ລາວ ຢູ່ກຸ່ມ A ໃນບານເຕະຍິງ ຊີງແຊັມອາຊີ 2019

    ທັບ​ນັກ​ເຕະ­ບານ​ຍິງ​ທີມ​ຊາດ​ລາວ ຮຸ່ນ​ເຍົາ­ວະ​ຊົນ ອາ­ຍຸ​ບໍ່​ເກີນ 16 ປີ (ຢູ-16) ຕ້ອງ​ພົບ​ກັບ​ວຽກ​ໜັກ ຫຼັງ​ຈັບ​ສະ­ຫຼາກ​ໄປ​ຢູ່​ກຸ່ມ A ຮ່ວມ​ກັບ​ທີມ​ຊາດ​ອົດ​ສະ​ຕຣາ​ລີ ທີມ​ຊາດ​ຫວຽດ­ນາມ ແລະ ທີມ​ຊາດ​ອີ​ຣານ ການ​ແຂ່ງ­ຂັນ​ບານ­ເຕະ​ຍິງ ຮຸ່ນ​ອາ­ຍຸ​ບໍ່​ເກີນ 16 ປີ ຊີງ​ແຊັມ​ອາ­ຊີ 2019 ຮອບ​ຄັດ​ເລືອກ ຮອບ​ທີ 2 ຫຼື “AFC U-16 WOMEN`S CHAMPIONSHIP 2019 QUALIFIERS” ພ້ອມ​ນັ້ນ ສປປ ລາວ ເຮົາ ຍັງ​ໄດ້​ຮັບ​ກຽດ​ເປັນ​ເຈົ້າ­ພາບ​ຈັດ­ການ​ແຂ່ງ­ຂັນ​ຮອບ​ແບ່ງ​ກຸ່ມ ກຸ່ມ A ອີກ​ດ້ວຍ.

    ອີງ​ຕາມ​ຜົນ​ການ​ຈັບ​ສະ­ຫຼາກ​ແບ່ງ​ກຸ່ມ​ການ​ແຂ່ງ­ຂັນ​ເຕະ­ບານ​ຍິງ ຮຸ່ນ​ອາ­ຍຸ​ບໍ່​ເກີນ 16 ປີ ຊີງ​ແຊັມ​ອາ­ຊີ 2019 ຮອບ​ຄັດ​ເລືອກ​ຮອບ​ທີ 2 ຂອງ​ສະ­ຫະ­ພັນ​ກີ­ລາ​ບານ­ເຕະ​ອາ­ຊີ (AFC) ໃຫ້​ຊາບ​ວ່າ: ການ​ແຂ່ງ­ຂັນ​ບານ­ເຕະ​ຍິງ ຮຸ່ນ​ອາ­ຍຸ​ບໍ່​ເກີນ 16 ປີ ຊີງ​ແຊັມ​ອາ­ຊີ 2019 ຮອບ​ຄັດ​ເລືອກ ຮອບ​ທີ 2 ຫຼື ຮອບ 8 ທີມ​ສຸດ​ທ້າຍ ທີ່​ຫາ­ກໍ່​ແຂ່ງ­ຂັນ​ກັນ​ຈົບ​ໃນ​ທ້າຍ​ເດືອນ​ກັນ­ຍາ 2018 ຜ່ານ​ມາ ໄດ້​ມີ​ການ​ຈັບ​ສະ­ຫຼາກ​ແບ່ງ​ກຸ່ມ​ປັນ​ທີ່​ຮຽບ​ຮ້ອຍ​ແລ້ວ ເຊິ່ງ​ໄດ້​ແບ່ງ​ອອກ​ເປັນ 2 ກຸ່ມ ແຂ່ງ­ຂັນ​ໃນ​ລະ­ຫວ່າງ​ວັນ​ທີ 27 ກຸມ­ພາ ຫາ 3 ມີ­ນາ 2019 ແລະ ສປປ ລາວ ກໍ່​ໄດ້​ຖືກ​ເລືອກ​ເປັນ​ເຈົ້າ­ພາບ ໃນ​ຮອບ​ແບ່ງ​ກຸ່ມ A ອີກ​ດ້ວຍ ສ່ວນ​ກຸ່ມ B ມີ ທີມ​ຊາດ ສປ ຈີນ ທີມ​ຊາດ​ບັງ​ກລາ​ເທດ ທີມ​ຊາດ​ຟີ​ລິບ​ປິນ ແລະ ທີມ​ຊາດ​ມຽນ​ມາ ເຈົ້າ­ພາບ.

    ສຳ­ລັບ​ຜົນ­ງານ​ຂອງ​ທີມ​ຊາດ​ລາວ ຮຸ່ນ​ອາ­ຍຸ​ບໍ່​ເກີນ 16 ປີ­ຜ່ານ­ມາ ໃນ​ຮອບ​ຄັດ​ເລືອກ ຮອບ​ທຳ​ອິດ ແມ່ນ​ຈົບ​ອັນ​ດັບ​ທີ 1 ຂອງ​ກຸ່ມ B ມີ 10 ຄະ­ແນນ ປະ­ກອບ​ມີ ໃນ​ວັນ​ທີ 17 ກັນ­ຍາ 2018 ຊະ­ນະ ທີມ​ຊາດ​ປາ​ກິດ​ສະ­ຖານ 3-0 ປະ­ຕູ ວັນ​ທີ 19 ກັນ­ຍາ 2018 ຊະ­ນະ ທີມ​ຊາດ​ມົງ​ໂກ​ລີ 4-0 ປະ­ຕູ ວັນ​ທີ 21 ກັນ­ຍາ 2018 ຊະ­ນະ ຮົງ​ກົງ 3-1 ປະ­ຕູ ແລະ ວັນ​ທີ 23 ກັນ­ຍາ 2018 ສະ­ເໝີ ທີມ​ຊາດ​ອິນ​ເດຍ 1-1 ປະ­ຕູ.