ອິນ​ເຈີນ ເປັນ​ສະໜາມ​ບິນ​ແຫ່ງ​ທຳ​ອິດ​ໃນ ສ ເກົາຫຼີ ທີ່​ມີ​ລົດ​ບັດ​ຂັບ​ເຄື່ອນ​ດ້ວຍ​ຕົວ​ມັນ​ເອງ

114 19 ພ.ຈ. 2018 ຂ່າວຕ່າງປະເທດ
ອິນ​ເຈີນ ເປັນ​ສະໜາມ​ບິນ​ແຫ່ງ​ທຳ​ອິດ​ໃນ ສ ເກົາຫຼີ ທີ່​ມີ​ລົດ​ບັດ​ຂັບ​ເຄື່ອນ​ດ້ວຍ​ຕົວ​ມັນ​ເອງ

     ຕົວ​ແທນ​ຂອງ​ສະນາມ​ບິນ​ສາກົນ ອິນ​ເຈີນ (Incheon) ຂອງ ສ ເກົາຫຼີ ແຈ້ງ​ໃຫ້​ຮູ້ເມື່ອ​ບໍ່​ດົນ​ມາ​ນີ້​ວ່າ ໄດ້​ສຳເລັດ​ການ​ເດີນ​ລົດ​ບັດ​ທີ່​ຂັບ​ເຄື່ອນ​ດ້ວຍ​ຕົວ​ມັນ​ເອງ ເຮັດ​ໃຫ້​ອິນ​ເຈີນ ກາຍເປັນ​ສະໜາມ​ບິນ​ແຫ່ງ​ທຳ​ອິດ​ຢູ່​ໃນ ສ ເກົາຫຼີ ທີ່​ມີ​ການ​ຂົນສົ່ງ​ປະເພດ​ດັ່ງກ່າວ.

    ການ​ທົດ​ລອງ​ລົດ​ບັດ​ທີ່​ຂັບ​ເຄື່ອນ​ດ້ວຍ​ຕົວ​ມັນ​ເອງ ນັ້ນ​ມີ​ຂຶ້ນ​ຢູ່​ໃນ​ບໍລິເວນ​ເດີ່ນ​ຈອດ​ລົດ​ໄລຍະ​ຍາວ ຊຶ່ງ​ມີ​ຂຶ້ນ​ເມື່ອ​ວັນ​ທີ 9 ພະຈິກ​ທີ່​ຜ່ານ​ມາ. ພາຫະນະ​ແບບ​ບໍ່​ມີ​ຄົນ​ຂັບ​ດັ່ງກ່າວ ໄດ້​ແລ່ນ​ໃນ​ໄລຍະ​ທາງ​ຍາວ 2,2​ກມ ດ້ວຍ​ຄວາມ​ໄວ 30​ກມ/ຊົ່ວໂມງ ຢູ່​ເທິງ​ເສັ້ນທາງ​ທີ່​ຄົດ​ໂຄ້ງ​ຫຼາຍ​ຈຸດ ແລະ​ມີ​ຍວດ​ຍານພາຫະນະ​ແລ່ນ​​ຍະ​ຜ່ານ​ໄປ​ຜ່ານ​ມາ​ເປັນ​ປະຈຳ.

    ລົດ​ພິເສດ​ດັ່ງກ່າວ ເປັນ​ຜະລິດ​ຕະ​ພັນ​ທີ່​ພັດທະນາ​ຂຶ້ນ​ມາ​ຈາກ​ບັນດາ​ບໍລິສັດ​ໃນ ສ ເກົາຫຼີ ໃນ​ນັ້ນ​ມີ​ກຸ່ມ​ບໍລິສັດ KT ແລະ​ບໍລິສັດ Unmanned Solution ຜູ້​ໃຫ້ການ​ສະໜອງ​ເຕັກ​ໂນ​ໂລ​ຊີ ແບບ​ບໍ່​​ໍ​ມີ​ຄົນ​ຂັບ. ເມື່ອ​ເດືອນ​ຕຸລາ​ທີ່​ຜ່ານ​ມາ ສະໜາມ​ບິນ​ສາກົນ ອິນ​ເຈີນ ໄດ້​ເຊັນ​ບົດ​ບັນທຶກ ຊ່ວຍ​ຈຳ (MOU) ກັບ KT ວ່າ​ດ້ວຍ​ການ​ຮ່ວມ​ມື​ຜັນ​ຂະຫຍາຍ​ລົດ​ບັດ ທີ່​ຂັບ​ເຄື່ອນ​ດ້ວຍ​ຕົວ​ມັນ​ເອງ​ດັ່ງກ່າວ. ລົດ​ດັ່ງກ່າວ ສາມາດ​ສັນ​ລະ​ສູດ​ສະພາບ​ການ​ຄົມມະນາຄົມ​ຢູ່​ອ້ອມ​ຕົວ​ມັນ​ໄດ້ ເຊັ່ນ​ວ່າ ຍວດ​ຍານພາຫະນະ ຄົນ​ຍ່າງ ແລະ​ແລ່ນ​ຕາມ​ທາງ​ດ້ວຍ​ຕົວ​ມັນ​ເອງ.

 

ຂ່າວທີ່ກ່ຽວຂ້ອງ