ເກີດມີສັດນໍ້າຕາຍຢູ່ສາຍນໍ້າຕອນ ເມືອງສັງທອງ

193 13 ພ.ຈ. 2018 ຂ່າວໜ້າ​ໜຶ່ງ
ເກີດມີສັດນໍ້າຕາຍຢູ່ສາຍນໍ້າຕອນ ເມືອງສັງທອງ

    ນັບ​ແຕ່​ວັນ​ທີ 7 ພະ­ຈິກ 2018 ເປັນ­ຕົ້ນ​ມາ ປະ­ຊາ­ຊົນ​ໄດ້​ພົບ​ເຫັນ​ສັດ​ນ້ຳ ໂດຍ​ສະ­ເພາະ​ແມ່ນ​ປາ​ຕາຍ​ຈຳ­ນວນ​ຫຼາຍ​ຢູ່​ສາຍ​ນ້ຳ​ຕອນ ເມືອງ​ສັງ​ທອງ ນະ­ຄອນ­ຫຼວງ​ວຽງ​ຈັນ ເຊິ່ງ​ເປັນ​ປາ­ກົດ­ການ​ໜຶ່ງ​ທີ່​ບໍ່​ເຄີຍ​ມີ​ມາ​ກ່ອນ ທີ່​ເກີດ​ຂຶ້ນ​ກັບ​ແມ່­ນ້ຳ​ດັ່ງ­ກ່າວ​ທີ່​ເປັນ​ແມ່­ນ້ຳ​ທຳ​ມະ​ຊາດ ສ່ວນ​ສາ­ເຫດ​ແມ່ນ​ຍັງ​ບໍ່​ທັນ​ຮູ້ ປັດ­ຈຸ­ບັນ​ໄດ້​ຫ້າມ​ບໍ່​ໃຫ້​ບໍ­ລິ­ໂພກ ແລະ ຈຳ­ໜ່າຍ.

    ຈາກ​ສະ­ພາບ​ການ​ທີ່​ເກີດ​ຂຶ້ນ​ນັ້ນ ເພື່ອ​ເປັນ​ການ​ເຕືອນ​ບໍ່​ໃຫ້​ປະ­ຊາ­ຊົນ​ເຂດ​ເມືອງ​ສັງ​ທອງ​ນຳ​ເອົາ​ປາ ຫຼື ສັດ​ນ້ຳ​ທີ່​ຕາຍ​ຍ້ອນ​ບໍ່​ຮູ້​ສາ­ເຫດ​ນັ້ນ​ມາ​ປຸງ​ແຕ່ງ​ບໍ­ລິ­ໂພກ ໃນ​ວັນ​ທີ 12 ພະ­ຈິກ 2018 ຫ້ອງ​ວ່າ­ການ​ປົກ­ຄອງ​ເມືອງ​ສັງ​ທອງ ໄດ້​ອອກ​ແຈ້ງ​ການ​ເຖິງ​ບັນ­ດາ​ຫົວ­ໜ້າ​ຫ້ອງ­ການ ກອງ​ບັນ­ຊາ​ການ ປກຊ-ປກສ ອຳ­ນາດ​ການ​ປົກ­ຄອງ​ບ້ານ ພະ­ນັກ­ງານ ແລະ ປະ­ຊາ­ຊົນ​ພາຍ​ໃນ​ເມືອງ​ຂອງ​ຕົນ​ບໍ່​ໃຫ້​ບໍ­ລິ­ໂພກ ແລະ ຈຳ­ໜ່າຍ​ສັດ​ນ້ຳ ຫຼື ປາ​ທີ່​ຕາຍ​ຢູ່​ຕາມ​ສາຍ​ນ້ຳ​ຕອນ​ຢ່າງ​ເດັດ­ຂາດ ຖ້າ​ພົບ​ເຫັນ​ສັດ​ນ້ຳ​ທຸກ​ປະ­ເພດ​ທີ່​ຕາຍ ແມ່ນ​ໃຫ້​ທຳ­ລາຍ​ຖິ້ມ​ດ້ວຍ​ການ​ຝັງ ຫຼື ເຝົາ​ທຳ­ລາຍ ຫ້າມ​ນຳ​ມາ​ປຸງ​ແຕ່ງ ຫຼື ບໍ­ລິ­ໂພກ ພ້ອມ​ນີ້​ຍັງ​ແຈ້ງ​ມາ​ຍັງ​ປະ­ຊາ­ຊົນ​ທີ່­ຢູ່​ຕາມ​ສາຍ​ນ້ຳ​ຕອນ ຈົ່ງ​ລະ­ມັດ­ລະ­ວັງ​ໃນ​ການ​ໃຊ້​ນ້ຳ​ຕອນ ເພື່ອ​ມາ​ບໍ­ລິ­ໂພກ ຫຼື ໃຫ້​ສັດ­ລ້ຽງ​ກິນ ໃນ​ກໍ­ລະ­ນີ​ທີ່​ປະ­ຊາ­ຊົນ​ທີ່​ນຳ​ໃຊ້​ຫາກ​ມີ​ອາ­ການ​ຜິດ​ປົກ­ກະ­ຕິ​ໃຫ້​ຮີບ​ຮ້ອນ​ໄປ​ພົບ​ແພດ​ໝໍ ຫຼື ສຸກ­ສາ­ລາ​ໃກ້​ບ້ານ​ດ່ວນ ພ້ອມ​ນີ້ ກໍ່​ມອບ​ໃຫ້​ຂະ­ແໜງ­ການ​ກ່ຽວ­ຂ້ອງ​ສົມ­ທົບ​ກັບ​ອຳ­ນາດ​ການ​ປົກ­ຄອງ​ບ້ານ ລົງ​ຕິດ­ຕາມ​ເບິ່ງ​ສະ­ພາບ​ສັດ​ນ້ຳ​ຕາມ​ສາຍ​ນ້ຳ​ຕອນ ຖ້າ​ຫາກ​ມີ​ປາ­ກົດ­ການ​ໃຫ້​ຮີບ​ຮ້ອນ​ລາຍ​ງານ​ພາກ­ສ່ວນ​ກ່ຽວ­ຂ້ອງ​ລົງ​ກວດ­ກາ ແລະ ເຮັດ​ບົດ​ບັນ­ທຶກ​ລາຍ​ງານ​ໃຫ້​ຂັ້ນ​ເທິງ​ເປັນ​ແຕ່​ລະ​ໄລ­ຍະ.

ຂ່າວທີ່ກ່ຽວຂ້ອງ