ນັກວິທະຍາສາດຈັດຄາລາວານ ຫວນຄືນສູ່ເມືອງວຽງໄຊ

151 19 ພ.ຈ. 2018 ຫົວຂໍ້ຂ່າວອື່ນໆ

    ວັນ​ທີ 11-16 ພະ­ຈິກ 2018 ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ຈັດ​ຂະ​ບວນ​ຄາ​ລາ​ວານ​ນັກ­ວິ­ທະ­ຍາ­ສາດ​ລາວ​ຫວນ​ຄືນ​ສູ່​ເມືອງ​ວຽງ​ໄຊ ຖານ​ທີ່​ໜັ້ນ​ການ​ປະ­ຕິ­ວັດ​ລາວ​ນຳ​ໂດຍ​ທ່ານ ບໍ່​ວຽງ​ຄຳ ວົງ​ດາ­ລາ ລັດ​ຖະ​ມົນ​ຕິ​ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ມີ​ບັນ­ດາ​ຮອງ​ລັດ­ຖະ­ມົນ­ຕີ ຫ້ອງ­ການ ກົມ ສະ​ຖາ​ບັນ ພະ​ແນກ ແຕ່​ລະ​ແຂວງ ຮອງ​ອະ­ທິ­ການ​ບໍ­ດີ​ມະ­ຫາ​ໄລ​ແຫ່ງ​ຊາດ ອະ​ດິດ ຄູ ອາ­ຈານ ນັກ­ຮຽນ ແລະ ພະ­ນັກ­ງານ​ພາຍ​ໃນ​ກະ­ຊວງ​ເຂົ້າ​ຮ່ວມ ເຊິ່ງ​ວັນ​ທີ 12 ພະ­ຈິກ 2018 ຂະ​ບວນ​ຄາ​ລະ​ວານ ໄດ້​ເດີນ​ຮອດ​ສວນ​ແກ້ວ​ຫຼັກ​ເມືອງ ເທດ­ສະ­ບານ​ຕົວ​ເມືອງ​ຊຳ​ເໜືອ ຖືກ​ຕ້ອນ­ຮັບ​ໂດຍ​ທ່ານ ຄຳ​ວອນ ບຸນ​ທະ​ວົງ ປະ­ທານ​ສະ­ພາ​ປະ­ຊາ­ຊົນ ແຂວງ​ຫົວ­ພັນ ພ້ອມ​ດ້ວຍ​ພະ­ນັກ­ງານ-ລັດ­ຖະ­ກອນ​ທຸກ​ຂະ­ແໜງ­ການ​ນັກ­ຮຽນ ນັກ​ສຶກ​ສາ ແລະ ປະ­ຊາ­ຊົນ​ບັນ­ດາ­ເຜົ່າ​ອ້ອມ​ຂ້າງ​ເທດ­ສະ­ບານ​ເມືອງ​ຊຳ​ເໜືອ.

    ຂະ​ບວນ​ດັ່ງ­ກ່າວ ມີ​ຄວາມ​ໝາຍ​ຄວາມ​ສຳ­ຄັນ ເພາະ​ເປັນ​ຄັ້ງ​ທຳ​ອິດ​ທີ່​ນັກ­ວິ­ທະ­ຍາ­ສາດ​ລາວ ຫວນ​ຄືນ​ສູ່​ບົນ​ດິນ­ແດນ​ທີ່​ອຸ­ດົມ­ສົມ­ບູນ ໄປ​ດ້ວຍ​ຊັບ­ພະ­ຍາ­ກອນ​ທຳ​ມະ​ຊາດ​ທີ່​ສວຍ​ສົດ​ງົດ​ງາມ ທັງ​ເປັນ​ດິນ­ແດນ​ທີ່​ມີ​ມູນ­ເຊື້ອ​ແຫ່ງ​ປີ​ຊາ​ສາ­ມາດ ສະ­ຫຼາດ​ສ່ອງ​ໃສ​ຂອງ​ພັກ​ປະ­ຊາ­ຊົນ ປະ­ຕິ­ວັດ​ລາວ ໃນ​ການ​ນຳ­ພາ​ຕໍ່­ສູ້​ປົດ​ປ່ອຍ​ຊາດ ແລະ ທັງ​ເປັນ​ການ​ສ້າງ​ຂະ​ບວນ​ການ ແລະ ຜົນ­ງານ​ຄຳ­ນັບ​ຮັບ​ຕ້ອນ​ວັນ​ສຳ­ຄັນ​ຂອງ​ພັກ​ຂອງ​ຊາດ ເປັນ­ຕົ້ນ ວັນ​ສະ­ຖາ­ປະ­ນາ ສປປ ລາວ ຄົບ­ຮອບ 43 ປີ ວັນ​ຄ້າຍ​ວັນ​ເກີດ​ປະ­ທານ ໄກ­ສອນ ພົມ­ວິ­ຫານ ຄົບ­ຮອບ 98 ປີ ແລະ ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 70 ປີ ພິ­ເສດ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ ເມືອງ​ວຽງ​ໄຊ​ແດນ​ດິນ​ປະ­ຫວັດ­ສາດ ຖານ​ທີ່​ໝັ້ນ​ຂອງ​ການ​ປະ­ຕິ­ວັດ​ລາວ ຄົບ­ຮອບ 50 ປີ (30/11/1968-30/11/2018).

    ຂະ​ບວນ​ຄາ​ລາ​ວານ​ຄັ້ງ​ນີ້ ຍັງ​ໄດ້​ຈັດ​ກິດ­ຈະ­ກຳ​ຕ່າງໆ ເຊັ່ນ: ໄຫວ້​ພະ​ເຈົ້າ​ອົງ​ຕື້ ທ່ຽວ​ຊົມ​ທິວ​ທັດ​ທຳ​ມະ​ຊາດ​ຕົວ​ເມືອງ​ວຽງ​ໄຊ ແລະ  ທ່ຽວ​ຊົມ​ຖ້ຳ​ຂອງ​ບັນ­ດາ​ທ່ານ​ຜູ້­ນຳ ທີ່​ໃຊ້​ເປັນ​ບ່ອນ­ຢູ່​ອາ­ໄສ​ເຮັດ​ໜ້າ­ທີ່​ການ­ເມືອງ ເພື່ອ​ການ​ປະ­ຕິ­ວັດ​ປົດ​ປ່ອຍ­ປະ​ເທດ​ຊາດ​ໃນ​ເມື່ອ​ກ່ອນ ເປັນ​ການ​ຊອກ​ຮູ້​ມູນ­ເຊື້ອ​ການ​ນຳ­ພາ​ອັນ​ສະ­ຫຼາດ​ສ່ອງ​ໃສ່​ຂອງ​ພັກ​ປະ­ຊາ­ຊົນ ປະ­ຕິ­ວັດ​ລາວ ພາຍ​ໃຕ້​ການ​ນຳ­ພາ​ຂອງ​ປະ­ທານ ໄກ­ສອນ ພົມ­ວິ­ຫານ ຜູ້­ນຳ​ທີ່​ແສນ​ເຄົາ­ລົບ​ຮັກ​ຂອງ​ປວງ​ຊົນ​ລາວ​ທັງ​ຊາດ ແລະ ມູນ­ເຊື້ອ​ຄວາມ​ສາ­ມັກ­ຄີ​ນ້ຳ­ໃຈ​ອົງ­ອາດ​ກ້າ­ຫານ​ຕໍ່­ສູ້​ມີ​ໄຊ ຂອງ​ປະ­ຊາ­ຊົນ​ບັນ­ດາ­ເຜົ່າ​ເມືອງ​ວຽງ​ໄຊ ຢ້ຽມ­ຢາມ​ໂຮງ­ຮຽນ​ທິດ​ສະ​ດີ​ການ­ເມືອງ ແລະ ການ​ປົກ­ຄອງ​ຂອງ​ແຂວງ ທ່ຽວ​ຊົມ​ພື້ນ­ຖານ​ການ​ຜະ­ລິດ ແລະ ຄອບ­ຄົວ​ຕົວ​ແບບ ພ້ອມ​ທັງ​ຈັດ​ສຳ​ມະ​ນາ​ວິ­ທະ­ຍາ­ສາດ​ກ່ຽວ​ກັບ​ການ​ປະ­ຕິ­ວັດ​ອຸດ­ສາ­ຫະ­ກຳ ຄັ້ງ​ທີ 4 ທີ່​ຖ້ຳ​ຊ້າງ​ລອດ​ອີກ​ດ້ວຍ.

ຂ່າວທີ່ກ່ຽວຂ້ອງ