ຂ່າວຫຼ້າສຸດ

ລັດຖະບານ ປະກອບຄໍາເຫັນໃສ່ເອກະສານ 5 ສະບັບ

355 20 ພ.ຈ. 2018 ຂ່າວໜ້າ​ໜຶ່ງ
ລັດຖະບານ ປະກອບຄໍາເຫັນໃສ່ເອກະສານ 5 ສະບັບ

    ກອງ​ປະ­ຊຸມ​ລັດ­ຖະ­ບານ​ສະ­ໄໝ​ສາ­ມັນ ປະ­ຈຳ​ເດືອນ​ພະ­ຈິກ 2018 ເທື່ອ​ທີ 2 ໄດ້​ດຳ­ເນີນ​ວັນ​ທີ 19 ພະ­ຈິກ 2018 ຢູ່​ຫ້ອງ​ວ່າ­ການ​ລັດ­ຖະ­ບານ ໂດຍ​ເປັນ​ປະ­ທານ​ຂອງ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ມີ​ບັນ­ດາ​ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ແລະ ສະ­ມາ­ຊິກ​ລັດ­ຖະ­ບານ​ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້ ໄດ້​ສຸມ​ໃສ່​ພິ­ຈາ­ລະ­ນາ ແລະ ປະ­ກອບ​ຄຳ​ເຫັນ​ເຂົ້າ​ໃສ່​ເອ­ກະ­ສານ​ສຳ­ຄັນ 5 ສະ­ບັບ​ຄື: ບົດ​ລາຍ​ງານ​ກ່ຽວ​ກັບ​ສະ­ພາບ​ການ​ພົ້ນ​ເດັ່ນ ໃນ​ການ­ເຄື່ອນ­ໄຫວ​ວຽກ​ງານ​ພົ້ນ​ເດັ່ນ​ຂອງ​ລັດ­ຖະ­ບານ​ໄລ­ຍະ​ຜ່ານ​ມາ ແລະ ທິດ​ທາງ​ວຽກ​ງານ​ຈຸດ​ສຸມ​ໃນ­ຕໍ່­ໜ້າ ບົດ​ລາຍ​ງານ​ກ່ຽວ​ກັບ​ຄວາມ​ຄືບ​ໜ້າ​ການ­ຈັດ­ຕັ້ງ​ປະ­ຕິ­ບັດ​ຄຳ​ສັ່ງ ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ສະ­ບັບ​ເລກ​ທີ 02/ນຍ ວ່າ​ດ້ວຍ​ການ­ຈັດ­ຕັ້ງ​ປະ­ຕິ­ບັດ 8 ມາດ​ຕະ­ການ​ຊຸກ­ຍູ້​ເສດ­ຖະ­ກິດ​ມະ­ຫາ​ພາກ ຮ່າງ​ດຳ­ລັດ​ວ່າ​ດ້ວຍ​ກອງ​ທຶນ​ສົ່ງ­ເສີມ​ທຸ­ລະ​ກິດ​ຂະ­ໜາດ​ນ້ອຍ ແລະ ຂະ­ໜາດ​ກາງ ຮ່າງ​ດຳ­ລັດ​ວ່າ​ດ້ວຍ​ການ​ປະ​ເມີນ​ຜົນ​ກະ­ທົບ​ຕໍ່​ສິ່ງ­ແວ­ດລ້ອມ ຍຸດ​ທະ​ສາດ​ວ່າ​ດ້ວຍ​ການ​ເຕີບ​ໂຕ​ສີ­ຂຽວ​ແຫ່ງ​ຊາດ ຮອດ​ປີ 2030.

    ຕໍ່​ກັບ​ບົດ​ລາຍ​ງານ​ກ່ຽວ​ກັບ​ສະ­ພາບ​ການ­ເຄື່ອນ­ໄຫວ ວຽກ​ງານ​ພົ້ນ​ເດັ່ນ​ຂອງ​ລັດ­ຖະ­ບານ​ໃນ​ໄລ­ຍະ​ຜ່ານ​ມາ ແລະ ທິດ​ທາງ​ວຽກ​ງານ​ຈຸດ​ສຸມ​ໃນ­ຕໍ່­ໜ້າ ແລະ ບົດ​ລາຍ​ງານ​ກ່ຽວ​ກັບ​ຄວາມ​ຄືບ​ໜ້າ ໃນ​ການ­ຈັດ­ຕັ້ງ​ປະ­ຕິ­ບັດ​ຄຳ​ສັ່ງ​ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ສະ­ບັບ​ເລກ​ທີ 02/ນຍ ວ່າ​ດ້ວຍ​ການ­ຈັດ­ຕັ້ງ​ປະ­ຕິ­ບັດ 8 ມາດ​ຕະ­ການ​ຊຸກ­ຍູ້​ເສດ­ຖະ­ກິດ​ມະ­ຫາ​ພາກ ໄດ້​ເປັນ​ເອ­ກະ​ພາບ​ຮັບ­ຮອງ​ເອົາ ແລະ ໄດ້​ຊີ້​ນຳ​ໃຫ້​ພາກ­ສ່ວນ​ທີ່​ກ່ຽວ­ຂ້ອງ ນຳ­ໄປ​ປັບ­ປຸງ​ຕາມ​ການ​ປະ­ກອບ​ຄຳ​ຄິດ​ເຫັນ​ຂອງ​ສະ­ມາ­ຊິກ​ລັດ­ຖະ­ບານ ໃຫ້​ມີ​ເນື້ອ​ໃນ​ຈະ­ແຈ້ງ ຮັດ­ກຸມ ແລະ ມີ​ເຫດ​ມີ​ຜົນ ເປັນ​ຂໍ້​ມູນ​ທີ່​ເປັນ​ລະ­ບົບ​ຄົບ​ຊຸດ ເພື່ອ​ນຳ​ສະ­ເໜີ​ຕໍ່​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ພິ­ຈາ­ລະ­ນາ​ຮັບ­ຮອງ ສຳ­ລັບ​ຮ່າງ​ດຳ­ລັດ​ວ່າ​ດ້ວຍ​ກອງ​ທຶນ​ທຸ­ລະ​ກິດ​ຂະ­ໜາດ​ນ້ອຍ ແລະ ຂະ­ໜາດ​ກາງ ໃຫ້​ນຳ­ໄປ​ປັບ­ປຸງ​ຄືນ ຕາມ​ການ​ປະ­ກອບ​ຄຳ​ຄິດ​ເຫັນ​ຂອງ​ສະ­ມາ­ຊິກ​ລັດ­ຖະ­ບານ ແລ້ວ​ນຳ​ມາ​ສະ­ເໜີ​ຜ່ານ​ກອງ​ປະ­ຊຸມ​ນາ­ຍົກ-ຮອງ​ນາ­ຍົກ​ພິ­ຈາ­ລະ­ນາ​ຕົກ­ລົງ ສ່ວນ​ຮ່າງ​ດຳ­ລັດ​ວ່າ​ດ້ວຍ​ການ​ປະ​ເມີນ​ຜົນ​ກະ­ທົບ​ຕໍ່​ສິ່ງ­ແວ­ດລ້ອມ ແລະ ຍຸດ​ທະ​ສາດ​ເຕີບ​ໂຕ​ສີ­ຂຽວ​ແຫ່ງ​ຊາດ​ຂອງ ສປປ ລາວ ແມ່ນ​ໄດ້​ຮັບ­ຮອງ​ເອົາ​ດ້ານ​ຫຼັກ­ການ ໂດຍ​ມອບ​ໃຫ້​ພາກ­ສ່ວນ​ກ່ຽວ­ຂ້ອງ​ນຳ­ໄປ​ປັບ­ປຸງ​ໃຫ້​ຮັດ­ກຸມ ແລ້ວ​ຈຶ່ງ​ປະ­ກາດ​ໃຊ້​ເປັນ​ທາງ​ການ ນອກ​ນີ້​ຍັງ​ເປັນ​ເອ­ກະ​ພາບ ເພື່ອ​ພ້ອມ​ກັນ​ຈັດ​ຕັ້ງ​ປະ­ຕິ­ບັດ​ວຽກ​ງານ​ຈຸດ​ສຸມ​ໃນ​ເດືອນ​ທັນ­ວາ 2018 ຕື່ມ​ອີກ.

ຂ່າວທີ່ກ່ຽວຂ້ອງ