ເບິ່ງບ້ານເຂົາເອົາບົດຮຽນ 21/11/2018

332 21 ພ.ຈ. 2018 ຫົວຂໍ້ຂ່າວອື່ນໆ

    ມື້­ນີ້​ພາ​ທ່ານ​ຜູ້​ອ່ານ​ໄປ​ຮູ້­ຈັກ​ກັບ​ຄະ­ດີ​ທີ່​ເກີດ​ຂຶ້ນ​ຢູ່​ເຮືອນ​ພັກ​ຜູ້​ເຖົ້າ ທີ່ ອົດ​ສະ​ຕຣາ​ລີ ແລະ ມາດ​ຕະ­ການ​ຫ້າມ​ພົກ​ພາ​ວັດ­ຖຸ​ແຫຼມ​ຄົມ​ຂຶ້ນ​ລົດ­ໄຟ​ທີ່ ຍີ່­ປຸ່ນ.

    ທີ່ ອົດ​ສະ​ຕຣາ​ລີ: ຂາວ​ຍ່ອຍ​ຈາກ​ໜັງ­ສື­ພິມ ເດິ​ເນ​ເຊິນ (The Nation) ສະ­ບັບ​ວັນ​ທີ 5 ເດືອນ​ຕຸ­ລາ​ປີ​ນີ້ ໄດ້​ສະ­ເໜີ​ເລື່ອງ​ທີ່​ເຫຼືອ​ເຊື່ອ ແຕ່​ມີ​ຄວາມ​ຈິງ​ກ່ຽວ​ກັບ​ບັນ­ຫາ​ທີ່​ເກີດ​ຂຶ້ນ​ຢູ່​ເຮືອນ​ພັກ​ສຳ­ລັບ​ຜູ້​ເຖົ້າ ເລື່ອງ​ມີ​ຢູ່​ວ່າ ຊາຍ​ເຖົ້າ​ອາ­ຍຸ 102 ປີ ໄດ້​ຈູ່​ໂຈມ​ເພື່ອ​ເຮັດ​ແນວ​ຜິດ​ສິນ​ທຳ​ກັບ​ຍິງ​ເຖົ້າ ອາ­ຍຸ 92 ປີ​ຢູ່​ເຮືອນ​ພັກ ສຳ­ລັບ​ຜູ້​ເຖົ້າ​ທີ່​ເມືອງ​ຊິດ​ນີ ປະ­ເທດ​ອົດ​ສະ​ຕຣາ​ລີ ຂ່າວ​ບໍ່​ໄດ້​ໃຫ້​ລາຍ​ລະ­ອຽດ​ວ່າ: ເລື່ອງ​ຜິດ​ສິນ​ທຳ​ນັ້ນ​ແມ່ນ​ຫຍັງ​ແທ້ ແຕ່​ກໍ່​ພໍ​ຄາດ​ອອກ​ວ່າ ຄົງ​ກ່ຽວ​ກັບ​ຄວາມ​ພະ­ຍາ­ຍາມ​ຂົ່ມ­ຂືນ​ຝືນ​ໃຈ​ຢ່າງ​ແນ່­ນອນ ຂ່າວ​ບອກ​ພຽງ​ວ່າ ຊາຍ​ເຖົ້າ​ອາ­ຍຸ​ເກີນ​ຮ້ອຍ​ຄົນ​ນີ້ ມີ​ໝາຍ​ຮຽກ​ໂຕ​ຂຶ້ນ​ສານ​ໃນ​ເດືອນ​ພະ­ຈິກ​ນີ້ ໃນ​ຂໍ້​ຫາ “ຈູ່​ໂຈມ” ຄົນ​ອື່ນ​ຮ່ວມ​ອາ­ໄສ​ຢູ່​ເຮືອນ​ພັກ​ຜູ້​ເຖົ້າ​ດ້ວຍ​ກັນ ພໍ​ເຫດ­ການ​ນີ້​ເກີດ​ຂຶ້ນ ເຈົ້າ​ໜ້າ­ທີ່​ຕຳ­ຫຼວດ​ກໍ່​ໄດ້​ຄວບ​ຄຸມ​ຕົວ​ຊາຍ​ເຖົ້າ ເຈົ້າ​ບັນ­ຫາ​ໄວ້​ຫ້ອງ​ກັກ​ຂັງ ເພື່ອ​ດຳ­ເນີນ​ການ​ສອບ​ສວນ​ຕາມ​ກຳ­ນົດ ແລະ ຖ້າ​ພົບ​ວ່າ​ຊາຍ​ຄົນ​ນີ້​ມີ​ຄວາມ​ຜິດ​ແທ້ ເຂົາ​ກໍ່​ຄົງ​ຈະ​ໄດ້​ເຂົ້າ​ໄປ​ນອນ​ຢູ່​ຄຸກ​ສູງ​ສຸດ ເຖິງ 7 ປີ ນີ້​ລະ​ນໍ​ເພິ່ນ​ວ່າ ອັນ​ຕັນ­ຫາ​ໜ້າ​ມືດ​ນີ້ ມັນ​ສາ­ມາດ​ເຮັດ​ໃຫ້​ຄົນ​ເຮົາ​ຂາດ​ສະ­ຕິ ບໍ່​ຮູ້​ອັນ​ດີ​ອັນ​ຊົ່ວ ແຕ່​ທີ່​ໜ້າ​ສົນ­ໃຈ​ແຮງ​ກໍ່​ແມ່ນ​ວ່າ​ຄົນ​ອາ­ຍຸ​ກາຍ​ຮ້ອຍ​ຄື​ແນວ​ນີ້ ກໍ່​ຍັງ​ມີ​ເຫື່ອ​ມີ­ແຮງ​ໄຫວ​ຢູ່​ຫວະ ?.

    ທີ່ ຍີ່­ປຸ່ນ: ມີ​ຂ່າວ​ອອກ​ມາ​ຈາກ​ຍີ່­ປຸ່ນ ໃນ​ຕົ້ນ​ເດືອນ​ພະ­ຈິກ​ນີ້​ວ່າ ທາງ​ການ​ຍີ່­ປຸ່ນ ໄດ້​ມີ​ແຜນ​ເກືອດ​ຫ້າມ​ຜູ້­ໂດຍ­ສານ​ທາງ​ລົດ­ໄຟ​ໃນ​ທົ່ວ​ປະ­ເທດ ພົກ​ອາ­ວຸດ​ແຫຼມ​ຄົມ​ທຸກ​ຊະ­ນິດ​ຕິດ​ໂຕ​ເວ­ລາ​ໂດຍ­ສານ ເຊັ່ນ: ມີດ ຂວານ ເລື່ອຍ ມີດ­ຕັດ ແລະ ອື່ນໆ ຄຳ​ສັ່ງ​ຫ້າມ​ນີ້​ຈະ​ເລີ່ມ​ມີ​ຜົນ​ສັກ­ສິດ​ນັບ​ແຕ່​ເດືອນ​ເມ­ສາ ປີ 2019 ເປັນ­ຕົ້ນ​ໄປ ເຫດ­ຜົນ​ທີ່​ຕ້ອງ​ມີ​ການ​ສັ່ງ​ຫ້າມ​ຖື​ວັດ­ຖຸ​ແຫຼມ-ຄົມ (ໂດຍ​ບໍ່​ມີ​ການ​ຫຸ້ມ​ຫໍ່) ຕິດ​ໂຕ​ຂຶ້ນ​ລົດ­ໄຟ​ນັ້ນ ແມ່ນ​ຍ້ອນ​ວ່າ​ໄດ້​ເກີດ​ມີ​ກໍ­ລະ­ນີ​ຄົນ​ໂດຍ­ສານ​ໃຊ້​ມີດ​ແທງ​ກັນ​ຈົນ​ເສຍ​ຊີ­ວິດ ໃນ​ເດືອນ​ມິ­ຖຸ­ນາ​ປີ​ນີ້ ບົນ​ລົດ­ໄຟ​ຄວາມ​ໄວ​ສູງ ພາຍ​ໃຕ້​ຂໍ້​ຫ້າມ​ດັ່ງ­ກ່າວ ພະ­ນັກ­ງານ​ຮັບ­ຜິດ­ຊອບ​ລົດ­ໄຟ​ສາ­ມາດ​ໄລ່​ຜູ້­ໂດຍ­ສານ​ລົງ​ຈາກ​ລົດ​ໄດ້ ຖ້າ​ມີ​ການ​ລະ­ເມີດ​ຄຳ​ສັ່ງ ແຕ່​ກໍ່​ຍັງ​ມີ​ຂໍ້​ສົງ​ໃສ​ຢູ່​ວ່າ ມາດ​ຕະ­ການ​ຫ້າມ​ດັ່ງ­ກ່າວ​ຈະ​ມີ​ຜົນ​ປະ­ສິດ­ທິ­ພາບ​ຫຼາຍ​ໜ້ອຍ​ປານ­ໃດ ເພາະ​ບໍ່​ໄດ້​ມີ​ຂໍ້​ກຳ­ນົດ​ໃຫ້​ພະ­ນັກ­ງານ​ປະ­ຈຳ​ລົດ­ໄຟ​ກວດ​ຄົ້ນ​ທຸກໆ​ຫີບ​ຫໍ່​ຂອງ​ຜູ້­ໂດຍ­ສານ ພາຍ­ຫຼັງ​ເກີດ​ເຫດ​ແທງ​ກັນ​ຕາຍ​ຢູ່​ລົດ­ໄຟ​ໃນ​ເດືອນ​ມິ­ຖຸ­ນາ​ປີ​ນີ້ ທາງ​ຄະ­ນະ​ຮັບ­ຜິດ­ຊອບ​ລົດ­ໄຟ​ຄວາມ​ໄວ​ສູງ ໄດ້​ຮີບ​ຮ້ອນ​ເຂັ້ມ​ມາດ​ຕະ­ການ​ປ້ອງ​ກັນ​ຄວາມ​ປອດ​ໄພ ເຊັ່ນ: ໄດ້​ເພີ່ມ​ພະ­ນັກ­ງານ​ຮັກ­ສາ​ຄວາມ​ປອດ​ໄພ ເພີ່ມ​ການ​ສາ­ລະ​ເວ​ເວນ­ຍາມ​ຢູ່​ເທິງ​ລົດ­ໄຟ ນອກ­ຈາກ​ນັ້ນ ຍັງ​ໄດ້​ເຮັດ​ການ​ເຝິກ­ອົບ­ຮົມ​ເຈົ້າ​ໜ້າ­ທີ່​ບັນ­ຊາ​ລົດ­ໄຟ ແລະ ພະ­ນັກ­ງານ​ບໍ­ລິ­ການ ກ່ຽວ​ກັບ​ວິ­ທີ​ການ​ແກ້​ໄຂ​ບັນ­ຫາ​ສຸກ​ເສີນ​ທີ່​ອາດ​ຈະ​ເກີດ​ຂຶ້ນ​ພາຍ​ໃນ​ລົດ­ໄຟ​ອີກ​ດ້ວຍ.

ຂ່າວທີ່ກ່ຽວຂ້ອງ