ລັດຖະມົນຕີ​ປ້ອງ​ກັນ​ປະເທດ​ອິດ​ສະ​ຣາ​ແອນ ລາ​ອອກ​ຈາກ​ຕຳແໜ່ງ

115 16 ພ.ຈ. 2018 ຂ່າວຕ່າງປະເທດ
ລັດຖະມົນຕີ​ປ້ອງ​ກັນ​ປະເທດ​ອິດ​ສະ​ຣາ​ແອນ ລາ​ອອກ​ຈາກ​ຕຳແໜ່ງ

       ຂ່າວສານ AFP ລາຍ​ງານ​ວ່າ ທ່ານ ອາ​ວິກ​ດໍ ລີ​ເບີ​ແມນ ລັດຖະມົນຕີ​ປ້ອງ​ກັນ​ປະເທດ ອິດ​ສະ​ຣາ​ແອນ ໄດ້​ປະກາດ​ລາ​ອອກ​ຈາກ​ຕຳແໜ່ງ​ໃນ​ວັນ​ທີ 14 ພະຈິກ​ນີ້ ຫຼັງ​ຈາກ​ທີ່​ເຂົາ​ໄດ້​ສະແດງ ຄວາມ​ບໍ່​ເຫັນ​ພ້ອມ​ຕໍ່​ຄຳ​ສັ່ງ​ຢຸດ​ຍິງ​ຢູ່​ໃນ​ແຫຼມ​ກາ​ຊາ ພ້ອມ​ກັນ​ນັ້ນ​ທ່ານ​ກໍ​ໄດ້​ເລັ່ງ​ຊຸກຍູ້​ໃຫ້​ລັດຖະບານ ຈັດການ​ເລືອກ​ຕັ້ງ​ໃນ​ໄວໆ​ນີ້.

   ທ່ານ ລີ​ເບີ​ແມນ ກ່າວ​ຕໍ່​ຜູ້​ສື່​ຂ່າວ​ວ່າ ຂໍ້​ຕົກລົງ​ທີ່​ມີ​ອອກ​ມາ​ເມື່ອ​ວັນ​ທີ 13 ພະຈິກ ໂດຍ​ແມ່ນ​ເອ​ຢິບ ເປັນ​ຕົວ​ກາງ​ໄກ່​ເກ່ຍ​ກັບ​ຂະ​ບວນ​ການ​ຮາ​ມາ​​ສ ຂອງ​ປາ​ແລັດ​ສະ​ຕິນ ນັ້ນ​ເປັນ “ການ​ຍອມ​ຈຳນົນ​ຕໍ່​ການ​ກໍ່​ການ​ຮ້າຍ.”

    ທ່ານ ລີ​ເບີ​ແມນ ຍັງ​ໄດ້​ຖະແຫຼງ​ວ່າ ພັກ Yisrael Beitenu ຊຶ່ງ​ເປັນ​ພັກ​ຝ່າຍ​ຂວາ​ຂອງ​ເຂົາ ຈະ​ອອກ​ໄປ​ຈາກ​ການ​ເປັນ​ພັກ​ຮ່ວມ​ລັດຖະບານ​ຂອງ​ນາຍົກລັດຖະມົນຕີ ເບນ​ຈາ​ມິນ ເນ​ຕັນ​ຢາ​ຮູ.

    ໃນ​ວັນ​ທີ 14 ພະຈິກ ນາຍົກລັດຖະມົນຕີ ເບນ​ຈາ​ມິນ ເນ​ຕັນ​ຢາ​ຮູ ໄດ້​ປ້ອງ​ກັນ​ຂໍ້​ຕົກລົງ ກ່ຽວ​ກັບ​ການ​ຍອມຮັບ​ຄຳ​ສັ່ງ​ຢຸດ​ຍິງ​ຢູ່​ໃນ​ແຫຼມ​ກາ​ຊາ ໂດຍ​ຖື​ວ່າ​ນີ້​ເປັນ​ເລື່ອງ​ທີ່​ຍ່ອມ​ເປັນ​ໄປ ສຳລັບ​ຄວາມ​ໝັ້ນຄົງ​ແຫ່ງ​ຊາດ ໃນ​ກໍລະນີ​ສຸກ​ເສີນ.

    ກ່ອນ​ໜ້າ​ນັ້ນ ເມື່ອ​ວັນ​ທີ 13 ພະຈິກ ບັນດາ​ກຸ່ມ​ປະກອບ​ອາວຸດ​ຂອງ​ປາ​ແລັດ​ສະ​ຕິນ ໃນ​ນັ້ນ​ມີ​ຂະ​ບວນ​ການ​ຮາ​ມາ​​ສ ໄດ້​ມີ​ຖະແຫຼງການ​ຮ່ວມ​ອອກ​ມາ ຊຶ່ງ​ໃນ​ນັ້ນ​ໄດ້​ຢືນຢັນ​ວ່າ ເຂົາເຈົ້າ​ຈະ​ປະຕິບັດ​ຄຳ​ສັ່ງ​ຢຸດ​ຍິງ ຕາບໃດ​ທີ່​ຝ່າຍ​ອິດ​ສະ​ຣາ​ແອນ ກໍ​ເຮັດ​ຄື​ແນວ​ນັ້ນ.

 

ຂ່າວທີ່ກ່ຽວຂ້ອງ