ຜູ້ທີ່ໃຊ້ລົດໃຊ້ຖະໜົນ ພ້ອມກັນປະຕິບັດກົດລະບຽບຈະລາຈອນ

156 21 ພ.ຈ. 2018 ຂ່າວໜ້າ​ໜຶ່ງ
ຜູ້ທີ່ໃຊ້ລົດໃຊ້ຖະໜົນ ພ້ອມກັນປະຕິບັດກົດລະບຽບຈະລາຈອນ

    ບຸນ​ນະ­ມັດ­ສະ­ການ​ພະ​ທາດ­ຫຼວງ ແລະ ງານ​ວາງ­ສະ­ແດງ​ສິນ­ຄ້າ ປະ­ຈຳ​ປີ 2018 ເຈົ້າ​ໜ້າ­ທີ່​ຕຳ­ຫຼວດ​ຈະ­ລາ­ຈອນ ພົບ​ເຫັນ​ຜູ້​ຂັບ​ຂີ່​ບາງ​ຄົນ​ທີ່​ລະ­ເມີດ​ກົດ​ລະ­ບຽບ​ຈະ­ລາ­ຈອນ ເຮັດ​ໃຫ້​ສະ­ພາບ​ການ​ສັນ­ຈອນ​ມີ​ຄວາມ​ແອ​ອັດ ແລະ ສັບ­ສົນ​ຢູ່​ບາງ​ເສັ້ນ­ທາງ​ຄື: ເສັ້ນ­ທາງ​ໜອງ​ບອນ ສາມ​ແຍກ​ນາ​ໄຊ ໄຟ​ແດງ​ທາດ­ຫຼວງ ແລະ ສາມ​ແຍກ​ໄປ­ສະ­ນີ (ສາ­ຂາ​ໜອງ​ບອນ) ສ່ວນ​ໃຫຍ່​ແມ່ນ​ລົດ​ໃຫ້​ບໍ­ລິ­ການ​ຕຸກໆ ຈຳ​ໂບ້ ແລະ ຜູ້​ປະ­ກອບ​ການ​ຕັ້ງ​ຄອກ​ຝາກ​ລົດ​ຢູ່​ຕາມ​ແຄມ​ທາງ.

    ທ່ານ ພັນ​ຕີ ສິນ​ທະ­ລາ ດວງ​ປະ­ເສີດ ຫົວ­ໜ້າ​ກອງ­ຮ້ອຍ​ຈະ­ລາ­ຈອນ​ເມືອງ​ໄຊ​ເຊດ​ຖາ ໃຫ້​ສຳ­ພາດ​ວັນ​ທີ 19 ພະ­ຈິກ 2018 ວ່າ: ພະ​ແນກ​ຕຳ­ຫຼວດ​ຈະ­ລາ­ຈອນ​ນະ­ຄອນ­ຫຼວງ​ວຽງ​ຈັນ ໄດ້​ສ້າງ​ແຜນ​ບັນ­ຈຸ​ກຳ­ລັງ​ເຂົ້າ​ປ້ອງ​ກັນ​ໃນ​ງານ​ບຸນ​ນະ­ມັດ­ສະ­ການ​ພະ​ທາດ­ຫຼວງ ແລະ ງານ​ວາງ­ສະ­ແດງ​ສິນ­ຄ້າ​ທີ່​ສູນ​ການ​ຄ້າ​ລາວ-ໄອ​ເຕັກ ແຕ່​ວັນ​ທີ 16-25 ພະ­ຈິກ ເປັນ­ຕົ້ນ​ມາ 350 ສະ­ຫາຍ ເຂົ້າ​ປ້ອງ​ກັນ​ທັງ​ໝົດ 70 ຈຸດ ໃນ​ນີ້ ມີ​ເຈົ້າ​ໜ້າ­ທີ່​ຕຳ­ຫຼວດ​ຈະ­ລາ­ຈອນ​ເມືອງ​ໄຊ​ເຊດ​ຖາ 70 ສະ­ຫາຍ ໄດ້​ເຂົ້າ​ປະ­ຈຳ​ຢູ່​ຖະ­ໜົນ​ທີ່​ມີ​ຄວາມ​ແອ​ອັດ ແລະ ສັບ­ສົນ ຕະ­ຫຼອດ​ໄລ­ຍະ 4 ວັນ​ທີ່​ຜ່ານ​ມາ (16-19 ພະ­ຈິກ) ເຈົ້າ​ໜ້າ­ທີ່​ພົບ​ບັນ­ຫາ​ທີ່​ຫຍຸ້ງ­ຍາກ ເປັນ­ຕົ້ນ ການ​ໃຊ້​ລົດ​ໃຊ້​ຖະ­ໜົນ​ຂອງ​ຜູ້​ຄົນ​ທີ່​ເຂົ້າ​ມາ​ທ່ຽວ​ຊົມ​ບຸນ ບາງ​ຄົນ​ກໍ່​ຍັງ​ຈອດ​ລົດ​ແບບ​ຊະ­ຊາຍ ລົດ​ຕຸກໆ ແລະ ລົດ​ຈຳ​ໂບ້ ຍັງ​ບໍ່​ປະ­ຕິ­ບັດ​ຕາມ​ຄຳ​ສັ່ງ ແລະ ແນະ­ນຳ​ຂອງ​ເຈົ້າ​ໜ້າ­ທີ່ ພ້ອມ​ນີ້ ຍັງ​ມີ​ບາງ​ຄົນ​ສວຍ­ໂອ­ກາດ​ຕັ້ງ​ຄອກ​ຝາກ​ລົດ​ໃສ່​ທາງ​ຄົນ​ຍ່າງ ແລະ ຕັ້ງ​ຮ້ານ​ຂາຍ­ເຄື່ອງ​ໃສ່​ແຄມ​ທາງ ເຮັດ​ໃຫ້­ການ​ສັນ­ຈອນ​ໄປ​ມາ​ຍິ່ງ​ມີ​ຄວາມ​ແອ​ອັດ​ຂຶ້ນ​ຕື່ມ.

    ເພື່ອ​ເຮັດ​ໃຫ້​ງານ​ບຸນ​ດັ່ງ­ກ່າວ ມີ​ຄວາມ​ສະ­ຫງົບ​ປອດ​ໄພ ເປັນ​ລະ­ບຽບ​ຮຽບ​ຮ້ອຍ ແລະ ຫຼຸດ­ຜ່ອນ​ບັນ­ຫາ​ອຸ­ບັດ​ຕິ​ເຫດ​ທີ່​ຈະ​ເກີດ​ຂຶ້ນ ຈຶ່ງ​ຮຽກ­ຮ້ອງ​ມາ​ຍັງ​ຜູ້​ທີ່​ໃຊ້​ລົດ ໃຊ້​ຖະ­ໜົນ ພ້ອມ​ກັນ​ປະ­ຕິ­ບັດ​ຕາມ​ກົດ​ລະ­ບຽບ​ຈະ­ລາ­ຈອນ ແລະ ແຈ້ງ​ການ​ຂອງ​ເຈົ້າ​ໜ້າ­ທີ່​ຢ່າງ​ເຂັ້ມ​ງວດ ນັບ​ແຕ່​ຕົ້ນ​ເດືອນ​ມັງ­ກອນ-ທ້າຍ​ເດືອນ​ຕຸ­ລາ 2018 ທົ່ວ​ເມືອງ​ໄຊ​ເຊດ​ຖາ ມີ​ອຸ­ບັດ​ຕິ​ເຫດ​ເກີດ​ຂຶ້ນ 131 ເລື່ອງ ພາ­ຫະ­ນະ​ເປ່​ເພ​ເລັກ​ໜ້ອຍ 80 ຄັນ ສົມ­ຄວນ 182 ຄັນ ໃຊ້​ການ​ບໍ່​ໄດ້ 3 ຄັນ ບາດ­ເຈັບ​ເລັກ​ໜ້ອຍ 32 ຄົນ ສົມ­ຄວນ 72 ຄົນ ສາ­ຫັດ 21 ຄົນ ເສຍ​ຊີ­ວິດ 22 ຄົນ ໃນ​ນີ້ ມີ​ລົດ­ຈັກ​ຕຳ​ລົດ­ຈັກ​ເສຍ​ຊີ­ວິດ 11 ຄົນ ລົດ­ຈັກ​ຕຳ​ລົດ​ໃຫຍ່​ເສຍ​ຊີ­ວິດ 9 ຄົນ ລົດ​ບັນ­ທຸກ​ຕຳ​ລົດ​ໃຫຍ່​ເສຍ​ຊີ­ວິດ 2 ຄົນ ເຊິ່ງ​ສາ­ເຫດ​ຫຼັກ​ຂອງ​ການ​ເກີດ​ອຸ­ບັດ​ຕິ​ເຫດ​ໃນ​ແຕ່​ລະ​ຄັ້ງ ແມ່ນ​ມາ​ຈາກ​ການ​ດື່ມ​ສິ່ງ​ມຶນ­ເມົາ​ແລ້ວ​ຂັບ ຂັບ​ລົດ​ໄວ​ເກີນ​ກຳ­ນົດ ແລະ ອື່ນໆ.

ຂ່າວທີ່ກ່ຽວຂ້ອງ