ພຸດທະສາສະໜາ ກັບບັນຫາສັງຄົມ

292 19 ພ.ຈ. 2018 ນານາສາລະ

    ຜູ້​ຂຽນ​ຄິດ​ມາ​ດົນ​ສົມ­ຄວນ ເພື່ອ​ຢາກ​ນຳ​ສະ­ເໜີ​ບາງ​ຫຼັກ​ທຳ​ທີ່​ເປັນ​ແນວ­ທາງ​ໃຫ້​ຄົນ​ຢູ່​ຮ່ວມ​ກັນ​ໃນ​ສັງ­ຄົມ ຢ່າງ​ສະ­ຫງົບ​ສຸກ ເວົ້າ​ໃຫ້​ສັ້ນ​ກໍ່​ເພື່ອ​ເປີດ​ປະ­ເດັນ​ວ່າ: ພຸດ​ທະ​ສາ­ສະ­ໜາ​ມີ​ວິ­ທີ​ແກ້​ໄຂ​ບັນ­ຫາ​ສັງ­ຄົມ​ແນວ­ໃດ​ແນ່ ? ຍົກ​ຕົວ­ຢ່າງ​ເລື່ອງ​ຂີ້­ລັກ-ຂີ້​ຢາ ທີ່​ເປັນ​ໄພ​ຄຸກ​ຄາມ​ຊີ­ວິດ-ຊັບ​ສິນ ແລະ ຄວາມ​ສະ­ຫງົບ​ສຸກ​ຂອງ​ສັງ­ຄົມ ເຊິ່ງ​ສ່ວນ​ໃຫຍ່​ບັນ­ຫາ​ນີ້​ເກີດ​ຍ້ອນ​ຄວາມ­ທຸກ​ຈົນ ແລະ ການ​ສຶກ​ສາ​ບໍ່​ພຽງ­ພໍ ດັ່ງ­ນັ້ນ ເຮົາ​ຈຶ່ງ​ໄດ້​ຄຳ​ຕອບ​ທັນ­ທີ​ໂລດ​ວ່າ ພຸດ​ທະ​ສາ­ສະ­ໜາ​ໃຫ້​ແນວ­ທາງ​ໄວ້ ຄື: ຕ້ອງ​ໃຫ້­ການ​ສຶກ​ສາ​ອົບ­ຮົມ​ພວກ​ເຂົາ​ໃຫ້​ພຽງ­ພໍ.

    ພະ­ພຸດ­ທະ­ເຈົ້າ ຈະ​ບັນ­ລຸ​ທຳ​ໄດ້​ຍ້ອນ​ເພິ່ນ​ສະ­ແຫວງ­ຫາ​ຄວາມ​ຮູ້-ແນວ­ທາງ​ການ​ແກ້​ໄຂ​ຄວາມ­ທຸກ ທີ່​ມັນ​ຄຸກ​ຄາມ​ຄວາມ​ສະ­ຫງົບ​ສຸກ​ຂອງ​ມະ­ນຸດ ດັ່ງ­ນັ້ນ ເມື່ອ​ພະ­ພຸດ­ທະ­ເຈົ້າ​ຕັດ­ສະ­ຮູ້ (ບັນ­ລຸ​ທຳ) ແລ້ວ ຈຶ່ງ​ໃຊ້​ເວ­ລາ 45 ປີ ເພື່ອ​ເອົາ​ການ​ສຶກ​ສາ​ໃຫ້​ປະ­ຊາ­ຊົນ​ໄດ້​ເຂົ້າ­ໃຈ​ແຈ້ງ​ໃນ​ຊີ­ວິດ ສັງ­ເກດ​ເບິ່ງ​ວ່າ ພະ­ພຸດ­ທະ­ເຈົ້າ​ເດີນ­ທາງ​ໄປ​ບ່ອນ​ໃດ​ກໍ່​ເພື່ອ​ສະ­ແດງ​ທຳ (ໃຫ້­ການ​ສຶກ​ສາ) ແກ້​ໄຂ​ບັນ­ຫາ​ຊີ­ວິດ​ຈາກ​ຫຼົງ​ທາງ​ຜິດ​ໃຫ້​ເດີນ​ຖືກ​ທາງ​ຈາກ​ເຂົ້າ­ໃຈ​ຜິດ ຫຼື ຄິດ​ຜິດ ໃຫ້​ຄິດ​ຖືກ​ບໍ່​ວ່າ​ເພິ່ນ​ຈະ​ຂຶ້ນ​ພູ­ເຂົາ​ລົງ​ຫ້ວຍ ຫຼື ເຂົ້າ​ໄປ​ໃນ​ເມືອງ​ພົບ​ເຈົ້າ​ຊີ­ວິດ​ກໍ່​ມີ​ເປົ້າ​ໝາຍ ເພື່ອ​ເອົາ​ການ​ສຶກ​ສາ​ໃຫ້​ພວກ​ເຂົາ​ໄດ້​ເຂົ້າ­ໃຈ​ຊີ­ວິດ​ໃຫ້​ຖືກ­ຕ້ອງ ຍົກ​ຕົວ­ຢ່າງ ຕອນ​ພະ­ພຸດ­ທະ­ເຈົ້າ​ໄປ​ພົບ​ເຈົ້າ​ພິມ​ພິ­ສານ ເພິ່ນ​ຕ້ອງ​ໃຊ້​ເວ­ລາ​ຫຼາຍ​ເດືອນ ເພື່ອ​ໄປ​ອົບ­ຮົມ​ສັ່ງ­ສອນ​ເຈົ້າ​ສຳ­ນັກ (ຊະ­ດິນ 3 ອ້າຍ​ນ້ອງ) ທີ່​ມີ​ບໍ­ລິ­ວານ​ພັນ​ກວ່າ​ຄົນ ເພາະ­ວ່າ​ເຈົ້າ​ພິມ​ພິ­ສານ ນັບ­ຖື​ເຈົ້າ​ລັດ­ທິ​ພວກ​ນີ້ ເຊິ່ງ​ພວກ​ນີ້​ເຊື່ອ ແລະ ປະ­ຕິ­ບັດ​ເລື່ອງ​ການ​ບູ­ຊາ​ໄຟ.

    ພະ­ພຸດ­ທະ­ເຈົ້າ ໄດ້​ເທດ​ສະ­ໜາ​ຊີ້​ແຈງ​ໃຫ້​ພວກ​ເຂົາ (ເຈົ້າ​ລັດ­ທິ​ບູ­ຊາ​ໄຟ) ໄດ້​ເຂົ້າ­ໃຈ​ວ່າ ໄຟ​ທີ່​ເຂົາ​ບູ­ຊາ​ຢູ່​ນັ້ນ​ມັນ​ຮ້ອນ​ກໍ່​ຍັງ​ທຳ​ມະ​ດາ ຢູ່​ແຕ່​ໄຟ​ທີ່​ຮ້ອນ​ກວ່າ​ນັ້ນ ຄື​ໄຟ 3 ກອງ 1. ໄຟ ຄື ຣາ​ຄະ 2. ໄຟ ຄື ໂທ­ສະ 3. ໄຟ ຄື ໂມ­ຫະ ຣາ​ຄະ ຄື ຄວາມ​ຢາກ​ໄດ້​ໄຝ່​ກາມ ນີ້​ຄື​ໄຟ​ກອງ​ໜຶ່ງ​ທີ່​ເຜົາ​ໄໝ້​ໝາກ​ຫົວ­ໃຈ​ຂອງ​ຄົນ​ໃຫ້​ຮ້ອນ​ຢູ່​ຕະ­ຫຼອດ​ເວ­ລາ ໂທ­ສະ ຄື: ອຳ­ນາດ​ໂຫດ­ຮ້າຍ​ບັນ­ດານ​ໃຫ້​ຜິດ​ເປັນ​ຖືກ ໂມ­ຫະ ຄື: ຄວາມ​ຫຼົງ­ໄຫຼ​ໃນ​ໂລກ​ໂລ­ກີ ຫຼົງ​ຊີ­ວິດ​ເມົາ​ມົວ​ລາບ​ຍົດ ຫຼົງ​ຕົວ​ເອງ ໄຟ​ສາມ​ກອງ​ນີ້ ມັນ​ຈຶ່ງ​ທຳ­ລາຍ​ມະ­ນຸດ​ໃຫ້​ຕາຍ​ທັງ​ເປັນ​ໄດ້ ຖ້າ­ວ່າ​ເຮົາ​ບໍ່​ຮູ້​ແຈ້ງ ຄື: ບໍ່​ໄດ້​ຮັບ​ການ​ສຶກ​ສາ​ພຽງ­ພໍ​ນັ້ນ​ເອງ.

    ຫຼົງ​ທາງ​ຍັງ​ພໍ​ມີ​ເວ­ລາ​ຫາ​ທາງ​ອອກ​ໄດ້ ແຕ່​ຖ້າ​ຫຼົງ​ໂຕ​ເອງ​ນີ້​ໜ້າ​ຄິດ ທາງ​ແກ້​ຕ້ອງ​ຍອມ​ເຊື່ອ​ຟັງ​ຄົນ​ອ້ອມ​ຂ້າງ​ຕັກ­ເຕືອນ ຄົນ​ເຮົາ​ອາດ​ບໍ່​ເກ່ງ​ຄື​ຊ້າງ​ຕົກ​ຕົມ​ຈະ​ຂຶ້ນ​ເອງ​ໄດ້ ຍ່ອມ​ຕ້ອງ​ອາ­ໄສ​ຄົນ​ດ້ວຍ​ກັນ​ເພື່ອ​ແກ້​ໄຂ​ບັນ­ຫາ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ