ເຈົ້າຄອງນະຄອນຫຼວງ ຕ້ອນຮັບທູດຈີນຄົນໃໝ່

210 15 ພ.ຈ. 2018 ຂ່າວໜ້າ​ໜຶ່ງ
ເຈົ້າຄອງນະຄອນຫຼວງ ຕ້ອນຮັບທູດຈີນຄົນໃໝ່

    ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ ຈ່ຽງ ຈ້າຍ​ຕົ່ງ ວັນ​ທີ 13 ພະ­ຈິກ 2018 ຢູ່​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ໃນ​ໂອ­ກາດ​ທີ່​ມາ​ດຳ­ລົງ​ຕຳ­ແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ​ວິ­ສາ­ມັນ ຜູ້​ມີ​ອຳ­ນາດ​ເຕັມ​ແຫ່ງ ສປ ຈີນ ປະ­ຈຳ ສປປ ລາວ ຄົນ​ໃໝ່.

    ທ່ານ​ເຈົ້າ​ຄອງ​ນະ​ຫຼວງ​ວຽງ​ຈັນ ໄດ້​ສະ­ແດງ​ຄວາມ​ຊົມ­ເຊີຍ ແລະ ຕີ​ລາ­ຄາ​ສູງ​ຕໍ່​ການ​ມາ​ດຳ­ລົງ​ຕຳ­ແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ​ຄົນ​ໃໝ່​ປະ­ຈຳ​ລາວ ເພື່ອ​ສືບ­ຕໍ່​ເຂົ້າ​ໃນ​ການ​ເສີມ​ຂະ­ຫຍາຍ​ສາຍ​ພົວ­ພັນ​ຮ່ວມ​ມື​ລະ­ຫວ່າງ ລາວ-ຈີນ ເຊິ່ງ​ແມ່ນ​ເພື່ອນ​ມິດ​ສະ­ຫາຍ​ທີ່​ຮ່ວມ​ອຸ­ດົມ​ການ​ດຽວ​ກັນ ເປັນ​ຄູ່​ຮ່ວມ​ຊາ­ຕາ­ກຳ​ທີ່​ມີ​ຄວາມ​ໝາຍ​ຍຸດ​ທະ​ສາດ​ຮອບ­ດ້ານ ໝັ້ນ­ຄົງ ພ້ອມ​ນີ້ ກໍ່​ຫວັງ​ວ່າ​ທ່ານ​ຈະ​ສືບ­ຕໍ່​ຮັດ​ແໜ້ນ​ການ​ຮ່ວມ​ມື​ດຶງ​ດູດ​ເອົາ​ຫົວ­ໜ່ວຍ​ທຸ­ລະ​ກິດ​ຈີນ​ໃຫ້​ເຂົ້າ​ມາ​ລົງ­ທຶນ ກໍ່​ຄື​ມາ​ຮ່ວມ​ພັດ­ທະ­ນາ​ນະ­ຄອນ­ຫຼວງ​ວຽງ​ຈັນ ແລະ ສືບ­ຕໍ່​ຊ່ວຍ­ເຫຼືອ​ປັບ­ປຸງ​ໃນ​ດ້ານ​ໂຄງ​ລ່າງ​ພື້ນ­ຖານ ໂດຍ​ສະ­ເພາະ ລະ­ບົບ​ໄຟ​ເຢືອງ​ທາງ ເພື່ອ​ໃຫ້​ມີ​ແສງ​ສະ­ຫວ່າງ ຫຼຸດ­ຜ່ອນ​ອຸ­ບັດ​ຕິ​ເຫດ​ທາງ​ຖະ­ໜົນ ແລະ ສືບ­ຕໍ່​ໃນ​ການ​ໂຄ­ສະ­ນາ​ດຶງ​ດູດ​ເອົາ​ນັກ​ທ່ອງ​ທ່ຽວ​ຈີນ ເຂົ້າ​ມາ​ທ່ຽວ​ນະ­ຄອນ­ຫຼວງ​ວຽງ​ຈັນ ກໍ່​ຄື ສປປ ລາວ ໃຫ້​ນັບ​ມື້​ນັບ​ເພີ່ມ​ຂຶ້ນ.

    ທ່ານ ຈ່ຽງ ຈ້າຍ​ຕົ່ງ ໄດ້​ສະ­ແດງ​ຄວາມ​ຂອບ­ໃຈ​ຕໍ່​ການ​ຕ້ອນ­ຮັບ​ອັນ​ອົບ​ອຸ່ນ ພ້ອມ​ທັງ​ໄດ້​ຢືນ­ຢັນ​ຈະ​ສືບ­ຕໍ່​ດຶງ​ດູດ​ເອົາ​ການ​ລົງ­ທຶນ​ຈີນ ໃຫ້​ເຂົ້າ​ມາ​ລົງ­ທຶນ​ໃນ​ນະ­ຄອນ­ຫຼວງ​ວຽງ​ຈັນ ໃຫ້​ນັບ​ມື້​ເພີ່ມ​ຂຶ້ນ ແລະ ຈະ​ສືບ­ຕໍ່​ດຶງ​ດູດ​ເອົາ​ການ​ຊ່ວຍ­ເຫຼືອ​ໃນ​ດ້ານ​ຕ່າງໆ ເພື່ອ​ມາ​ຍູ້​ແຮງ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ນະ­ຄອນ­ຫຼວງ ໃຫ້​ເຕີບ​ໃຫຍ່​ຂະ­ຫຍາຍ­ຕົວ​ເພີ່ມ​ຂຶ້ນ ສຳ­ລັບ​ການ​ກໍ່­ສ້າງ​ທາງ​ລົດ­ໄຟ ລາວ-ຈີນ ບໍ­ລິ­ສັດ​ທີ່​ກ່ຽວ­ຂ້ອງ ຈະ​ໄດ້​ປັບ­ປຸງ​ແຜນ­ການ​ກໍ່­ສ້າງ​ໃໝ່ ໂດຍ​ຈະ​ໄດ້​ຫັນ​ມາ​ກໍ່­ສ້າງ​ໃນ​ນະ­ຄອນ­ຫຼວງ​ວຽງ​ຈັນ​ໃຫ້​ສຳ­ເລັດ​ກ່ອນ ເພື່ອ​ໃຫ້​ຊາວ​ນະ­ຄອນ­ຫຼວງ ໄດ້​ເຫັນ​ເຖິງ​ຜົນ­ສຳ­ເລັດ​ໃນ​ການ​ກໍ່­ສ້າງ​ໂຄງ­ການ​ດັ່ງ­ກ່າວ.

ຂ່າວທີ່ກ່ຽວຂ້ອງ