ສປຊ ແຈ້ງເຕືອນສະພາບດື້ຢາຕ້ານເຊື້ອຢູ່ໃນອາຊີ

92 15 ພ.ຈ. 2018 ຂ່າວຕ່າງປະເທດ
ສປຊ ແຈ້ງເຕືອນສະພາບດື້ຢາຕ້ານເຊື້ອຢູ່ໃນອາຊີ

      ບົດລາຍງານຂອງສະຫະປະຊາຊາດ (ສປຊ) ທີ່ມີອອກມາເມື່ອວັນທີ 12 ພະຈິກນີ້ ໃຫ້ຮູ້ວ່າ ເມື່ອຮອດປີ 2050 ຈະມີຜູ້ເສຍຊີວິດປະມານ 50 ລ້ານຄົນ/ປີ ຢູ່ໃນທະວີບອາຊີ ຍ້ອນການດື້ຢາຕ້ານເຊື້ອ.

    ບົດລາຍງານດັ່ງກ່າວ ຖືກນຳອອກມາຢູ່ໃນ ສັບປະດາໂລກແຫ່ງຄວາມຮັບຮູ້ກ່ຽວກັບການຕ້ານເຊື້ອ (WAAW) ຢູ່ໃນອາຊີ ແລະປາຊີຟິກ. ບັນດາອົງການຂອງ ສປຊ ອັນປະກອບດ້ວຍ ອົງການອາຫານ ແລະກະສິກຳຂອງ ສປຊ (FAO) ອົງການອະນາໄມໂລກ (WHO) ແລະໂຄງການສະພາບແວດລ້ອມຂອງ ສປຊ (UNEP) ໄດ້ຮຽກຮ້ອງໃຫ້ນຳໃຊ້ຢາຕ້ານເຊື້ອ ຢ່າງມີຄວາມຮັບຜິດຊອບຫຼາຍຂຶ້ນ ຢູ່ໃນຄົນ ໃນສັດ ແລະໃນພາກກະສິກຳ.

    ສປຊ ເນັ້ນໜັກວ່າຢາຕ້ານເຊື້ອຫຼາຍປະເພດ ບໍ່ມີປະສິດທິພາບໃນການຕ້ານການຕິດເຊື້ອອີກແລ້ວ. ສປຊ ໃຫ້ການຄາດຄະເນວ່າ ຈຳນວນຄົນເສຍຊີວິດຍ້ອນດື້ຢາຕ້ານເຊື້ອ (AMR) ອາດຈະມີເກີນຈຳນວນຄົນເສຍຊີວິດຍ້ອນພະຍາດມະເຮັງໃນແຕ່ລະປີ. ນີ້ຖືວ່າເປັນ “ສະຖານະການສຸກເສີນກ່ຽວກັບສຸຂະພາບທົ່ວໂລກ.”

    ຈາກຖະແຫຼງການຕົ້ນຕໍກໍຄື “ນຳໃຊ້ຢາຕ້ານເຊື້ອຢ່າງລະມັດລະວັງ” ນັ້ນ ສັບປະດາໂລກແຫ່ງຄວາມຮັບຮູ້ການຕ້ານເຊື້ອໃນປີນີ້ ສຸມໃສ່ບັນດາແຜນການດຳເນີນງານ ເພື່ອສະກັດກັ້ນການຕິດເຊື້ອຢູ່ໃນການລ້ຽງສັດ ການເພາະລ້ຽງສິນໃນນ້ຳ ແລະ ການປູກຝັງ ໃນຂະນະທີ່ຊຸກຍູ້ການຜະລິດທີ່ດີ ແລະຊຸກຍູ້ຄວາມປອດໄພດ້ານສະບຽງອາຫານ.

    ສປຊ ຖືວ່າການເສຍຊີວິດຍ້ອນດື້ຢາຕ້ານເຊື້ອ ເປັນບັນຫາດ້ານສາທາລະນະສຸກ ອັນເປັນບຸລິມະສິດ ເພື່ອແກ້ໄຂບັນດາບັນຫາສຸກເສີນ ເຊັ່ນພະຍາດ ອີໂບລາ (Ebola)  ແລະ HIV ດັ່ງນີ້ເປັນຕົ້ນ.

 

ຂ່າວທີ່ກ່ຽວຂ້ອງ