ກອງປະຊຸມສະໄໝສາມັນເທື່ອທີ 6 ຈະພິຈາລະນາຮັບຮອງຫຼາຍບັນຫາສໍາຄັນ

317 16 ພ.ຈ. 2018 ຂ່າວໜ້າ​ໜຶ່ງ

    ວັນ​ທີ 15 ພະ­ຈິກ 2018 ທີ່​ສຳ­ນັກ­ງານ​ສະ­ພາ​ແຫ່ງ​ຊາດ ທ່ານ​ນາງ ສວນ​ສະ­ຫວັນ ວິ​ຍະ​ເກດ ເລ­ຂາ­ທິ­ການ​ສະ­ພາ​ແຫ່ງ​ຊາດ ໄດ້​ຖະ­ແຫຼງ​ຂ່າວ​ວ່າ: ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ​ຊຸດ​ທີ 8 ຈະ​ໄດ້​ຈັດ​ຂຶ້ນ​ວັນ​ທີ 20 ພະ­ຈິກ ຫາ 21 ທັນ­ວາ 2018 ຢູ່​ຫ້ອງ​ປະ­ຊຸມ​ແຫ່ງ​ຊາດ (ຫຼັກ 6) ໃຊ້​ເວ­ລາ 22 ວັນ ບໍ່​ລວມ​ວັນ­ພັກ­ລັດ­ຖະ­ການ ເຊິ່ງ​ກອງ​ປະ­ຊຸມ​ຄັ້ງ​ນີ້​ຈະ​ໄດ້​ພິ­ຈາ­ລະ­ນາ ແລະ ຮັບ­ຮອງ​ບັນ­ຫາ​ສຳ­ຄັນ​ຕ່າງໆ ຄື: ວຽກ​ງານ​ລັດ­ຖະ­ບານ ພິ­ຈາ­ລະ­ນາ ຮັບ​ຟັງ​ບົດ​ລາຍ​ງານ​ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ທີ່​ພົ້ນ​ເດັ່ນ​ປະ­ຈຳ​ປີ 2018 ແລະ ທິດ​ທາງ​ວຽກ​ງານ​ຈຸດ​ສຸມ​ປີ 2019 ຂອງ​ລັດ­ຖະ­ບານ ບົດ​ລາຍ​ງານ​ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ກ່ຽວ​ກັບ​ສະ­ພາບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແຜນ​ງົບ­ປະ­ມານ​ແຫ່ງ​ລັດ ແຜນ​ເງິນ­ຕາ​ປີ 2018 ທິດ​ທາງ​ແຜນ­ການ​ປີ 2019 ແລະ ບົດ​ລາຍ​ງານ​ສະ­ຫຼຸບ​ຂາດ​ຕົວ ການ­ຈັດ­ຕັ້ງ​ປະ­ຕິ­ບັດ​ແຜນ​ງົບ­ປະ­ມານ​ແຫ່ງ​ລັດ ປະ­ຈຳ​ປີ 2017 ພິ­ຈາ­ລະ­ນາ​ຮັບ­ຮອງ​ເອົາ​ການ​ຊີ້​ແຈງ​ຂອງ​ລັດ­ຖະ­ບານ ຕໍ່​ຄຳ​ຊັກ​ຖາມ​ຂອງ​ສອງ​ກະ­ຊວງ ຄື: ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ຊີ້​ແຈງ​ກ່ຽວ​ກັບ​ສະ­ພາບ​ການ​ກໍ່­ສ້າງ ແລະ ສ້ອມ­ແປງ​ຖະ­ໜົນ​ຫົນ­ທາງ (ໃນ​ໄລ­ຍະ​ຜ່ານ​ມາ​ເຫັນ​ວ່າ​ຄຸ­ນະ­ພາບ​ການ​ກໍ່­ສ້າງ​ຕ່ຳ ມູນ​ຄ່າ​ການ​ກໍ່­ສ້າງ​ສູງ ແກ່­ຍາວ​ເວ­ລາ​ກໍ່­ສ້າງ ແລະ ທິດ​ທາງ​ແກ້​ໄຂ​ບັນ­ຫາ​ດັ່ງ­ກ່າວ​ໃນ­ຕໍ່­ໜ້າ) ແລະ ກະ­ຊວງ​ສາ­ທາ­ລະ­ນະ​ສຸກ​ຊີ້​ແຈງ​ກ່ຽວ​ກັບ​ຄຸ­ນະ­ພາບ​ຂອງ​ການ​ບໍ­ລິ­ການ ການ​ປິ່ນ­ປົວ​ຢູ່​ໂຮງ­ໝໍ ສຸກ­ສາ­ລາ ແລະ ທິດ​ທາງ​ໃນ­ຕໍ່­ໜ້າ ພິ­ຈາ­ລະ­ນາ​ຮັບ​ຟັງ​ບົດ​ລາຍ​ງານ​ຂອງ​ລັດ­ຖະ­ບານ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ມະ­ຕິ​ຂອງ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 4 ຂອງ​ສະ­ພາ​ແຫ່ງ​ຊາດ​ຊຸດ​ທີ 8 ວ່າ​ດ້ວຍ​ການ​ພັດ­ທະ­ນາ​ຊົນ­ນະ­ບົດ ແລະ ລຶ­ບລ້າງ​ຄວາມ­ທຸກ​ຍາກ​ຕິດ​ພັນ​ກັບ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ (ສະ­ບັບ​ເລກ​ທີ 079/ສພຊ ລົງ​ວັນ​ທີ 17 ພະ­ຈິກ 2017) ພິ­ຈາ­ລະ­ນາ​ຮັບ­ຮອງ​ເອົາ​ການ​ແຕ່ງ­ຕັ້ງ​ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ຕາມ​ການ​ສະ­ເໜີ​ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ແລະ ພິ­ຈາ­ລະ­ນາ​ຮັບ­ຮອງ​ເອົາ​ບົດ​ສະ­ເໜີ​ຂອງ​ລັດ­ຖະ­ບານ ກ່ຽວ​ກັບ​ການ​ຄົ້ນ­ຄວ້າ​ຊື່​ເອີ້ນ​ຊົນ­ເຜົ່າ​ບຣູ.

    ວຽກ​ງານ​ອົງ­ການ​ກວດ​ສອບ​ແຫ່ງ​ລັດ ພິ­ຈາ­ລະ­ນາ​ຮັບ­ຮອງ​ເອົາ​ບົດ​ລາຍ​ງານ​ຂອງ​ອົງ­ການ​ກວດ​ສອບ​ແຫ່ງ​ລັດ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ­ເຄື່ອນ­ໄຫວ​ວຽກ​ງານ​ປະ­ຈຳ​ປີ 2018 ແລະ ທິດ​ທາງ​ແຜນ­ການ​ປະ­ຈຳ​ປີ 2019.

    ສຳ­ລັບ​ການ​ສ້າງ ປັບ­ປຸງ ແລະ ທາບ​ທາມ​ຮ່າງ​ກົດ­ໝາຍ​ຈຳ­ນວນ 9 ສະ­ບັບ ໃນ​ນັ້ນ ຮ່າງ​ກົດ­ໝາຍ​ສ້າງ​ໃໝ່ 7 ສະ­ບັບ ຄື: ຮ່າງ​ກົດ­ໝາຍ​ວ່າ​ດ້ວ​ສຳ­ນັກ­ງານ​ຜູ້­ຕາງ­ໜ້າ ສປປ ລາວ ປະ­ຈຳ​ຢູ່​ຕ່າງ­ປະ­ເທດ ຮ່າງ​ກົດ­ໝາຍ​ວ່າ​ດ້ວຍ​ຄົນ​ພິ­ການ ຮ່າງ​ກົດ­ໝາຍ​ວ່າ​ດ້ວຍ​ຄວາມ​ປອດ​ໄພ​ດ້ານ​ລັງ­ສີ ຮ່າງ​ກົດ­ໝາຍ​ວ່າ​ດ້ວຍ​ລາຍ​ເຊັນ​ເອ​ເລັກ​ໂຕຣ​ນິກ ຮ່າງ​ກົດ­ໝາຍ​ວ່າ​ດ້ວຍ​ການ​ປະ­ກັນ​ສຸ­ຂະ­ພາບ ຮ່າງ​ກົດ­ໝາຍ​ວ່າ​ດ້ວຍ​ການ​ລົດ­ໄຟ ແລະ ປະ­ມວນ​ກົດ­ໝາຍ​ແພ່ງ ສ່ວນ​ຮ່າງ​ກົດ­ໝາຍ​ສະ­ບັບ​ປັບ­ປຸງ​ມີ 1 ສະ­ບັບ ຄື: ກົດ­ໝາຍ​ວ່າ​ດ້ວຍ​ທະ­ນາ­ຄານ​ທຸ­ລະ​ກິດ ແລະ ຮ່າງ​ກົດ­ໝາຍ​ທາບ​ທາມ ຄື: ກົດ­ໝາຍ​ວ່າ​ດ້ວຍ​ທີ່​ດິນ.

ຂ່າວທີ່ກ່ຽວຂ້ອງ