶນ ລະ­ຫວ່າງ​ທ່ານ ສຸ­ພັນ ແກ້ວ​ມີ​ໄຊ ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ແລະ ທ່ານ ຫຼຸຍ ຈ້າວ ເຊິ່ງ​ມີ​ທ່ານ ຄຳ​ລຽນ ພົນ​ເສ­ນາ ຮອງ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ພ້ອມ​ບັນ­ດາ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ​ເປັນ​ສັກ­ຂີ​ພິ­ຍານ.

ຂ່າວທີ່ກ່ຽວຂ້ອງ