ລັດຖະບານ​ອັງກິດ​ພົບ​ບັນຫາ ເມື່ອ​ລັດຖະມົນຕີ​ຫຼາຍ​ຄົນ​ລາ​ອອກ​ຈາກ​ຕຳແໜ່ງ

128 19 ພ.ຈ. 2018 ຂ່າວຕ່າງປະເທດ
ລັດຖະບານ​ອັງກິດ​ພົບ​ບັນຫາ ເມື່ອ​ລັດຖະມົນຕີ​ຫຼາຍ​ຄົນ​ລາ​ອອກ​ຈາກ​ຕຳແໜ່ງ

     ລັດຖະບານ​ອັງກິດ ພາຍ​ໃຕ້​ການ​ນຳພາ​ຂອງ​ນາຍົກລັດຖະມົນຕີ ເຕ​ເຣ​ຊາ ເມ ໄດ້​ຮັບ​ຂ່າວ ການ​ລາ​ອອກ​ຈາກ​ຕຳແໜ່ງ​ຕື່ມ​ອີກ​ລາຍ​ໜຶ່ງ ໃນ​ວັນ​ທີ 15 ພະຈິກ​ທີ່​ຜ່ານ​ມາ ເມື່ອ​ທ່ານ ເຣ​ມານ ຈິ​​ສ​ຕີ ຮອງ​ປະທານ​ພັກ​ຄອງ​ເດີມ ທີ່​ເປັນ​ພັກ​ກຳ​ອຳນາດ ປະກາດ​ເຖິງ​ການ​ອອກ​ໄປ​ຈາກ​ສຳນັກງານ ບ່ອນ​ເຮັດ​ວຽກ.

    ໃນ​ຄຳ​ຮ້ອງ​ຂໍ​ລາ​ອອກ​ຈາກ​ຕຳແໜ່ງ​ນັ້ນ ທ່ານ ຈີ​​ສ​ຕີ ໃຫ້​ຮູ້​ວ່າ ການ​ຕັດສິນ​ໃຈ​ລາ​ອອກ​ຂອງ​ເຂົາ ແມ່ນ​ເປັນ​ຍ້ອນ​ບໍ່​ເຫັນ​ພ້ອມ​ກັບ​ຮ່າງ​ຂໍ້​ຕົກລົງ ກ່ຽວ​ກັບ​ເລື່ອງ​ອັງກິດ​ຖອນ​ອອກ​ຈາກ​ສະຫະພາບ​ເອີ​ຣົບ (EU) ຫຼື​ທີ່​ເອີ້ນ​ວ່າ Brexit ທີ່​ຫາ​ກໍ​ບັນລຸ​ໄດ້​ນັ້ນ ພ້ອມ​ທັງ​ໝົດ​ຫວັງ​ຍ້ອນ​ວ່າ​ລັດຖະບານ ຂອງ​ນາຍົກລັດຖະມົນຕີ ເມ “ຂາດ​ກຳລັງ​ຄວາມ​ສາມາດ​ໃນ​ການ​ນຳພາ” ໃນ​ບັນຫາ​ຜູ້​ຍ້າຍ​ຖິ່ນ​ຖານ.

    ມາ​ຮອດ​ວັນ​ສຸກ​ທີ່​ຜ່ານ​ມາ ມີ​ສະມາຊິກ​ລັດ​ຖະ​ສະພາ​ຈາກ​ພັກ​ຄອງ​ເດີມ ປະມານ 40 ຄົນ ພ້ອມ​ທີ່​ຈະ​ປ່ອນ​ບັດ​ຕ້ານ​ກັບ​ຮ່າງ​ຂໍ້​ຕົກລົງ​ດັ່ງກ່າວ. ເພື່ອ​ໃຫ້​ຂໍ້​ກຳນົດ​ນັ້ນ​ໄດ້​ຮັບ​ການ​ຮັບຮອງ ນາຍົກລັດຖະມົນຕີ ເມ ຕ້ອງ​ໄດ້​ຮັບ​ສຽງ​ສະໜັບສະໜູນ​ຂອງ​ຂອງ​ສະມາຊິກ​ລັດ​ຖະ​ສະພາ ຢ່າງ​ໜ້ອຍ 320 ທ່ານ ຈາກ​ຈຳນວນ 650 ທ່ານ ໃນ​ສະພາ​ຕ່ຳ.

    ກ່ອນ​ການ​ປະກາດ​ລາ​ອອກ​ຈາກ​ຕຳແໜ່ງ​ຂອງ​ທ່ານ ຈິ​​ສ​ຕີ ກໍ​ມີ​ເຈົ້າ​ໜ້າທີ່​ໃນ​ຄະນະ​ລັດຖະບານ ຂອງ​ນາຍົກລັດຖະມົນຕີ ເມ ປະກາດ​ລາ​ອອກ​ຈາກ​ຕຳແໜ່ງ​ໄປ​ແລ້ວ 4 ທ່ານ ໂດຍ​ໃຫ້​ເຫດຜົນ ທີ່​ຄ້າຍຄື​ກັນ ນັ້ນ​ກໍ​ໄດ້ແກ່​ທ່ານ  ຊູ​ເອ​ລາ ບຣາ​ເວີ​ແມນ ຮອງ​ລັດຖະມົນຕີ​ຮັບຜິດຊອບ Brexit; ທ່ານ​ນາງ ເອ​​ສ​ເທີ ແມກ​ເວ ລັດຖະມົນຕີ​ວຽກ​ເຮັດ​ງານ​ທຳ ແລະ​ບຳນານ; ທ່ານ ໂດ​ມີ​ນິກ ແຣບ ລັດຖະມົນຕີ ຮັບຜິດຊອບ Brexit; ແລະ​ທ່ານ ຊາຍ​ເລ​​ສ ວາ​ຣາ ລັດຖະມົນຕີ​ປະຈຳ​ກະຊວງ ການ​ຕ່າງປະເທດ ຮັບຜິດຊອບ​ກ່ຽວ​ກັບ ອຽກ​ລັງ​ເໜືອ.

    ໃນ​ຂະນະ​ດຽວ​ກັນ ທ່ານ​ໂດ​ນາ​​ລ ​ທັສ ປະທານ​ສະພາ​ເອີ​ຣົບ​ເອີ​ຣົບ ປະກາດ​ໃນ​ວັນ​ທີ 15 ພະຈິກ​ວ່າ EU ມີ​ກຳນົດ​ຈະ​ຈັດ​ກອງ​ປະຊຸມ​ສຸດ​ຍອດ​ສະໄໝ​ວິສາມັນ ໃນ​ວັນ​ທີ 25 ພະຈິກ​ນີ້ ເພື່ອ​ພິຈາລະນາ​ໃຫ້ການ​ຮັບຮອງ​ແກ່​ຂໍ້​ຕົກລົງ​ກ່ຽວ​ກັບ Brexit ນັ້ນ​ຢ່າງ​ເປັນ​ທາງ​ການ. ທ່ານ ​ທັສ ຢືນຢັນ​ວ່າ ປັດຈຸບັນ​ນີ້ 27 ປະເທດ​ສະມາຊິກ EU ພວມ​ພິຈາລະນາ​ກ່ຽວ​ກັບ​ຂໍ້​ຕົກລົງ Brexit.

 

ຂ່າວທີ່ກ່ຽວຂ້ອງ