ວິ​ສາ​ຫະ​ກິດ 700 ແຫ່ງ​ຕ້ອງ​ປິດ​ກິດຈະການ ຍ້ອນ​ເງິນ​ເຟີ້​ຢູ່​ໃນ​ເວ​ເນ​ຊູ​ເອ​ລາ

116 13 ພ.ຈ. 2018 ຂ່າວຕ່າງປະເທດ
ວິ​ສາ​ຫະ​ກິດ 700 ແຫ່ງ​ຕ້ອງ​ປິດ​ກິດຈະການ ຍ້ອນ​ເງິນ​ເຟີ້​ຢູ່​ໃນ​ເວ​ເນ​ຊູ​ເອ​ລາ

     ທ່ານ ຈວນ ປາບ​ໂລ ໂອ​ລັນ​ເກຍ​ກາ ປະທານ​ສະຫະພັນ​ກຳມະບານ ຂອງ​ບັນດາ ຂະແໜງການ​ອຸດສາຫະກຳ​ເວ​ເນ​ຊູ​ເອ​ລາ (Coindustria) ກ່າວ​ເມື່ອ​ວັນ​ທີ 10 ພະຈິກ​ທີ່​ຜ່ານ​ມາ​ວ່າ ໃນ​ຮອບ 1 ປີຜ່ານມາ ມີ​ວິ​ສາ​ຫະ​ກິດ​ຢູ່​ໃນ​ປະເທດ​ນີ້​ຢ່າງ​ໜ້ອຍ  700 ແຫ່ງ ຕ້ອງ​ໄດ້​ປິດ​ກິດຈະການ ລົງ ຍ້ອນ​ໄດ້​ຮັບ​ຜົນ​ກະທົບ​ຈາກ​ສະພາບ​ເງິນ​ເຟີ້​ສູງ​ແກ່ຍາວ​ຢູ່​ໃນ​ເວ​ເນ​ຊູ​ເອ​ລາ.

   ທ່ານ ໂອ​ລັນ​ເກຍ​ກາ ເວົ້າ​ວ່າ ສ່ວນ​ໃຫຍ່​ຂອງ​ບັນດາ​ວິ​ສາ​ຫະ​ກິດ ທີ່​ຕ້ອງ​ຢຸດຕິ​ການ ເຄື່ອນ​ໄຫວ​ໃນ​ໄລຍະ​ທີ່​ຜ່ານ​ມາ ບໍ່​ແມ່ນ​ເປັນ​ຍ້ອນ​ຂາດ​ວັດຖຸ​ດິບ​ແຕ່​ຢ່າງໃດ ຫາກ​ເປັນ​ຍ້ອນ​ວ່າ ບໍ່​ມີ​ຕະຫຼາດ​ຈຳໜ່າຍ. ທ່ານ ໂອ​ລັນ​ເກຍ​ກາ ຢືນຢັນ​ວ່າ​ເວ​ເນ​ຊູ​ເອ​ລາ ບໍ່​ເປັນ​ປະເທດ​ອຸດສາຫະກຳ ອີກ​ແລ້ວ ເນື່ອງ​ຈາ​ກວ່າ​ຕ່ອງ​ໂສ້​ທີ່​ກໍ່ໃຫ້ເກີດ​ການ​ຫັນ​ເປັນ​ອຸດສາຫະກຳ​ຢູ່​ໃນ​ປະເທດ​ນີ້ ໄດ້​ຖືກ​ທຳລາຍ.

    ຕົວ​ເລກ​ຈາກ​ສະພາ​ແຫ່ງ​ຊາດ​ເວ​ເນ​ຊູ​ເອ​ລາ ທີ່​ຄວບ​ຄຸມ​ໂດຍ​ຝ່າຍ​ຄ້ານ​ນັ້ນ ໃຫ້​ຮູ້​ວ່າ ອັດຕາ​ສ່ວນ​ເງິນ​ເຟີ້​ຢູ່​ໃນ​ເວ​ເນ​ຊູ​ເອ​ລາ ໃນ 1 ປີຜ່ານມາ ພວມ​ຢູ່​ທີ່​ລະດັບ 833.997% ໃນ​ຂະນະ​ທີ່ ກອງ​ທຶນ​ເງິນຕາ​ສາກົນ (IMF) ໃຫ້ການ​ຄາດ​ຄະເນ​ວ່າ ເງິນ​ເຟີ້​ຢູ່​ໃນ​ເວ​ເນ​ຊູ​ເອ​ລາ ອາດ​ຈະ​ຂຶ້ນ​ສູ່ 10.000.000% (10 ລ້ານ %) ພາຍ​ໃນ​ປີ 2019.

 

ຂ່າວທີ່ກ່ຽວຂ້ອງ