ເອັສຊີຈີ ສໍາຜັດວິຖີການດໍາລົງຊີວິດຂອງນັກຮຽນທີ່ໄດ້ຮັບທຶນ

    ໂຄງ­ການ​ມອບ​ທຶນ​ການ​ສຶກ​ສາ​ເອັສ​ຊີ​ຈີ (SCG Sharing the Dream) ປີ 2018 ດຳ­ເນີນ​ມາ​ເປັນ​ປີ​ທີ 7 ແລະ ຍັງ​ສືບ­ຕໍ່​ມອບ​ໂອ­ກາດ​ໃຫ້​ນັກ­ຮຽນ​ທີ່​ມີ​ຄວາມ​ຕັ້ງ­ໃຈ ຢາກ​ມີ​ການ​ສຶກ​ສາ​ທີ່​ດີ​ຂຶ້ນ ແຕ່​ຂາດ​ກຳ­ລັງ​ຊັບ ສະ­ແດງ​ອອກ​ໃນ​ການ​ດຳ­ເນີນ​ການ​ມອບ​ທຶນ​ການ​ສຶກ​ສາ​ໃຫ້​ນັກ­ຮຽນ​ຢູ່ ສປປ ລາວ ຢ່າງ​ຕໍ່​ເນື່ອງ ເຊິ່ງ​ປີ 2018 ເອັສ​ຊີ​ຈີ ມີ​ແຜນ​ມອບ​ທຶນ​ການ​ສຶກ​ສາ​ໃຫ້​ນັກ­ຮຽນ​ລະ­ດັບ​ມັດ­ທະ­ຍົມ​ສຶກ​ສາ​ຕອນ​ປາຍ 300 ທຶນ ໃນ​ນີ້ ນະ­ຄອນ­ຫຼວງ​ວຽງ​ຈັນ 160 ທຶນ ແຂວງ​ຄຳ​ມ່ວນ 140 ທຶນ ນອກ​ນີ້ ຍັງ​ເປັນ​ປີ​ທຳ​ອິດ​ທີ່​ມີ​ການ​ເພີ່ມ​ທຶນ​ດ້ານ​ການ​ສຶກ​ສາ​ໃຫ້​ນັກ­ຮຽນ​ລະ­ດັບ​ມະ­ຫາ­ວິ­ທະ­ຍາ­ໄລ 10 ທຶນ ເພື່ອ​ເຕີມ​ເຕັມ​ຄວາມ​ຝັນ​ໃຫ້​ນັກ​ສຶກ​ສາ​ທີ່​ມີ​ຄວາມ​ຕັ້ງ­ໃຈ ປະ­ກອບ​ອາ­ຊີບ​ໃນ​ສາ­ຂາ​ວິ­ຊາ​ທີ່​ຕັ້ງ­ໃຈ​ໃຫ້​ສຳ­ເລັດ.

    ວັນ​ທີ 13-22 ພະ­ຈິກ 2018 ເອັສ​ຊີ​ຈີ ຮ່ວມ​ກັບ Action whith Lao children ລົງ​ເຄື່ອນ​ໄຫວ​ຢ້ຽມ­ຢາມ​ນັກ­ຮຽນ​ເຖິງ​ເຮືອນ​ແຕ່­ລະ­ຄົນ ໂດຍ​ໄດ້​ສຳ­ຜັດ​ວິ­ຖີ​ການ​ດຳ­ລົງ​ຊີ­ວິດ​ການ​ເປັນ​ຢູ່​ແຕ່​ລະ​ວັນ ພ້ອມ​ທັງ​ໂອ້​ລົມ​ກັບ​ນັກ­ຮຽນ ແລະ ຜູ້​ປົກ­ຄອງ​ຢ່າງ​ໃກ້­ຊິດ ເພື່ອ​ໃຫ້​ເຂົ້າ­ໃຈ​ເຖິງ​ອຸ­ປະ­ສັກ​ໃນ​ການ​ສຶກ​ສາ​ຂອງ​ແຕ່​ລະ​ຄອບ­ຄົວ ເຊິ່ງ​ຈະ​ນຳ​ມາ​ໃຊ້​ເປັນ​ເກນ​ໃນ​ການ​ພິ­ຈາ­ລະ­ນາ​ຜົນ​ຕັດ­ສິນ​ຂັ້ນ​ຕໍ່​ໄປ ນອກ​ນີ້ ຍັງ​ເນັ້ນ​ສະ­ໜັບ­ສະ­ໜູນ​ເດັກ​ທີ່​ມີ​ຄວາມ​ກະ­ຕັນ­ຍູ​ຕໍ່​ຄອບ­ຄົວ ເພື່ອ​ຕໍ່​ຍອດ​ສູ່​ການ​ເປັນ​ອະ­ນາ­ຄົດ​ທີ່​ດີ​ຂອງ​ປະ­ເທດ.

    ທ່ານ ວິ​ໂຣດ ລັດ­ຕະ­ນະ​ໄຊ​ສິດ ອຳ­ນວຍ​ການ​ເອັສ​ຊີ​ຈີ​ໃນ ສປປ ລາວ ກ່າວ​ວ່າ: ຈາກ​ການ​ດຳ­ເນີນ​ໂຄງ­ການ 7 ປີ ເຮັດ​ໃຫ້​ເຮົາ​ເຫັນ​ນັກ­ຮຽນ​ຈຳ­ນວນ​ຫຼາຍ​ທີ່​ມີ​ຄວາມ​ຝັນ ແລະ ມຸ່ງ​ໝັ້ນ​ຢາກ​ປະ­ສົບ​ຜົນ­ສຳ­ເລັດ​ໃນ​ການ​ສຶກ​ສາ ເພື່ອ​ນຳ​ຄວາມ​ຮູ້​ໄປ​ໃຊ້​ໃນ​ການ​ປະ­ກອບ​ອາ­ຊີບ ຍົກ​ລະ­ດັບ​ຄຸ­ນະ­ພາບ​ຊີ­ວິດ ເອ​ັສ​ຊີ​ຈີ​ເຫັນ​ວ່າ­ການ​ສຶກ​ສາ​ຄື​ຮາກ​ຖານ​ສຳ­ຄັນ ທີ່​ຈະ​ພັດ­ທະ­ນາ​ໃຫ້​ເດັກ​ເຫຼົ່າ​ນີ້​ມີ​ຄວາມ​ພ້ອມ ແລະ ເປັນ​ຮາກ​ຖານ​ໃນ​ການ​ພັດ­ທະ­ນາ​ປະ­ເທດ​ຊາດ​ຕໍ່​ໄປ ຕາມ​ວິ­ໄສ​ທັດ​ຂອງ​ເຮົາ​ໃນ​ການ​ຮ່ວມ​ສ້າງ​ຄຸ­ນະ­ພາບ​ຊີ­ວິດ​ທີ່​ດີ​ຂຶ້ນ​ຂອງ​ສັງ­ຄົມ ແລະ ຫວັງ​ວ່າ​ໂຄງ­ການ​ມອບ​ທຶນ​ການ​ສຶກ​ສາ​ເອັສ​ຊີ​ຈີ ຈະ​ເປັນ​ການ​ມອບ​ໂອ­ກາດ​ທີ່​ດີ​ໃຫ້​ເຍົາ­ວະ​ຊົນ​ທຸກ​ຄົນ ທີ່​ມີ​ຄວາມ​ມຸ່ງ​ໝັ້ນ​ຕັ້ງ­ໃຈ​ສຶກ​ສາ​ຮ່ຳ­ຮຽນ ສາ­ມາດ​ສ້າງ​ຜົນ­ງານ​ທີ່​ມີ​ຄຸນ­ຄ່າ​ເປັນ​ປະ­ໂຫຍດ​ໃຫ້​ແກ່​ຕົນ​ເອງ ສັງ­ຄົມ ແລະ ປະ­ເທດ​ຊາດ​ຕໍ່​ໄປ ເຊິ່ງ​ໂຄງ­ການ​ດັ່ງ­ກ່າວ​ຍັງ​ຈະ​ດຳ­ເນີນ​ຕໍ່​ໄປ​ອີກ​ໃນ​ອະ­ນາ­ຄົດ.

    ສະ­ເພາະ​ວັນ​ທີ 13 ພະ­ຈິກ ທ່ານ ໄຊ​ທັດ ຕົງ​ສາ­ລີ ຕາງ­ໜ້າ​ບໍ­ລິ­ສັດ​ເອັສ​ຊີ​ຈີ ພ້ອມ​ຄະ­ນະ ໄດ້​ລົງ​ຢ້ຽມ­ຢາມ​ນາງ ຕາ​ດຳ ວົງ​ພັກ­ດີ ເຊິ່ງ​ເປັນ​ບຸກ­ຄົນ​ໜຶ່ງ​ທີ່​ຖືກ​ຄັດ​ເລືອກ​ໃຫ້​ໄດ້​ຮັບ​ທຶນ​ຈາກ​ໂຄງ­ການ​ມອບ​ທຶນ​ການ​ສຶກ​ສາ​ເອັສ​ຊີ​ຈີ ປີ 2018 ຢູ່​ບ້ານ​ໂນນ​ສະ­ຫວັນ ແລະ ກຳ­ລັງ​ສຶກ​ສາ​ຢູ່​ຊັ້ນ ມ7 ໂຮງ­ຮຽນ ມປ ໂນນ​ສະ­ຫວ່າງ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ເຊິ່ງ​ການ​ລົງ​ຢ້ຽມ­ຢາມ​ຄັ້ງ​ນີ້ ແມ່ນ​ໄດ້​ສຳ­ຜັດ​ວິ­ຖີ​ຊີ­ວິດ​ຄວາມ​ເປັນ​ຢູ່​ຂອງ​ການ​ດຳ­ລົງ​ຊີ­ວິດ​ແຕ່​ລະ​ວັນ ເປັນ­ຕົ້ນ ການ​ສຶກ​ສາ​ຮ່ຳ­ຮຽນ ທີ່­ຢູ່​ອາ­ໄສ ແລະ ອື່ນໆ ພ້ອມ​ນີ້ ຍັງ​ໄດ້​ໂອ້​ລົມ​ຢ່າງ​ໃກ້­ຊິດ ເພື່ອ​ໃຫ້​ເຂົ້າ­ໃຈ​ເຖິງ​ອຸ­ປະ­ສັກ ແລະ ໃຫ້​ກຳ­ລັງ​ໃຈ.