ຫົວໜ້າ​ຝ່າຍ​ຄ້ານ​ໃນ​ຣັດ​ເຊຍ ຖືກ​ຫ້າມ​ອອກ​ຈາກ​ຣັດ​ເຊຍ​ໄປ​ຍັງ​ເອີ​ຣົບ

101 15 ພ.ຈ. 2018 ຂ່າວຕ່າງປະເທດ
ຫົວໜ້າ​ຝ່າຍ​ຄ້ານ​ໃນ​ຣັດ​ເຊຍ ຖືກ​ຫ້າມ​ອອກ​ຈາກ​ຣັດ​ເຊຍ​ໄປ​ຍັງ​ເອີ​ຣົບ

    ຂ່າວສານ AFP ລາຍ​ງານ​ວ່າ ທ່ານ ອາ​ເລັກ​ເຊ ນາ​ວາ​​ລ​ນີ ຫົວ​ໜ້າ​​​ຝ່າຍ​ຄ້ານ​ໃນ​ຣັດ​ເຊຍ ແຈ້ງ​ໃຫ້​ຮູ້ເມື່ອ​ວັນ​ທີ 13 ພະຈິກ​ນີ້ ວ່າ​ເຂົາ​ຖືກ​ກີດ​ກັນ ບໍ່​ໃຫ້​ເດີນທາງ​ອອກ​ຈາກ​ຣັດ​ເຊຍ ເພື່ອ​ໄປ​ຍັງ ເອີ​ຣົບ.

    ອົງການ​ໄອ​ຍະ​ການ​ຂອງ​ຣັດ​ເຊຍ ແຈ້ງ​ໃຫ້​ຮູ້​ໃນ​ເວລາ​ຕໍ່​ມາ​ວ່າ ທ່ານ ນາ​ວາ​​ລ​ນີ ໄດ້​ຖືກ​ຫ້າມ​ອອກ​ໄປ​ຈາກ​ຣັດ​ເຊຍ ຍ້ອນ​​ວ່າ​ພົວພັນ​ເຖິງ​ບ້ວງ​ເງິນ​ປັບ​ໃໝ 2,1 ລ້ານ​ຣຸບ (ເທົ່າ​ກັບ  31.000 ໂດ​ລາ​​ສ​ະຫະ​ລັດ) ຈາກ​ຄະດີ​ໜຶ່ງ ຊຶ່ງ​ເກີດ​ຂຶ້ນ​ເມື່ອ​ປີ 2013. ກົດໝາຍ​ຂອງ​ຣັດ​ເຊຍ ລະບຸ​ວ່າ ຜູ້​ທີ່​ມີ​ບ້ວງ​ໜີ້​ສິນ​ທີ່​ຍັງ​ບໍ່​ທັນ​ໄດ້​ຊຳລະ ແມ່ນ​ອາດ​ຈະ​ຖືກ​ຫ້າມ​ເດີນທາງ​ອອກ​ໄປ​ນອກ​ປະເທດ.

    ເຖິງ​ຢ່າງໃດ​ກໍ​ຕາມ ທ່ານ ນາ​ລາ​​ລ​ນີ ເວົ້າ​ວ່າ “ເຂົາ​ບໍ່​ມີ​ບ້ວງ​ເງິນ​ປັບ​ໃໝ​ທີ່​ຍັງ​ບໍ່​ທັນ​ໄດ້​ຊຳລະ” ແລະ ເວົ້າ​ວ່າ ເທື່ອ​ສຸດ​ທ້າຍ​ທີ່​ເຂົາ​ເດີນທາງ​ໄປ​​ຕ່າງ​ປະເທດ ແມ່ນ​ເມື່ອ​ກ່ອນ​ນີ້​ສອງ​ອາທິດ ຊຶ່ງ​ທຸກ​ຢ່າງ ເປັນ​ໄປ​ໂດຍ​ດີ. ໃນ​ຂະນະ​ດຽວ​ກັນ ທະນາຍຄວາມ​ຂອງ​ທ່ານ ນາ​ວາ​​ລ​ນີ ກ່າວ​ຕໍ່​ຜູ້​ສື່​ຂ່າວ AFP ວ່າ​ເຂົາ​ບໍ່​ໄດ້​ຮັບ​ເອກະສານ​ຢ່າງ​ເປັນ​ທາງ​ການ​ໃດໆ ກ່ຽວ​ກັບ​ເລື່ອງ​ດັ່ງກ່າວ ດັ່ງນັ້ນ ເຂົາເຈົ້າ​ຈຶ່ງ​ຈະ ສູ້​ຕໍ່​ຄຳ​ສັ່ງ​ຫ້າມ​ດັ່ງກ່າວ.

    ທ່ານ ອາ​ເລັກ​ເຊ ນາ​ວາ​​ລ​ນີ ຖືກ​ຫ້າມ​ເດີນທາງ​ອອກ​ຈາກ​ປະເທດ (ຣັດ​ເຊຍ) ແຕ່​ປີ  2013 ຮອດ​ປີ 2017 ເມື່ອ​ທາງ​ການ​ຣັດ​ເຊຍ ປະຕິເສດ​ການ​ອອກ​ປັດ​ສະ​ປໍ​ໃຫ້​ເຂົາ ຍ້ອນ​ກໍລະນີ​ການ ຮ້ອງ​ຟ້ອງ ຕ້ານ​ກັບ​ທ່ານ ນາ​ວາ​​ລ​ນີ.

 

ຂ່າວທີ່ກ່ຽວຂ້ອງ