ຜົນ​ກຳໄລ​ຂອງ Emirates Airline ຫຼຸດ​ລົງ​ຢ່າງ​ແຮງ

105 19 ພ.ຈ. 2018 ຂ່າວຕ່າງປະເທດ
ຜົນ​ກຳໄລ​ຂອງ Emirates Airline ຫຼຸດ​ລົງ​ຢ່າງ​ແຮງ

     ເມື່ອ​ວັນ​ທີ 15 ພະຈິກ​ທີ່​ຜ່ານ​ມາ ບໍລິສັດ​ການບິນ Emirates Airline ຂອງ​ສະຫະລັດ ອາ​ຣັບ ເອ​ມີ​ເຣດ (UAE) ໄດ້​ນຳ​ປະກາດ​ຕົວ​ເລກ​ຜົນ​ກຳໄລ ຂອງ​ເຄິ່ງ​ຕົ້ນ​ສົກ​ການ​ເງິນ 2018-2019 ວ່າ​ໄດ້​ຫຼຸດ​ລົງ 86% ຍ້ອນ​ລາຄາ​ນ້ຳມັນ​ສູງ​ຂຶ້ນ ແລະ​ຄ່າ​ເງິນ​ຕົກຕ່ຳ.

    Emirates Airline ໃຫ້​ຮູ້​ຢູ່​ໃນ​ຖະແຫຼງການ​ສະບັບ​ໜຶ່ງ​ວ່າ ໃນ 6 ເດືອນ​ເຄິ່ງ​ຕົ້ນ​ສົກ​ການ​ເງິນ ຊຶ່ງ​ສິ້ນ​ສຸດ​ລົງ​ເມື່ອ​ວັນ​ທີ 30 ກັນຍາ​ທີ່​ຜ່ານ​ມາ ຜົນ​ກຳໄລ​ສຸດທິ​ຂອງ​ບໍລິສັດ​ດັ່ງກ່າວ ບັນລຸ​ພຽງ​ທີ່ 62 ລ້ານ​ໂດ​ລາ​ສະຫະລັດ ນັບ​ວ່າ​​ຫຼ​ດລົງ​ຢ່າງ​ແຮງ ເມື່ອ​ທຽບໃສ່ 452 ລ້ານ​ໂດ​ລາ​ສະຫະລັດ ຂອງ​ໄລຍະ​ເວລາ​ດຽວ​ກັນ​ໃນ​ປີ​ກາຍ.

    ຂ່າວ​ແຈ້ງວ່າ ລະດັບ​ທີ່​ຫຼຸດ​ລົງ​ນັ້ນ ຕົ້ນຕໍ​ແມ່ນ​ຍ້ອນ​ຄ່າ​ໃຊ້​ຈ່າຍ​ໃຫ້​ແກ່​ເຊື້ອ​ໄຟ ຊຶ່ງ​ກວມ​ເອົາ​ກວ່າ 30% ຂອງ​ຍອດ​ຄ່າ​ໃຊ້​ຈ່າຍ​ໃຫ້​ແກ່​ການເຄື່ອນໄຫວ​ຂອງ​ບໍລິສັດ​ດັ່ງກ່າວ ເປັນ​ການ​ເພີ່ມ​ຂຶ້ນ​ເຖິງ 42% ເຖິງ​ແມ່ນ​ວ່າ​ປະລິມານ​ເທື່ອ​ຄົນ​ຂອງ​ຜູ້ໂດຍສານ ເພີ່ມ​ຂຶ້ນ 3% (ບັນລຸ 30,1 ລ້ານ​ເທື່ອ​ຄົນ) ກໍ​ຕາມ. ນອກຈາກ​ນັ້ນແລ້ວ ໃນ​ໄລຍະ​ທີ່​ຜ່ານ​ມາ Emirates Airline ກໍ​ປະ​ເຊີນ​ກັບ​ສິ່ງ​ທ້າ​ທາຍ​ອື່ນໆ​ອີກ ອັນ​ເປັນ​ຜົນ​ກະທົບ​ຕໍ່​ຜົນ​ກຳໄລ​ສຸດທິ ເຊັ່ນ​ສະພາບ​ຄວາມ​ເປັນ​ຈິງ ກ່ຽວ​ກັບ​ຄວາມ​ບໍ່​ໝັ້ນຄົງ​ທາງ​ດ້ານ ການເມືອງ-ເສດຖະກິດ ຢູ່​ໃນ​ເຂດ​ຕາເວັນ​ອອກ​ກາງ ກໍ​ຄື​ໃນ​ພາກ​ພື້ນ​ອື່ນໆ​ໃນ​ໂລກ.

    ໃນ​ຂະນະ​ດຽວ​ກັນ ຜົນ​ກຳໄລ​ຂອງ​ກຸ່ມ​ບໍລິສັດ Emirates Group ຊຶ່ງ​ເປັນ​ຜູ້​ສະໜອງ ການ​ບໍລິການ​ການບິນ ອັນ​ດັບ​ແຖວ​ໜ້າ​ຂອງ​ໂລກ ກໍ​ຫຼຸດ​ລົງ 53% ລົງ​ໄປ​ຍັງ​ເຫຼືອ​ທີ່ 296 ລ້ານ​ໂດ​ລາ​ສະຫະລັດ.

   Emirates Airline ເປັນ​ໜຶ່ງ​ໃນ​ບັນດາ​ບໍລິສັດ​ການບິນ​ທີ່​ໃຫຍ່​ທີ່​ສຸດ​ໃນ​ໂລກ ຊຶ່ງ​ປັດຈຸບັນ ປະຕິບັດ​ການບິນ​ກວ່າ 150 ຍ່ານ​ທາງ​ບິນ. Emirates Airline ມີ​ສຳນັກງານ​ໃຫຍ່​ຕັ້ງ​ຢູ່​ໃນ ດູ​ບາຍ ທີ່​ຂຶ້ນ​ກັບ UAE ຍັງ​ເປັນ​ລູກ​ຄ້າ​ລາຍ​ໃຫຍ່ ຂອງ​ບໍລິສັດ​ຜູ້​ຜະລິດ​ເຮືອບິນ Airbus ຂອງ​ເອີ​ຣົບ ໂດຍ​ຄອບ​ຄອງ​ເຮືອບິນ  Airbus A380 ຈຳນວນ 100 ກວ່າ​ລຳ.

 

ຂ່າວທີ່ກ່ຽວຂ້ອງ