ກະດູກທຽມຫົດຢືດໄດ້ຈາກ “ເຄື່ອງພິມສາມມິຕິ” ປ່ຽນໂສມໜ້າການຜ່າຕັດກະດູກ

309 20 ພ.ຈ. 2018 ຫົວຂໍ້ຂ່າວອື່ນໆ

    ແພດ​ສັນ­ລະ­ຍະ­ກຳ​ກະ­ດູກ ເນຍ​ຣາ​ຟ ຊາ (Nirav Shah) ຊ່ຽວ­ຊານ​ດ້ານ​ກະ­ດູກ​ບ່າ​ໄຫຼ່ ແລະ ຫົວ­ເຂົ່າ ເຂົາ​ໄດ້​ຜ່າ­ຕັດ​ປ່ຽນ​ກະ­ດູກ​ບ່າ​ໄຫຼ່​ໃຫ້​ກັບ ລູ​ຊີ ບອຍ​ຢາດ​ເຈນ (Lucie Boyadjian) ຄົນ​ເຈັບ​ຄົນ​ໜຶ່ງ ເມື່ອ​ສາມ​ເດືອນ​ທີ່​ຜ່ານ​ມາ ໂດຍ​ແພດ​ສັນ­ລະ­ຍະ­ກຳ ໄດ້​ໃຊ້​ຂໍ້​ຕໍ່​ບ່າ​ໄຫຼ່​ທຽມ​ໄທ​ທາ​ນຽມ​ໃນ​ການ­ຜ່າ­ຕັດ ແລະ ລູ​ຊີ່ ຮູ້­ສຶກ​ເປັນ​ປົກ­ກະ­ຕິ​ດີ.

    ແຕ່​ຜົນ​ການ­ຜ່າ­ຕັດ​ຈະ​ເປັນ​ແນວ­ໃດ ຫາກ​ແພດ​ສັນ­ລະ­ຍະ­ກຳ ສາ­ມາດ​ສັ່ງ​ກະ­ດູກ​ຂໍ້​ຕໍ່​ບ່າ​ໄຫຼ່​ທຽມ​ຜະ­ລິດ​ຂຶ້ນ​ດ້ວຍ​ເຄື່ອງ­ພິມ​ສາມ​ມິ​ຕິ ຊຶ່ງ​ສັ່ງ​ພິມ​ໄດ້​ຕາມ​ຂະ­ໜາດ​ຂອງ​ບ່າ​ໄຫຼ່​ຂອງ​ລູ​ຊີ່.

    ທ່ານ ຣາ​ເມວ ຊາ (Ramille Shah) ນັກ­ວິ­ທະ­ຍາ­ສາດ​ດ້ານ​ວັດ​ສະ​ດຸ​ທີ່​ມະ­ຫາ­ວິ­ທະ­ຍາ­ໄລ ນອດ​ເວ​ສ​ເທິນ ແລະ ເມຍ​ຂອງ​ນາຍ​ແພດ ຣາ​ເມວ ຊາ ໄດ້​ຮ່ວມ​ມື​ກັບ​ທ່ານ ອະ​ດຳ ເຈ​ຄັສ ວິ­ສະ­ວະ­ກອນ ຕະ­ຫຼອດ​ຈົນ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ມູນ​ນິ­ທິ​ວິ­ທະ­ຍາ­ສາດ​ແຫ່ງ​ຊາດ​ສະ­ຫະ­ລັດ (National Science Foundation) ເພື່ອ​ພັດ­ທະ­ນາ​ກະ­ດູກ​ທຽມ​ແບບ​ໃໝ່​ທີ່​ພິມ​ດ້ວຍ​ເຄື່ອງ­ພິມ​ສາມ​ມິ​ຕິ ເອີ້ນ​ວ່າ “Hyperelastic Bone”.

    ນາຍ​ແພດ ຣາ​ເມວ ຊາ ກ່າວ​ຕື່ມ​ວ່າ ທ່ານ ຣາ​ມິນ ກັບ ອະ​ດຳ ໄດ້​ພັດ­ທະ­ນາ​ວັດ​ສະ​ດຸ​ໃໝ່ ທີ່​ບໍ່​ມີ​ເອ­ກະ­ລັກ​ສະ­ເພາະ​ຕົວ ແລະ ເປັນ​ນະ​ວັດ­ຕະ​ກຳ​ທີ່​ກ້າວ­ໜ້າ​ຫຼາຍ ຈະ​ຊ່ວຍ​ປ່ຽນ​ໂສມ​ໜ້າ​ການ­ຜ່າ­ຕັດ​ກະ­ດູກ ທ່ານ ຣາ​ມິນ.

    ທ່ານ ຣາ​ເມວ ຊາ ກ່າວ​ວ່າ ເຄື່ອງ­ພິມ​ສາມ​ມິ​ຕິ ຊ່ວຍ​ໃຫ້​ທີມ​ງານ​ຂອງ​ຕົນ​ພິມ​ຊິ້ນ​ກະ­ດູກ​ທຽມ​ໄດ້​ຕາມ​ຂະ­ໜາດ ທີ່​ເໝາະ​ກັບ​ຜູ້​ປ່ວຍ​ແຕ່­ລະ­ຄົນ​ໄດ້ ຍົກ​ຕົວ­ຢ່າງ ຫາກ​ຜູ້​ປ່ວຍ​ໄດ້​ຮັບ​ອາ­ການ​ບາດ­ເຈັບ​ທີ່​ກະ­ດູກ​ຫຸ້ມ​ສະ­ໝອງ​ກັບ​ກະ­ດູກ​ໃບ​ໜ້າ ທີມ​ງານ​ສາ­ມາດ​ສະ​ແກນ​ກະ­ດູກ​ສ່ວນ​ທີ່​ເສຍ​ຫາຍ ແລະ ພິມ​ຊິ້ນ​ກະ­ດູກ​ທຽມ​ອອກ​ມາ​ໃຫ້​ໄດ້​ຂະ­ໜາດ ແລະ ຮູບ­ຊົງ​ທີ່​ຈຳ­ເປັນ​ຕ້ອງ​ໃຊ້.

    ກະ­ດູກ​ທຽມ​ທີ່​ມີ​ຄວາມ​ຫົດ​ຍືດ​ສູງ​ຊະ­ນິດ​ໃໝ່​ນີ້ ແຕກ​ຕ່າງ​ຈາກ​ກະ­ດູກ​ຈິງ​ຂອງ​ຜູ້​ປ່ວຍ ແລະ ກະ­ດູກ​ທຽມ​ທີ່​ເຮັດ​ຈາກ​ໂລ­ຫະ ກັບ ເຊ​ຣາ​ມິກ​ຊະ­ນິດ​ດັ່ງ​ເດີມ ກົງ​ກັບ​ທີ່​ເຮັດ​ຈາກ​ເຊ​ຣາ​ມິກ ທີ່​ມີ​ຄວາມ​ຫົດ​ຍືດ ແລະ ສາ­ມາດ​ກັບ​ຄືນ​ສູ່​ຮູບ­ຊົງ​ປົກ­ກະ­ຕິ​ໄດ້ ເຖິງ​ແມ່ນ​ຈະ​ຖືກ​ກົດ​ທັບ​ແຮງໆ.

    ການ​ຜະ­ລິດ​ກະ­ດູກ​ທຽມ​ຫົດ​ຍືດ​ໄດ້​ເລີ່ມ​ຈາກ​ນ້ຳ​ເໝິກ ແລະ ຖືກ​ພິມ​ອອກ​ມາ​ຕາມ​ຮູບ­ຊົງ ແລະ ຂະ­ໜາດ​ທີ່​ແພດ​ສັນ­ລະ­ຍະ­ກຳ ຕ້ອງ­ການ​ໃຊ້​ວຽກ​ຂັ້ນ​ຕອນ​ນີ້​ເຮັດ​ໄດ້​ຢ່າງ​ວ່ອງ­ໄວ ແລະ ພິມ​ໄດ້​ໃນ​ອຸນ­ຫະ­ພູມ​ຫ້ອງ.

    ທ່ານ ຣາ​ມິນ ຊາ ຜູ້​ພັດ­ທະ­ນາ​ວັດ​ສະ​ດຸ​ກະ­ດູກ​ທຽມ​ຫົດ​ຍືດ​ສູງ ກ່າວ​ວ່າ ເຄື່ອງ­ພິມ​ສາ­ມາດ​ພິມ​ວັດ​ສະ​ດຸ​ໄດ້​ຕາມ​ແຕ່​ເຮົາ​ຕ້ອງ­ການ ພິມ​ລົງ​ໄດ້​ທຸກ​ພື້ນ​ຜິວ ແລະ ຮູບ­ຊົງ ແລະ ທີມ​ງານ​ຍັງ​ພິມ​ວັດ​ສະ​ດຸ​ອອກ​ມາ​ໃນ​ຮູບ​ແຜ່ນ​ອີກ​ດ້ວຍ.

    ທ່ານ​ກ່າວ​ວ່າ ແຜ່ນ​ກະ­ດູກ​ທຽມ​ບາງ​ຊະ­ນິດ​ທີ່​ພິມ​ອອກ​ມາ​ສາ­ມາດ​ນຳ­ໄປ​ຕັດ​ອອກ​ເປັນ​ຮູບ­ຊົງ ແລະ ຂະ­ໜາດ​ທີ່​ແພດ​ຕ້ອງ­ການ​ໃນ​ການ​ໃຊ້​ງານ ອາດ​ຈະ​ມ້ວນ ຫຼື​ອາດ​ຈະ​ໃຊ້​ໃນ​ຮູບ​ແຜ່ນ​ປິດ​ແຜ​ກໍ່​ໄດ້ ແລະ ຫຼັງ​ຈາກ​ຜ່າ­ຕັດ​ແລ້ວ ກະ­ດູກ​ທຽມ​ຫົດ​ຍືດ​ສູງ ຊ່ວຍ​ກະ​ຕຸ້ນ​ໃຫ້​ເນື້ອ​ເຍື່ອ​ຂະ­ຫຍາຍ­ຕົວ​ໄດ້.

    ນັກ​ວິ­ໄຈ​ກ່າວ​ວ່າ ເມື່ອ​ຝັງ​ຊິ້ນ​ກະ­ດູກ​ທຽມ​ແກ່​ຜູ້​ປ່ວຍ​ແລ້ວ ກະ­ດູກ​ທຽມ hyperelastic ຈະ​ຄ່ອຍໆ​ກາຍ­ເປັນ​ສ່ວນ​ໜຶ່ງ​ຂອງ​ກະ­ດູກ​ຈິງ​ຂອງ​ຜູ້​ປ່ວຍ​ໃນ​ທີ່​ສຸດ.

    ກະ­ດູກ​ໃໝ່​ທີ່​ວ່າ​ນີ້ ລາ­ຄາ​ຖືກ​ກວ່າ​ກະ­ດູກ​ທຽມ​ຊະ­ນິດ​ອື່ນໆ​ທີ່​ມີ​ໃຊ້​ໃນ​ປັດ­ຈຸ­ບັນ ແລະ ໃຊ້​ງານ​ໄດ້​ດີ​ກວ່າ​ໃນ​ຫ້ອງ​ຜ່າ­ຕັດ ນາຍ​ແພດ ຊາ ກ່າວ​ວ່າ ແພດ​ສັນ­ລະ­ຍະ­ກຳ​ພ້ອມ​ທີ່​ຈະ​ອ້າ​ແຂນ​ຮັບ​ຄວາມ​ກ້າວ­ໜ້າ​ນີ້ ເພື່ອ​ຊ່ວຍ​ປັບ­ປຸງ​ການ­ຜ່າ­ຕັດ​ກະ­ດູກ​ແກ່​ຜູ້​ປ່ວຍ.

ຂ່າວທີ່ກ່ຽວຂ້ອງ