ອົງການພຸດທະສາສະໜາ 3 ປະເທດ ເສີມຂະຫຍາຍການຮ່ວມມືໃຫ້ໝັ້ນຄົງຍາວນານ

184 13 ພ.ຈ. 2018 ຂ່າວໜ້າ​ໜຶ່ງ
ອົງການພຸດທະສາສະໜາ 3 ປະເທດ ເສີມຂະຫຍາຍການຮ່ວມມືໃຫ້ໝັ້ນຄົງຍາວນານ

    ກອງ​ປະ­ຊຸມ​ປະ­ທານ​ອົງ­ການ​ພຸດ​ທະ​ສາ­ສະ­ໜາ ລາວ-ກຳ­ປູ­ເຈຍ-ຫວຽດ­ນາມ ຄັ້ງ​ທີ I ພາຍ​ໃຕ້​ຫົວ­ຂໍ້ “ເພີ່ມ​ທະ­ວີ​ມູນ­ເຊື້ອ​ສາຍ​ພົວ­ພັນ​ຄວາມ​ສາ­ມັກ­ຄີ ແລະ ການ​ຮ່ວມ​ມື​ລະ­ຫວ່າງ​ອົງ­ການ​ພຸດ​ທະ​ສາ­ສະ­ໜາ 3 ປະ­ເທດ ລາວ-ກຳ­ປູ­ເຈຍ-ຫວຽດ­ນາມ ໃນ​ເງື່ອນ­ໄຂ​ເຊື່ອມ​ໂຍງ​ພາກ​ພື້ນ ແລະ ສາ­ກົນ” ຈັດ​ຂຶ້ນ​ວັນ​ທີ 12 ພະ­ຈິກ 2018 ທີ່​ຫໍ​ປະ­ຊຸມ​ແຫ່ງ​ຊາດ ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຮ່ວມ​ຂອງ​ພະ​ອາ­ຈານ​ໃຫຍ່ ມະ­ຫາ​ງອນ ດຳ​ຣົງ​ບຸນ ປະ­ທານ​ສູນ​ກາງ​ອົງ­ການ​ພຸດ​ທະ​ສາ­ສະ­ໜາ​ສຳ­ພັນ​ລາວ ສົມ­ເດັດ ພະ​ອະ​ກາ​ມະ­ຫາ​ພະ​ສັງ­ຄະ​ລາດ ດິ​ປາ​ຕິ ເທບ​ວົງ ພະ​ສັງ­ຄະ​ລາດ ແຫ່ງ​ຣາ​ຊະ​ອາ­ນາ­ຈັກ​ກຳ­ປູ­ເຈຍ ແລະ ພະ​ອາ­ຈານ​ໃຫຍ່ ທິກ ຖ້ຽນ ເຍິນ ປະ­ທານ​ສະ­ພາ​ບໍ­ລິ­ຫານ​ງານ​ສູນ​ກາງ​ອົງ­ການ​ພຸດ​ທະ​ສາ­ສະ­ໜາ​ຫວຽດ­ນາມ ມີ​ທ່ານ ໄຊ​ສົມ​ພອນ ພົມ­ວິ­ຫານ ປະ­ທານ​ສູນ​ກາງ​ແນວ​ລາວ​ສ້າງ​ຊາດ ພ້ອມ​ດ້ວຍ​ພະ​ເຖ­ລາ­ນຸ­ເຖລະ ແລະ ຜູ້­ຕາງ­ໜ້າ​ຈາກ​ການ​ນຳ​ພັກ-ລັດ ກຳ­ປູ­ເຈຍ ຫວຽດ­ນາມ ແລະ ພະ­ສົງ​ເຂົ້າ​ຮ່ວມ 570 ກວ່າ​ອົງ.

    ພະ​ອາ­ຈານ​ໃຫຍ່ ມະ­ຫາ​ງອນ ດຳ​ຣົງ​ບຸນ ກ່າວ​ວ່າ: ກອງ​ປະ­ຊຸມ​ທີ່​ມີ​ຄວາມ​ໝາຍ​ຄວາມ​ສຳ­ຄັນ​ນີ້ ຖື​ເປັນ​ໂອ­ກາດ​ສຳ­ຄັນ​ທີ່ 3 ອົງ­ການ​ພຸດ​ທະ​ສາ­ສະ­ໜາ ໄດ້​ມາ​ພົບ​ປະ​ປຶກ­ສາ​ຫາ­ລື​ແລກ­ປ່ຽນ​ຂໍ້​ມູນ​ຂ່າວ­ສານ ແນ­ໃສ່​ເພີ່ມ​ທະ­ວີ ແລະ ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ ຄວາມ​ສາ­ມັກ­ຄີ ແລະ ການ​ຮ່ວມ​ມື​ທີ່​ເປັນ​ມູນ­ເຊື້ອ​ລະ­ຫວ່າງ 3 ປະ­ເທດ ກໍ່​ຄື 3 ອົງ­ການ​ພຸດ​ທະ​ສາ­ສະ­ໜາ​ໃນ​ໄລ­ຍະ​ໃໝ່ ເຊິ່ງ​ກອງ​ປະ­ຊຸມ​ຄະ­ນະ​ຜູ້​ແທນ​ທັງ​ສາມ​ຝ່າຍ ໄດ້​ເຫັນ​ດີ​ເປັນ​ເອ­ກະ​ພາບ​ສືບ­ຕໍ່​ຮ່ວມ​ມື​ກັນ​ຢ່າງ​ໃກ້­ຊິດ ບົນ​ພື້ນ­ຖານ​ເຄົາ­ລົບ​ອະ­ທິ­ປະ​ໄຕ​ກັນ ແລະ ກັນ ຄວາມ​ສະ­ເໝີ­ພາບ ຮັກ­ສາ​ສະ­ຖຽນ​ລະ​ພາບ ແລະ ການ​ຮ່ວມ​ມື​ພັດ­ທະ­ນາ​ຢ່າງ​ກົມ­ກຽວ 3 ອົງ­ການ​ພຸດ​ທະ​ສາ­ສະ­ໜາ ຈະ​ເພີ່ມ​ທະ­ວີ​ໂຄ­ສະ­ນາ​ສຶກ​ສາ​ອົບ­ຮົມ​ປະ­ຊາ­ຊົນ ແລະ ສາ​ສະ​ນິ​ກະ​ຊົນ​ໃຫ້​ເຂົ້າ­ໃຈ​ເລິກ­ເຊິ່ງ​ເຖິງ​ການ​ຮ່ວມ​ມື 3 ຝ່າຍ ກໍ່​ຄື ການ​ຮ່ວມ​ມື​ຂອງ​ສາມ​ອົງ­ການ​ພຸດ​ທະ​ສາ­ສະ­ໜາ ໃຫ້​ກ້າວ​ສູ່​ລວງ​ເລິກ​ຍິ່ງ​ຂຶ້ນ ຖື​ສຳ­ຄັນ ແລະ ເປີດ​ກວ້າງ​ບັນ­ດາ​ຮູບ​ການ​ພົບ​ປະ​ມິດ­ຕະ­ພາບ ລະ­ຫວ່າງ​ພະ­ສົງ-ສາ­ມະ­ເນນ ອຸ​ປະ­ສົກ ອຸ​ປາ​ສິ​ກາ ເພື່ອ​ປະ­ກອບ­ສ່ວນ​ເຂົ້າ​ໃນ​ການ​ພັດ­ທະ­ນາ​ຮອບ­ດ້ານ ພ້ອມ​ນີ້ ທັງ​ສາມ​ອົງ­ການ​ພຸດ​ທະ​ສາ­ສະ­ໜາ ຍັງ​ຈະ​ໄດ້​ເອົາ­ໃຈ­ໃສ່​ປະ­ສານ​ສົມ­ທົບ​ຊຸກ­ຍູ້​ການ­ເຄື່ອນ­ໄຫວ​ຂອງ​ການ­ຈັດ­ຕັ້ງ​ພຸດ​ທະ​ສາ­ສະ­ໜາ 3 ປະ­ເທດ ໃນ​ຂັ້ນ​ສູນ​ກາງ-ທ້ອງ­ຖິ່ນ ແນ­ໃສ່​ເພີ່ມ​ທະ­ວີ​ການ​ຮ່ວມ​ມື​ໃຫ້​ນັບ​ມື້​ແໜ້ນ​ແຟ້ນ ຄຽງ​ຄູ່​ກັບ​ການ​ສ້າງ​ເງື່ອນ­ໄຂ​ທີ່​ເອື້ອ​ອຳ­ນວຍ​ໃນ​ການ​ກໍ່­ສ້າງ ແລະ ບຳ­ລຸງ​ຍົກ​ລະ­ດັບ​ໃຫ້​ພະ­ສົງ-ສາ­ມະ­ເນນ ແລະ ພະ­ນັກ­ງານ​ຈາກ​ອົງ​ການ­ຈັດ­ຕັ້ງ​ກ່ຽວ­ຂ້ອງ ທີ່​ຮັບ­ຜິດ­ຊອບ​ວຽກ​ງານ​ສາ­ສະ­ໜາ​ຂອງ 3 ປະ­ເທດ ພ້ອມ​ກັນ​ຄົ້ນ­ຄວ້າ​ບົດ­ຮຽນ​ຮ່ວມ​ກັນ ໂດຍ​ຜ່ານ​ກິດ­ຈະ­ກຳ​ທີ່​ກ່ຽວ​ພັນ​ເຖິງ​ພຸດ​ທະ​ສາ­ສະ­ໜາ ບົນ​ພື້ນ­ຖານ​ຄວາມ​ສອດ­ຄ່ອງ ແລະ ຄວາມ​ຮຽກ­ຮ້ອງ​ຕ້ອງ­ການ​ຂອງ​ແຕ່​ລະ​ຝ່າຍ.

    ໂອ­ກາດ​ນີ້ ອົງ­ການ​ພຸດ​ທະ​ສາ­ສະ­ໜາ ລາວ-ກຳ­ປູ­ເຈຍ-ຫວຽດ­ນາມ ໄດ້​ເຫັນ​ດີ ແລະ ເປັນ​ເອ­ກະ​ພາບ​ຮ່ວມ​ເຊັນ​ບົດ​ບັນ­ທຶກ ເພື່ອ​ສືບ­ຕໍ່​ເສີມ​ຂະ­ຫຍາຍ​ໝາກ­ຜົນ​ການ​ຮ່ວມ​ມື​ໃຫ້​ໝັ້ນ­ຄົງ​ຍາວ​ນານ ແນ­ໃສ່​ສ້າງ​ຜົນ​ປະ­ໂຫຍດ​ຂອງ​ປະ­ຊາ­ຊົນ 3 ຊາດ ກໍ່​ຄື ຜົນ​ປະ­ໂຫຍດ​ຂອງ​ສັນ­ຕິ­ພາບ ມິດ­ຕະ­ພາບ ແລະ ການ​ຮ່ວມ​ມື​ໃນ​ພາກ​ພື້ນ ແລະ ໃນ​ໂລກ.

    ສຳ­ລັບ​ກອງ​ປະ­ຊຸມ​ອົງ­ການ​ພຸດ​ທະ​ສາ­ສະ­ໜາ ລາວ-ກຳ­ປູ­ເຈຍ-ຫວຽດ­ນາມ ຄັ້ງ​ທີ II  ຈະ​ໄດ້​ຈັດ​ຂຶ້ນ ທີ່ ສສ ຫວຽດ­ນາມ​ໃນ​ປີ 2020.

ຂ່າວທີ່ກ່ຽວຂ້ອງ