ຂ່າວຫຼ້າສຸດ

ຍ່າງ​ເພື່ອ​ສຸຂະພາບ ສະເຫຼີມສະຫຼອງ​ວັນ​ເດັກ​ໂລກ

467 20 ພ.ຈ. 2018 ວົງຈອນກີລາ
ຍ່າງ​ເພື່ອ​ສຸຂະພາບ ສະເຫຼີມສະຫຼອງ​ວັນ​ເດັກ​ໂລກ

      ຄະນະ​ກຳມາ​ທິ​ການ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ ແລະ ແມ່-ເດັກ ຮ່ວມ​ກັບ​ອົງການ​ອຸຍ​ນິ​ເຊັບ​ປະຈຳ​ລາວ ຈັດ​ພິທີ​ຍ່າງ​ເພື່ອ​ສຸຂະພາບ​ສະເຫຼີມສະຫຼອງ​ໂອກາດ​ວັນ​ເດັກ​ໂລກ ຄົບຮອບ 29 ປີ (20/11 /1989-20/11/2018) ຈັດຂຶ້ນ​ວັນ​ທີ 17 ພະຈິກ 2018 ຢູ່​ສວນ​ປະຕູ​ໄຊ ໂດຍ​ມີ​ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ປະທານ​ຄະນະ​ກຳມາ​ທິ​ການ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ ແລະ ເດັກ ພ້ອມ​ດ້ວຍ​ການ​ນຳ​ພັກ-ລັດ ທູ-ຕາ​ນຸ​ທູດ ອົງ​ການຈັດຕັ້ງ​ສາກົນ ຄູ-ອາຈານ​ ແລະ​ ນັກຮຽນ ​ເຂົ້າ​ຮ່ວມ.

    ສຳລັບ​ປີ 2018 ​ສປປ ລາວ ໄດ້​ສະເຫຼີມສະຫຼອງ​ວັນ​ດັ່ງກ່າວ ພາຍ​ໃຕ້​ຫົວຂໍ້ “ສ້າງ​ໂລກ​ດ້ວຍ​ພະລັງ​ເດັກ” ເຊິ່ງ​ປີ​ນີ້​ປະກອບ​ມີ​ກິດຈະກຳ​ຍ່າງ​ເພື່ອ​ສຸຂະພາບ​ນອກຈາກການສະແດງ​ຕ່າງໆ​ຈາກ​ເດັກແລ້ວ ໃນ​ຕອນ​ແລງ​ວັນ​ທີ 20 ພະຈິກ ຈະ​ໄດ້​ເປີດ​ໄຟ​ສີຟ້າ​ສ່ອງ​ໃສ່ 4 ດ້ານ​ຂອງ​ປະຕູ​ໄຊ ເພື່ອ​ເປັນ​ການ​ປູກ​ຈິດ​ສຳນຶກ​ໃຫ້​ຮູ້​ກ່ຽວ​ກັບ​ສິດທິ ແລະ ຄວາມ​ຕ້ອງການ​ຂອງ​ເດັກ​ໃນ​ທົ່ວ​ໂລກ ເພີ່ມ​ທະວີ​ການ​ມີ​ສ່ວນ​ຮ່ວມ​ປະກອບສ່ວນ​ໃຫ້​ຫຼາຍ​ຂຶ້ນ​ທັງ​ພາກ​ລັດ ແລະ ເອກະ​ຊົນ ເພື່ອ​ຊຸກຍູ້ ແລະ ສະໜັບສະໜູນ​ໃຫ້​ເດັກ ແລະ ໄວ​ໜຸ່ມ ລວມ​ທັງ​ເດັກ​ຜູ້​ທີ່​ມີ​ຄວາມ​ສ່ຽງ ແລະ ດ້ອຍ​ໂອກາດ​ໃຫ້​ໄດ້​ເຂົ້າ​ຮ່ວມ​ທຸກ​ການ​ພັດທະນາ​ທີ່​ກ່ຽວຂ້ອງ​ກັບ​ເດັກ ພ້ອມ​ທັງ​ເອົາໃຈໃສ່​ຮັບ​ຟັງ ແລະ ພິຈາລະນາ​ຄຳ​ເຫັນ​ຂອງ​ເດັກ ແລະ ໄວ​ໜຸ່ມ.

    ວັນ​ເດັກ​ໂລກ ເປັນ​ວາລະ​ໜຶ່ງ​ທີ່​ສຳຄັນ​ທົ່ວ​ໂລກ ພາຍ​ໃຕ້​ຄຳ​ຂວັນ “ສ້າງ​ໂລກ​ດ້ວຍ​ພະລັງ​ເດັກ” ເຊິ່ງ​ເດັກ​ຈາກ​ທົ່ວ​ໂລກ​ຈະ​ມາ​ຮ່ວມ​ກັນ​ດຳເນີນ​ການ​ຊ່ວຍ​ຊີວິດ​ເດັກ ຕໍ່ສູ້​ທວງ​ເອົາ​ສິດທິ ປະຕິບັດ​ຕາມ​ພອນ​ສະ ຫວັນ ແລະ ຂີດ​ຄວາມ​ສາມາດ​ຂອງ​ເຂົາເຈົ້າ ເພື່ອ​ສະໜັບສະໜູນ ແລະ ສ້າງ​ຈິດ​ສຳນຶກ​ຕໍ່​ບັນຫາ​ຕ່າງໆ​ທີ່​ເດັກ​ກຳລັງ​ປະ​ເຊີນ ປັດຈຸບັນ​ມີ​ເດັກ ແລະ ໄວ​ໜຸ່ມ 262 ລ້ານ​ຄົນ​ທີ່​ບໍ່​ໄດ້​ເຂົ້່າ​ໂຮງຮຽນ ແລະ ມີ​ເດັກ​ຍິງ ແລະ ແມ່ຍິງ 650 ລ້ານ​​ຄົົົົນ ແຕ່ງງານ​ກ່ອນ​ອາຍຸ 18 ປີ ໃນ​ປີຜ່ານມາ​ມີ​ເດັກ 5,4 ລ້ານ​ຄົນ ເສຍ​ຊີວິດ​ກ່ອນ​ວັນ​ເກີດ​ຄົບຮອບ 5 ປີ ຍ້ອນ​ພະຍາດ​ທີ່​ບໍ່​ສາມາດ​ປ້ອງ​ກັນ​ໄດ້ ເຊິ່ງ​ເຖິງ​ເວລາ​ແລ້ວ​ທີ່​ທຸກ​ຄົນ​ກໍ່​ຄື​ທຸກ​ພາກສ່ວນ​ຕ້ອງ​ໄດ້​ເອົາໃຈໃສ່​ຄືນ​ກ່ຽວ​ກັບ​ບັນຫາ​ຂອງ​ເດັກ​ມາ​ເປັນ​ອັນ​ດັບ​ໜຶ່ງ.

 

ຂ່າວທີ່ກ່ຽວຂ້ອງ