ເປີດນຳໃຊ້ສູນການຄ້າ ທາດຫຼວງພຣາຊາ

210 13 ພ.ຈ. 2018 ຂ່າວໜ້າ​ໜຶ່ງ
ເປີດນຳໃຊ້ສູນການຄ້າ ທາດຫຼວງພຣາຊາ

    ວັນ​ທີ 10 ພະ­ຈິກ 2018 ບໍ­ລິ­ສັດ ຈິດ​ຈະ­ເລີນ​ທາດ­ຫຼວງ​ພຣາ​ຊາ ໄດ້​ຈັດ​ພິ­ທີ​ເປີດ​ນຳ​ໃຊ້​ສູນ​ການ​ຄ້າ​ທາດ­ຫຼວງ​ພຣາ​ຊາ ຢູ່​ບ້ານ​ທາດ­ຫຼວງ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ​ຫຼວງ​ວຽງ​ຈັນ ທ່ານ​ນາງ ເຂັມ​ມະ­ນີ ພົນ​ເສ­ນາ ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ທ່ານ​ທູດ​ໄທ ແລະ ທູດ​ຫວຽດ­ນາມ ປະ­ຈຳ​ລາວ ທ່ານ​ເຈົ້າ­ເມືອງ​ໄຊ​ເຊດ​ຖາ ທ່ານ​ປະ­ທານ​ບໍ­ລິ­ສັດ​ຈິດ​ຈະ­ເລີນ​ທາດ­ຫຼວງ​ພຣາ​ຊາ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ທ່ານ ສົມ­ບັດ ສິ​ຣິ​ພອນ​ວິ­ທະ­ຍາ ຜູ້​ຈັດ­ການ​ໃຫຍ່​ສູນ​ການ​ຄ້າ​ທາດ­ຫຼວງ​ພຣາ​ຊາ ກ່າວ​ວ່າ: ປັດ­ຈຸ­ບັນ ປະ­ເທດ​ລາວ​ໄດ້​ມີ​ສູນ​ການ​ຄ້າ​ນັບ​ມື້​ເພີ່ມ​ຂຶ້ນ ແຕ່​ຄຽງ​ຄູ່​ກັບ​ການ​ເພີ່ມ​ຂຶ້ນ​ນັ້ນ ສິນ­ຄ້າ​ບາງ​ປະ­ເພດ​ຍັງ​ບໍ່​ມີ​ຈຳ­ໜ່າຍ​ພຽງ­ພໍ​ກັບ​ຄວາມ​ຕ້ອງ­ການ​ຂອງ​ຜູ້​ຊົມ­ໃຊ້ ໃນ​ນີ້ ສູນ​ການ​ຄ້າ​ທາດ­ຫຼວງ​ພຣາ​ຊາ ເປັນ​ສູນ​ການ​ຄ້າ​ໜຶ່ງ​ທີ່​ມີ​ສິນ­ຄ້າ​ຫຼາຍ​ປະ­ເພດ ໂດຍ​ນຳ​ເຂົ້າ​ຈາກ​ພາຍ​ໃນ ແລະ ຕ່າງ­ປະ­ເທດ ເຊິ່ງ​ສູນ​ດັ່ງ­ກ່າວ​ປະ­ກອບ​ດ້ວຍ 7 ຊັ້ນ ມີ​ຮ້ານ​ຂາຍ­ເຄື່ອງ​ອຸ­ປະ­ໂພກ-ບໍ­ລິ­ໂພກ ຜະ­ລິດ​ຕະ​ພັນ​ຄວາມ​ງາມ ເຄື່ອງ­ໃຊ້​ຄົວ​ເຮືອນ​ຕ່າງໆ​ຄົບ​ຊຸດ ແລະ ສູນ​ອອກ­ກຳ­ລັງ​ກາຍ ພ້ອມ​ນີ້​ຍັງ​ມີ​ສິນ­ຄ້າ​ໜຶ່ງ​ເມືອງ​ໜຶ່ງ​ຜະ­ລິດ​ຕະ​ພັນ​ສິນ­ຄ້າ​ໂອ​ທ໋ອບ ແລະ ອື່ນໆ ທັງ​ນີ້​ກໍ່​ເພື່ອ​ແລກ­ປ່ຽນ​ດ້ານ​ການ​ຄ້າ​ເຊິ່ງ​ກັນ ແລະ ກັນ ລະ­ຫວ່າງ​ຜູ້​ປະ­ກອບ​ການ ອຳ­ນວຍ​ຄວາມ​ສະ­ດວກ​ສະ­ບາຍ​ໃຫ້​ແກ່​ລູກ​ຄ້າ​ທັງ​ພາຍ​ໃນ ແລະ ຕ່າງ­ປະ­ເທດ ໃນ​ການ​ເລືອກ​ຊື້​ສິນ­ຄ້າ ການ​ບໍ­ລິ­ການ​ຕ່າງໆ​ຄົບ​ຊຸດ​ໃນ​ບ່ອນ​ດຽວ ສູນ​ການ​ຄ້າ​ດັ່ງ­ກ່າວ ເປີດ​ໃຫ້​ບໍ­ລິ­ການ​ແຕ່ 9:00-19:00 ໂມງ​ທຸກໆ​ວັນ.

ຂ່າວທີ່ກ່ຽວຂ້ອງ