ຂ່າວຫຼ້າສຸດ

ກອງປະຊຸມປະທານອົງການພຸດທະສາສະໜາ 3 ປະເທດ ຈະໄຂຂຶ້ນວັນນີ້

439 12 ພ.ຈ. 2018 ຂ່າວໜ້າ​ໜຶ່ງ

    ກອງ​ປະ­ຊຸມ​ປະ­ທານ​ອົງ­ການ​ພຸດ​ທະ​ສາ­ສະ­ໜາ 3 ປະ­ເທດ ຄື: ກຳ­ປູ­ເຈຍ-ລາວ-ຫວຽດ­ນາມ ຈະ​ໄຂ​ຂຶ້ນ​ເປັນ​ທາງ​ການ​ໃນ​ວັນ​ທີ 12 ພະ­ຈິກ 2018 ທີ່​ຫໍ​ປະ­ຊຸມ​ແຫ່ງ​ຊາດ ນະ­ຄອນ­ຫຼວງ​ວຽງ​ຈັນ.

    ເພື່ອ​ກຽມ​ເຂົ້າ​ຮ່ວມ​ກອງ​ປະ­ຊຸມ​ດັ່ງ­ກ່າວ ຄະ­ນະ​ຜູ້​ແທນ​ຂັ້ນ​ສູງ​ອົງ­ການ​ພຸດ​ທະ​ສາ­ສະ­ໜາ​ຈາກ ສສ ຫວຽດ­ນາມ ແລະ ລາ­ຊະ​ອາ­ນາ­ຈັກ​ກຳ­ປູ­ເຈຍ ກໍ່​ໄດ້​ເດີນ­ທາງ​ມາ​ເຖິງ​ນະ­ຄອນ­ຫຼວງ​ວຽງ​ຈັນ ເປັນ​ທີ່​ຮຽບ​ຮ້ອຍ​ແລ້ວ ໃນ​ວັນ​ທີ 12 ພະ­ຈິກ 2018 ແລະ ມີ​ພິ­ທີ​ຕ້ອນ­ຮັບ​ຢ່າງ​ເປັນ​ທາງ​ການ ໃນ​ຕອນ​ຄ່ຳ​ວັນ​ດຽວ​ກັນ ທີ່​ໂຮງ­ແຮມ​ອ່າງ​ຄຳ ໂດຍ​ມີ​ພະ​ອາ­ຈານ​ໃຫຍ່ ມະ­ຫາ​ງອນ ດຳ­ລົງ​ບຸນ ປະ­ທານ​ສູນ​ກາງ​ອົງ­ການ​ພຸດ​ທະ​ສາ­ສະ­ໜາ​ສຳ­ພັນ​ລາວ ທ່ານ ຈັນ­ທະ​ວົງ ແສນ​ອາ­ມາດ​ມົນ­ຕີ ຮອງ​ປະ­ທານ​ສູນ​ກາງ​ແນວ​ລາວ​ສ້າງ​ຊາດ ພ້ອມ​ດ້ວຍ​ພະ­ສົງ ແລະ ຝ່າຍ​ຄະ­ລາ­ວາດ​ຈຳ­ນວນ​ໜຶ່ງ​ເຂົ້າ​ຮ່ວມ ຄະ­ນະ​ຜູ​ແທນ​ຂັ້ນ​ສູງ​ອົງ­ການ​ພຸດ​ທະ​ສາ­ສະ­ໜາ ແຫ່ງ ສສ ຫວຽດ­ນາມ ນຳ​ໂດຍ​ພະ​ອາ­ຈານ​ໃຫຍ່ ທິກ ຖ້ຽນ ເຍິນ ປະ­ທານ​ສະ­ພາ​ບໍ­ລິ­ຫານ​ງານ​ສູນ​ກາງ ອົງ­ການ​ພຸດ​ທະ​ສາ­ສະ­ໜາ​ຫວຽດ­ນາມ ແລະ ຜູ້​ແທນ​ລາ­ຊະ​ອາ­ນາ­ຈັກ​ກຳ­ປູ­ເຈຍ ນຳ​ໂດຍ​ທ່ານ ຮີມ​ເຊັ່ງ ລັດ­ຖະ­ມົນ­ຕີ ຜູ້​ອາ­ວຸ­ໂສ​ກະ­ຊວງ​ທຳ​ມະ​ການ ແລະ ວັດ­ທະ­ນະ­ທຳ ແລະ ພະ​ອາ­ຈານ​ໃຫຍ່ ສົມ­ເດັດ ເທບ​ວົງ ພະ​ສັງ­ຄະ​ລາດ ແຫ່ງ ລາ­ຊະ​ອາ­ນາ­ຈັກ​ກຳ­ປູ­ເຈຍ.

    ກອງ​ປະ­ຊຸມ​ປະ­ທານ​ອົງ­ການ​ພຸດ​ທະ​ສາ­ສະ­ໜາ 3 ປະ­ເທດ ກຳ­ປູ­ເຈຍ-ລາວ-ຫວຽດ­ນາມ ໃນ​ຄັ້ງ​ນີ້ ເປັນ​ຄັ້ງ​ທຳ​ອິດ ແນ­ໃສ່​ສືບ­ຕໍ່​ຮັດ​ແໜ້ນ​ສາຍ​ໃຍ​ຄວາມ​ສຳ­ພັນ​ເຊິ່ງ​ກັນ ແລະ ກັນ​ໃຫ້​ນັບ​ມື້​ດີ​ຂຶ້ນ​ເລື້ອຍໆ ທັງ​ທາງ​ດ້ານ​ການ​ຮ່ວມ​ມື​ຄຸ້ມ​ຄອງ​ພະ­ສົງ ສາ­ມະ­ເນນ ການ​ສຶກ​ສາ​ສົງ ການ​ເຜີຍ­ແຜ່​ສິ­ລະ​ທຳ​ສັ່ງ­ສອນ​ຂອງ​ພຸດ​ທະ​ສາ­ສະ­ໜາ ການ​ສ້າງ​ວັດ​ວາ​ອາ​ຮາມ ແລະ ການ​ແລກ­ປ່ຽນ​ວັດ­ທະ­ນະ­ທຳ ຮີດ­ຄອງ​ປະ­ເພ­ນີ​ອັນ​ດີ­ງາມ​ທັງ​ສາມ​ຊາດ​ໃຫ້​ເປັນ​ຮູບ​ປະ​ທຳ​ໂດດ​ເດັ່ນ ແລະ ສືບ­ຕໍ່​ໄປ​ຊົ່ວ​ກາ­ລະ​ນານ.

ຂ່າວທີ່ກ່ຽວຂ້ອງ