ກຸ່ມ​ບໍລິສັດ Lockheed Martin ໄດ້​ຮັບ​ສັນຍາ​ກ່ຽວ​ກັບ​ການ​ຂາຍ​ເຮືອບິນ​ມູນ​ຄ່າ 22,7 ຕື້​ໂດ​ລາ

98 19 ພ.ຈ. 2018 ຂ່າວຕ່າງປະເທດ
ກຸ່ມ​ບໍລິສັດ Lockheed Martin ໄດ້​ຮັບ​ສັນຍາ​ກ່ຽວ​ກັບ​ການ​ຂາຍ​ເຮືອບິນ​ມູນ​ຄ່າ 22,7 ຕື້​ໂດ​ລາ

    ຂ່າວສານ AFP ອ້າງ​ຕາມ​ຂໍ້​ມູນ​ຈາກ​ກະຊວງ​ປ້ອງ​ກັນ​ປະເທດ ສ ອາ​ເມ​ຣິ​ກາ ໃຫ້​ຮູ້ເມື່ອ​ວັນ​ທີ 15 ພະຈິກ​ທີ່​ຜ່ານ​ມາ​ວ່າ ໄດ້​ມອບ​ສັນຍາ​ໃຫ້​ແກ່​ກຸ່ມ​ບໍລິສັດ ລອກ​ຮິດ ມາ​ຕິນ (Lockheed Martin) ໃນ​ການ​ຜະລິດ​ເຮືອບິນ​ສູ້​ຮົບ F-35 ຈຳນວນ 225 ລຳ ເປັນ​ມູນ​ຄ່າ 22,7 ຕື້​ໂດ​ລາ​ສະຫະລັດ.

    ກະຊວງ​ປ້ອງ​ກັນ​ປະເທດ ສ ອາ​ເມ​ຣິ​ກາ ໃຫ້​ຮູ້​ວ່າ ໃນ​ຈຳນວນ​ເຮືອບິນ​ດັ່ງກ່າວ ມີ 106 ລຳ ຈະ​ຈັດ​ໃຫ້​ແກ່​ກອງທັບ ສ ອາ​ເມ​ຣິ​ກາ ຄື​ເຮືອບິນ F-35A ຈຳນວນ 64 ລຳ ປະກອບ​ໃຫ້​ແກ່​ກອງ​ກຳລັງ​ທະຫານ​ອາກາດ  ເຮືອບິນ F-35B ຈຳນວນ 26 ລຳ ປະກອບ​ໃຫ້​ແກ່​ກອງ​ກຳລັງ​ທະຫານ​ມາ​ຣິນ ແລະ​ເຮືອບິນ F-35C ຈຳນວນ 16 ລຳ ປະກອບ​ໃຫ້​ແກ່​ກອງທັບ​ເຮືອ. ສ່ວນ​ທີ່​ຍັງ​ເຫຼືອ ແມ່ນ​ຈະ​ໄດ້​ຮັບ​ການ​ອອກ​ແບບ ຕາມ​ຄວາມ​ຕ້ອງການ​ຂອງ​ບັນດາ​ປະເທດ​ທີ່​ເປັນ​ລູກ​ຄ້າ.

    ໂດຍ​ທີ່​ເປັນ​ຜູ້​ຮັບ​ເໝົາ​ສະໜອງ​ທີ່​ສຳຄັນ​ຂອງ​ທຳ​ນຽບ​ຫ້າ​ແຈ (ກະຊວງ​ປ້ອງ​ກັນ​ປະເທດ ສ ອາ​ເມ​ຣິ​ກາ) ນັ້ນ Lockheed Martin ຈະ​ໄດ້​ຮັບ​ເງິນ​ລ່ວງ​ໜ້າ​ຈາກ​ສັນຍາ ຈຳນວນ 6 ຕື້​ໂດ​ລາ​ສະຫະລັດ ໂດຍ​ມີ​ກຳນົດ​ສຳເລັດ​ພາຍ​ໃນ​ປີ  2023. ຂັ້ນ​ຕອນ​ການ​ຜະລິດ​ເຮືອບິນ​ດັ່ງກ່າວ ເກືອບ​ທັງ​ໝົດ ແມ່ນ​ປະຕິບັດ​ຢູ່​ໃນ ສ ອາ​ເມ​ຣິ​ກາ ແລະ​ມີ​ບາງ​ລາຍການ ຈະ​ໄດ້​ຮັບ​ການ​ຜະລິດ​ຢູ່​ໃນ​ອັງກິດ ແລະ​ອີ​ຕາ​ລີ.

    ໃນ​ຂະນະ​ດຽວ​ກັນ ທຳ​ນຽບ​ຫ້າ​ແຈ ກໍ​ໄດ້​ແຈ້ງ​ໃຫ້​ຮູ້​ເຖິງ​ການ​ສັ່ງ​ຈອງ​ເຮືອບິນ ເອ​ລີ​ກອບ​ແຕ​ສູ້​ຮົບ MH-60R ຈຳນວນ 8 ລຳ ຈາກ Lockheed Martin ໃນ​ມູນ​ຄ່າ 382 ລ້ານ​ໂດ​ລາ​ສະຫະລັດ.

 

ຂ່າວທີ່ກ່ຽວຂ້ອງ