ລົງເສົາຂວັນກໍ່ສ້າງອາຄານສຳນັກງານ ປະທານສູນກາງພຸດທະສາສະໜາສຳພັນລາວ

203 21 ພ.ຈ. 2018 ຂ່າວໜ້າ​ໜຶ່ງ
ລົງເສົາຂວັນກໍ່ສ້າງອາຄານສຳນັກງານ ປະທານສູນກາງພຸດທະສາສະໜາສຳພັນລາວ

    ພິ­ທີ​ລົງ​ເສົາ­ຂວັນ​ກໍ່­ສ້າງ​ອາ­ຄານ​ສຳ­ນັກ­ງານ ປະ­ທານ​ສູນ​ກາງ​ພຸດ​ທະ​ສາ­ສະ­ໜາ​ສຳ­ພັນ​ລາວ (ອພສ) ຈັດ​ຂຶ້ນ​ວັນ​ທີ 20 ພະ­ຈິກ 2018 ຢູ່​ຫໍ​ທຳ​ມະ​ສະ­ພາ ໂດຍ​ມີ​ພະ​ອາ­ຈານ​ໃຫຍ່ ມະ­ຫາ​ງອນ ດຳ​ຣົງ​ບຸນ ປະ­ທານ ອພສ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທ່ານ ສົມ​ສະ­ຫວາດ ເລັ່ງ​ສະ​ຫວັດ ອະ­ດີດ​ຮອງ​ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ພັນ​ລະ​ຍາ​ການ​ນຳ ແລະ ຂະ­ແໜງ­ການ​ກ່ຽວ­ຂ້ອງ.

    ອາ­ຄານ​ສຳ­ນັກ­ງານ​ກຸດ­ຕິ​ອົງ​ພະ​ສັງ­ຄະ​ປະ­ທາ­ນາ­ທິ­ບໍ­ດີ ສະ­ກົນ​ມະ­ຫາ​ສັງ­ຄະ​ປາ​ໂມກ ຫຼື ອາ­ຄານ​ສຳ­ນັກ­ງານ​ປະ­ທານ ອພສ ເປັນ​ບຸ­ລິ­ມະ­ສິດ​ຂອງ​ໂຄງ­ການ​ກໍ່­ສ້າງ​ອາ­ຄານ​ສຳ­ນັກ­ງານ​ສົງ ອພສ ທັງ 3 ຫຼັງ ເຊິ່ງ​ອາ­ຄານ​ດັ່ງ­ກ່າວ ເປັນ​ອາ­ຄານ​ຄອນ​ກຣິດ 2 ຊັ້ນ ຮູບ­ຊົງ​ເອ­ກະ­ລັກ​ຂອງ​ລາວ ມີ​ຄວາມ​ກວ້າງ 32.700 ແມັດ ຍາວ 36.500 ແມັດ ຄວາມ​ສູງ​ຂອງ​ຍອດ​ຊໍ່­ຟ້າ 22 ແມັດ ສ້າງ​ຂຶ້ນ​ມາ​ເພື່ອ​ເປັນ​ບ່ອນ​ສະ­ຖິດ​ຢູ່​ຂອງ​ອົງ​ພະ​ປະ­ມຸກ​ສົງ ສປປ ລາວ ທຸກໆ​ອົງ ເຊິ່ງ​ເປັນ​ເໝືອນ​ດັ່ງ​ຍອດ​ພະ​ເຈ­ດີ ທີ່​ເຄົາ­ລົບ​ສັກ­ສິດ​ສັກ­ກາ­ລະ​ບູ­ຊາ​ຂອງ​ມວນ​ພະ­ສົງ ແລະ ພຸດ​ທະ​ສາ​ສະ​ນິ​ກະ​ຊົນ​ລາວ​ທັງ​ປວງ ອາ­ຄານ​ກຸດ­ຕິ​ປະ­ທານ​ສົງ​ບໍ່​ພຽງ​ແຕ່​ເປັນ​ບ່ອນ​ສະ­ຖິດ​ຂອງ​ປະ­ທານ​ສົງ​ສູນ​ການ ອພສ ເທົ່າ​ນັ້ນ ແຕ່​ມັນ​ມີ​ຄວາມ​ໝາຍ​ສຳ­ຄັນ​ຕໍ່​ຊາດ ແລະ ພະ​ພຸດ​ທະ​ສາດ­ສະ­ໜາ ເປັນ​ມູນ​ມໍ​ລະ​ດົນ​ອັນ​ລ້ຳ​ຄ່າ ເອກ­ອ້າງ​ເປັນ​ມູນ­ເຊື້ອ​ທາງ​ປະ­ຫວັດ­ສາດ ແລະ ເປັນ​ສິ­ລະ​ປະ ວັດ­ທະ­ນະ­ທຳ ຂອງ​ລາວ.

    ໂຄງ­ການ​ກໍ່­ສ້າງ​ອາ­ຄານ​ສຳ­ນັກ­ງານ ອພສ ອາ­ຄານ​ປະ­ທານ​ສົງ ແລະ ອາ­ຄານ​ອາ­ຄັນ­ຕຸ­ກະ​ຂອງ​ສູນ​ກາງ ອພສ ໄດ້​ວາງ​ສີ​ລາ​ລຶກ​ເດືອນ​ມິ­ຖຸ­ນາ 2018 ຜ່ານ​ມາ ໂດຍ​ບໍ­ລິ­ສັດ​ພູ­ມີ​ພູນ​ຊັບ ເປັນ​ຜູ້​ລົງ­ທຶນ​ກ່ອນ ຈາກ​ນັ້ນ ຈິ່ງ​ຊຳ­ລະ​ຕາມ​ຫຼັງ ພາຍ­ຫຼັງ​ວາງ​ສີ​ລາ​ລຶກ ກໍ່​ໄດ້​ມີ​ການ​ລະ­ດົມ​ທຶນ​ຈາກ​ປະ­ຊາ­ຊົນ ພໍ່­ຄ້າ​ຊາວ​ຂາຍ​ທັງ​ພາຍ​ໃນ ແລະ ຕ່າງ­ປະ­ເທດ ໂດຍ​ສາ­ມາດ​ລະ­ດົມ​ທຶນ​ໄດ້ 1 ຕື້​ກວ່າ​ກີບ 8 ແສນ​ບາດ ແລະ 4.000 ໂດ​ລາ​ສະ­ຫະ­ລັດ ແລະ ຍັງ​ມີ​ຫຼາຍ​ພາກ­ສ່ວນ​ສືບ­ຕໍ່​ສັດ­ທາ​ຢ່າງ​ຕໍ່​ເນື່ອງ ໂດຍ​ອີງ­ໃສ່​ງົບ­ປະ­ມານ​ທີ່​ໄດ້​ມາ ຈິ່ງ​ໄດ້​ຕົກ­ລົງ​ສ້າງ​ເທື່ອ​ລະ​ຫຼັງ ໂດຍ​ຈະ​ສ້າງ​ກຸດ­ຕິ​ປະ­ທານ​ສົງ​ກ່ອນ ມູນ​ຄ່າ 23 ຕື້​ກວ່າ​ກີບ ເຊິ່ງ​ບໍ­ລິ­ສັດ ພູ­ມີ​ພູນ​ຊັບ ເປັນ​ຜູ້​ຮັບ​ເໝົາ​ກໍ່­ສ້າງ.

ຂ່າວທີ່ກ່ຽວຂ້ອງ