ຊັບ​ສິນ​ຂອງ BoJ ມີ​ເກີນ GDP ຂອງ​ຍີ່ປຸ່ນ

100 15 ພ.ຈ. 2018 ຂ່າວຕ່າງປະເທດ
ຊັບ​ສິນ​ຂອງ BoJ ມີ​ເກີນ GDP ຂອງ​ຍີ່ປຸ່ນ

     ທະນາຄານ​ກາງ​ຍີ່ປຸ່ນ (BoJ) ໄດ້​ກາຍເປັນ​ທະນາຄານ​ຂອງ​ປະເທດ​ທຳ​ອິດ ຢູ່​ໃນ​ກຸ່ມ​ບັນດາ ປະເທດ​ອຸດສາຫະກຳ​ພັດທະນາ​ແຖວ​ໜ້າ​ຂອງ​ໂລກ (G7) ທີ່​ຄອບ​ຄອງ​ປະລິມານ​ຊັບ​ສິນ ທີ່​ມີ​ຍອດ​ມູນ​ຄ່າ​ໃຫຍ່​ກວ່າ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ຂອງ​ຍີ່ປຸ່ນ ຫຼັງ​ຈາກ​ທີ່ ກ້າ​ໃຊ້​ຈ່າຍ​ຢ່າງ​ແຮງ​ມາ​ເປັນ​ເວລາ 5 ປີ ເພື່ອ​ຊຸກຍູ້​ເງິນ​ເຟີ້.

    ມູນ​ຄ່າ​ຊັບ​ສິນ 553.600 ຕື້​ເຢນ (ເທົ່າ​ກັບ 4.870 ຕື້​ໂດ​ລາ​ສະຫະລັດ) ທີ່ BoJ ຄອບ​ຄອງ​ຢູ່ ນັ້ນ  ໃຫຍ່​ທົບ​ກວ່າ​ຫ້າ​ເທົ່າ​ຕົວ ຂອງ​ບໍລິສັດ​ທີ່​ມີ​ຄຸນຄ່າ​ທີ່​ສຸດ​ໃນ​ໂລກ ໄດ້ແກ່ Apple Inc. ແລະ​ທົບ 25 ເທົ່າ​ຕົວ ຂອງ​ມູນ​ຄ່າ​ການ​ຫັນ​ເປັນ​ທຶນ​ໃນ​ຕະຫຼາດ ຂອງ​ບໍລິສັດ​ທີ່​ມີ​ຄຸນຄ່າ​ທີ່​ສຸດ ໃນ​ຍີ່ປຸ່ນ ໄດ້ແກ່ Toyota Motor Corp. ຕົວ​ເລກ​ດັ່ງກ່າວ ກໍ​ນັບ​ວ່າ​ເກີນ GDP ຂອງ​ຕະຫຼາດ​ເກີດ​ໃໝ່​ຫ້າ​ແຫ່ງ ໄດ້ແກ່​ຕວກ​ກີ ອາກ​ຊັງ​ຕິນ ອາ​ຟະ​ຣິກ​ກາ​ໃຕ້ ອິນ​ເດຍ ແລະ ​ອິນ​ໂດ​ເນ​ເຊຍ ບວກ​ເຂົ້າກັນ.

    ດັ່ງນັ້ນ BoJ ຈຶ່ງ​ໄດ້​ກາຍເປັນ​ທະນາຄານ​ກາງ​ແຫ່ງ​ທີ​ສອງ​ຂອງ​ໂລກ ໂດຍ​ເປັນ​ຮອງ​ຈາກ ທະນາຄານ​ກາງ​ສະ​ວິດ ແລະ ​ກໍ​ເປັນ​ທະນາຄານ​ກາງ​ແຫ່ງ​ທຳ​ອິດ​ໃນ​ກຸ່ມ G7 ທີ່​ຄອບ​ຄອງ​ຊັບ​ສິນ ໃນ​ປະລິມານ​ທີ່​ໃຫຍ່​ກວ່າ​ທົ່ວ​ທັງ​ພື້ນຖານ​ເສດຖະກິດ ຊຶ່ງ BoJ  ພວມ​ພະຍາຍາມ​ຊຸກຍູ້.

    ຕົວ​ເລກ​ໃໝ່​ຫຼ້າ​ສຸດ ໃຫ້​ຮູ້​ວ່າ GDP ຂອງ​ຍີ່ປຸ່ນ ໃນ​ໄຕ​ມາດ 2/2018 ບັນລຸ​ມູນ​ຄ່າ  552.820,7 ຕື້​ເຢນ ແລະ GDP ໃນ​ໄຕ​ມາດ 3/2018 ທີ່​ຄາດ​ວ່າ​ຈະ​ນຳ​ອອກ​ມາ​ປະກາດ​ໃນ​ວັນ​ທີ 14 ພະຈິກ​ນີ້ ໄດ້​ຮັບ​ການ​ຄາດ​ຄະເນ​ວ່າ​ຈະ​ຫຼຸດ​ລົງ ຫຼັງ​ຈາກ​ທີ່​ເກີດ​ໄພ​ທຳ​ມະ​ຊາດ​ຫຼາຍ​ລາຍ ໃນ​ໄລຍະ​ທີ່ ຜ່ານ​ມາ.

ຂ່າວທີ່ກ່ຽວຂ້ອງ