ຂ່າວຫຼ້າສຸດ

ເລີ່ມກໍ່ສ້າງລະບົບນ້ຳປະປາ ບ້ານດອນໄຮ່-ບ້ານທາງໂຄ້ງ

234 22 ພ.ຈ. 2018 ຂ່າວໜ້າ​ໜຶ່ງ
ເລີ່ມກໍ່ສ້າງລະບົບນ້ຳປະປາ ບ້ານດອນໄຮ່-ບ້ານທາງໂຄ້ງ

    ລັດ​ວິ​ສາ​ຫະ​ກິດ​ນ້ຳ​ປະ­ປາ​ນະ­ຄອນ­ຫຼວງ ລົງ​ນາມ​ສັນ­ຍາ​ກັບ​ບໍ­ລິ­ສັດ ST ກໍ່­ສ້າງ ຈຳ­ກັດ​ຜູ້​ດຽວ ເພື່ອ​ກໍ່­ສ້າງ​ລະ­ບົບ​ນ້ຳ​ປະ­ປາ ບ້ານ​ດອນ​ໄຮ່-ບ້ານ​ທາງ​ໂຄ້ງ ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ (ນວ) ມູນ​ຄ່າ​ກໍ່­ສ້າງ​ປະ­ມານ 2,6 ຕື້​ກີບ ໂດຍ​ການ​ກໍ່­ສ້າງ​ຈະ​ເລີ່ມ​ແຕ່​ມື້​ລົງ​ນາມ​ໃນ​ສັນ­ຍາ​ຮັບ​ເໝົາ​ກໍ່­ສ້າງ ແລະ ຈະ​ສຳ­ເລັດ​ໃນ​ວັນ​ທີ 15 ພຶດ­ສະ­ພາ 2019.

    ທ່ານ ຄຳ​ເຜີຍ ວົງ­ສາ​ຄຳ​ຜຸຍ ຜູ້­ອຳ­ນວຍ­ການ​ລັດ​ວິ​ສາ​ຫະ​ກິດ​ນ້ຳ​ປະ­ປາ​ນະ­ຄອນ­ຫຼວງ ກ່າວ​ວ່າ: ໃນ​ມູນ​ຄ່າ​ການ​ກໍ່­ສ້າງ​ໂຄງ­ການ​ກໍ່­ສ້າງ​ລະ­ບົບ​ນ້ຳ​ປະ­ປາ ບ້ານ​ດອນ​ໄຮ່ ແລະ ບ້ານ​ທາງ​ໂຄ້ງ ສະ­ມາ­ຄົມ​ບັນ­ດາ​ນະ­ຄອນ­ຫຼວງ​ທີ່​ໃຊ້​ພາ­ສາ​ຝຣັ່ງ (AIMF) ປະ­ກອບ­ສ່ວນ 122.000 ເອີ​ໂຣ ສະ­ເໜີ​ຂໍ​ສະ­ໜັບ­ສະ­ໜູນ​ອົງ­ການ​ນ້ຳ​ແຣັງ​ເມີ​ສ 122.000 ເອີ​ໂຣ ແລະ ນະ­ຄອນ­ຫຼວງ​ວຽງ​ຈັນ 61.000 ເອີ​ໂຣ ສ່ວນ​ດ້ານ​ການ​ສຳ​ຫຼວດ​ອອກ​ແບບ ແລະ ຕິດ­ຕາມ​ການ​ກໍ່­ສ້າງ ໄດ້​ເຊັນ​ສັນ­ຍາ​ວ່າ​ຈ້າງ​ລັດ​ວິ​ສາ​ຫະ​ກິດ​ວິ­ສະ­ວະ­ກຳ​ນ້ຳ ແລະ ສິ່ງ­ແວ­ດລ້ອມ ເຊິ່ງ​ເປັນ​ບໍ­ລິ­ສັດ​ໃນ​ເຄືອ​ຄ່າຍ​ຂອງ​ລັດ​ວິ​ສາ​ຫະ​ກິດ​ນ້ຳ​ປະ­ປາ​ນະ­ຄອນ­ຫຼວງ ໂດຍ​ໜ້າ​ວຽກ​ໃຫຍ່​ປະ­ກອບ​ມີ​ກໍ່­ສ້າງ​ສະ­ຖາ­ນີ​ສູບ​ນ້ຳ​ດິບ (ບໍ່​ບາ​ດານ) 6 ບໍ່ ລະ­ບົບ​ໂຮງ­ງານ​ທີ່​ມີ​ກຳ­ລັງ​ການ​ຜະ­ລິດ 500 ແມັດ​ກ້ອນ​ຕໍ່​ວັນ ອາ­ຄານ​ຫ້ອງ­ການ ຮົ້ວ ແລະ ປະ­ຕູ​ທາງ​ເຂົ້າ ອ່າງ­ເກັບ­ນ້ຳ​ຂະ­ໜາດ 60 ແມັດ​ກ້ອນ ລະ­ບົບ​ທໍ່​ສົ່ງ ແລະ ທໍ່​ແຈກ​ຈ່າຍ ເຊິ່ງ​ບໍ­ລິ­ສັດ​ທີ່​ມີ​ເງື່ອນ­ໄຂ​ຄົບ​ຖ້ວນ ແລະ ຊະ­ນະ​ການ​ປະ­ມູນ​ແມ່ນ​ບໍ­ລິ­ສັດ ST ກໍ່­ສ້າງ ຈຳ­ກັດ​ຜູ້​ດຽວ ໂດຍ​ທີ່​ປຶກ­ສາ​ໂຄງ­ການ​ແມ່ນ​ລັດ​ວິ​ສາ​ຫະ​ກິດ​ວິ​ສາ​ວະ​ກຳ​ນ້ຳ ແລະ ສິ່ງ­ແວ­ດລ້ອມ.

    ພິ­ທີ​ລົງ​ນາມ​ໂຄງ­ການ​ດັ່ງ­ກ່າວ ຈັດ​ຂຶ້ນ​ວັນ​ທີ 15 ພະ­ຈິກ​ຜ່ານ​ມາ ຢູ່​ຮ້ານ​ອາ­ຫານ​ຄົວ​ລາວ ລະ­ຫວ່າງ​ທ່ານ ຄຳ​ເຜີຍ ວົງ­ສາ​ຄຳ​ຜຸຍ ແລະ ທ່ານ ຄູນ​ສີ ທອງ​ສະ​ຫວັດ ປະ­ທານ​ບໍ­ລິ­ສັດ ST ກໍ່­ສ້າງ ຈຳ­ກັດ​ຜູ້​ດຽວ ມີ​ທ່ານ ແກ້ວ​ພິ­ລາ​ວັນ ອາ​ໄພ​ລາດ ຮອງ​ເຈົ້າ​ຄອງ ນວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ