ຂ່າວຫຼ້າສຸດ

ຍ້ອງຍໍຜູ້ທີ່ມີຜົນງານປະກອບສ່ວນໂຄງການກໍ່ສ້າງ ເຂື່ອນໄຟຟ້າເທີນ-ຫີນບູນພາກຂະຫຍາຍ

210 09 ພ.ຈ. 2018 ຂ່າວໜ້າ​ໜຶ່ງ
ຍ້ອງຍໍຜູ້ທີ່ມີຜົນງານປະກອບສ່ວນໂຄງການກໍ່ສ້າງ ເຂື່ອນໄຟຟ້າເທີນ-ຫີນບູນພາກຂະຫຍາຍ

    ພິ­ທີ​ສະ­ຫຼຸບ​ຜົນ­ສຳ­ເລັດ​ຂອງ​ໂຄງ­ການ​ກໍ່­ສ້າງ​ເຂື່ອນ​ໄຟ­ຟ້າ​ເທີນ-ຫີນ​ບູນ​ພາກ​ຂະ­ຫຍາຍ ຈັດ​ຂຶ້ນ​ວັນ​ທີ 8 ພະ­ຈິກ 2018 ຢູ່​ໂຮງ­ແຮມ​ຄຣາວ​ພລາ​ຊາ ໂດຍ​ມີ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ ທ່ານ ໂຣ​ເບີດ ອາ​ເລັນ ອຳ­ນວຍ​ການ​ໃຫຍ່ ບໍ­ລິ­ສັດ ເທີນ-ຫີນ​ບູນ​ພາວ​ເວີ ຈຳ­ກັດ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສຸ​ລິ​ເດດ ເບົ້າ​ມະ­ນີ​ໂຄດ ຮອງ​ອຳ­ນວຍ​ການ​ໃຫຍ່ ບໍ­ລິ­ສັດ ເທີນ-ຫີນ​ບູນ​ພາວ​ເວີ ຈຳ­ກັດ ກ່າວ​ວ່າ: ໂຄງ­ການ​ເທີນ-ຫີນ​ບູນ​ພາກ​ຂະ­ຫຍາຍ​ເປັນ​ໂຄງ­ການ​ທີ່​ສືບ​ເນື່ອງ ຈາກ​ໂຄງ­ການ​ໄຟ­ຟ້າ​ເທີນ-ຫີນ​ບູນ​ທີ່​ມີ​ຢູ່​ແລ້ວ (ເລີ່ມ​ຜະ­ລິດ​ປີ 1998) ເພື່ອ​ເພີ່ມ​ຄວາມ​ສາ­ມາດ​ການ​ຜະ­ລິດ​ກະ­ແສ​ໄຟ­ຟ້າ​ຂຶ້ນ​ຕື່ມ ຕອບ​ສະ­ໜອງ​ກັບ​ຄວາມ​ຕ້ອງ­ການ​ພະ­ລັງ­ງານ​ທີ່​ມີ​ສູງ​ຂຶ້ນ​ໃນ​ປັດ­ຈຸ­ບັນ ໂຄງ­ການ​ດັ່ງ­ກ່າວ ໄດ້​ກໍ່­ສ້າງ​ເຂື່ອນ​ອ່າງ­ເກັບ­ນ້ຳ​ຢູ່​ສາຍ​ນ້ຳ​ຍວງ ຫ່າງ​ຈາກ​ເຂື່ອນ​ເທີນ-ຫີນ​ບູນ​ເກົ່າ 20 ກິ​ໂລ ໂຄງ​ສ້າງ​ເຂື່ອນ​ເປັນ​ເບ​ຕົງ​ອັດ​ແໜ້ນ ມີ​ປະ­ຕູ​ປ່ອຍ​ນ້ຳ​ລົ້ນ​ທາງ​ກາງ​ເຂື່ອນ 5 ປະ­ຕູ ອ່າງ­ເກັບ­ນ້ຳ​ສາ­ມາດ​ບັນ­ຈຸ​ໄດ້ 2.450 ລ້ານ​ແມັດ​ກ້ອນ ລະ­ດັບ​ນ້ຳ​ການ​ຜະ­ລິດ​ກະ­ແສ​ໄຟ­ຟ້າ​ສູງ​ສຸດ 455 ແມັດ ຕ່ຳ​ສຸດ 420 ແມັດ ເໜືອ​ໜ້າ­ນ້ຳ​ທະ­ເລ ໜ້າ​ອ່າງ​ມີ​ເນື້ອ­ທີ່ 107 ກິ​ໂລ​ຕາ​ແມັດ ລະ­ບົບ​ສາຍ​ສົ່ງ 230 kv ຍາວ 87 ກິ​ໂລ ເພື່ອ​ນຳ​ສົ່ງ​ກະ­ແສ​ໄຟ­ຟ້າ​ເຊື່ອມ​ຕໍ່​ສະ­ຖາ­ນີ​ສຳ­ຮອງ​ຢູ່​ເມືອງ​ທ່າ​ແຂກ-ສະ­ຖາ­ນີ​ຮັບ​ໄຟ­ຟ້າ​ປະ­ເທດ​ໄທ ມີ​ລະ­ບົບ​ສາຍ​ສົ່ງ 115 kv ຍາວ 55 ກິ​ໂລ ຈາກ​ເຂື່ອນ​ນ້ຳ​ຍວງ-ສະ­ຖາ­ນີ​ບ້ານ​ຄອນ​ສົງ.

    ໂຄງ­ການ​ເທີນ-ຫີນ​ບູນ​ພາກ​ຂະ­ຫຍາຍ​ມີ​ກຳ­ລັງ​ຕິດ​ຕັ້ງ 500 MW ໃນ​ນີ້​ປະ­ກອບ​ດ້ວຍ 220 MW ທີ່​ມີ​ຢູ່​ແລ້ວ ຕິດ​ເຄື່ອງ​ຈັກ​ໃໝ່ 220 MW ຂະ­ຫຍາຍ​ເພີ່ມ​ຢູ່​ຕິດ​ກັບ​ໂຮງ​ຈັກ​ປັດ­ຈຸ­ບັນ ແລະ 60 MW ຕິດ​ເຄື່ອງ​ຈັກ​ໃໝ່​ຢູ່​ເຂື່ອນ​ນ້ຳ​ຍວງ ສະ­ເລ່ຍ​ຜົນ​ຜະ­ລິດ​ປະ­ຈຳ​ປີ​ເພີ່ມ​ຂຶ້ນ​ເປັນ 3.000 GWh ການ​ກໍ່­ສ້າງ​ໄດ້​ລົງ­ມື​ເດືອນ​ກໍ­ລະ­ກົດ 2008 ຜະ­ລິດ​ໄຟ­ຟ້າ​ຈຳ­ໜ່າຍ​ຕົ້ນ​ເດືອນ​ທັນ­ວາ 2012 ໃນ​ນີ້ ວຽກ​ງານ​ພັດ­ທະ­ນາ​ສັງ­ຄົມ ແລະ ສິ່ງ­ແວ­ດລ້ອມ ໄດ້​ສຳ­ເລັດ​ການ​ຍົກ­ຍ້າຍ​ຈັດ​ສັນ ວຽກ​ງານ​ສະ­ໜອງ​ສະ­ບຽງ​ອາ­ຫານ ກໍ່­ສ້າງ​ພື້ນ­ຖານ​ໂຄງ​ລ່າງ ບ້ານ​ຍົກ­ຍ້າຍ-ຈັດ​ສັນ​ເບື້ອງ​ເໜືອ​ເຂື່ອນ​ນ້ຳ 12 ບ້ານ ຍົກ­ຍ້າຍ​ໄປ 4 ຈຸດ 630 ຄົວ​ເຮືອນ 3.149 ຄົນ ຈັດ​ສັນ​ເຂດ​ລຸ່ມ​ເຮືອນ​ຈັກ 24 ບ້ານ ຍ້າຍ​ໄປ 9 ຈຸດ 1.905 ຄົວ​ເຮືອນ 9.107 ຄົນ ພ້ອມ​ນີ້ ຍັງ​ສຳ­ເລັດ​ການ​ບຸກ­ເບີກ​ເນື້ອ­ທີ່​ການ​ຜະ­ລິດ​ກະ­ສິ­ກຳ 1,5 ເຮັກ­ຕາ ໃຫ້​ແຕ່​ລະ​ຄົວ​ເຮືອນ ແລະ ວຽກ​ອື່ນໆ​ອີກ.

    ທ່ານ ສົມ​ດີ ດວງ​ດີ ໄດ້​ໃຫ້​ກຽດ​ປະ­ດັບ​ຫຼຽນ​ໄຊ​ແຮງ​ງານ​ຊັ້ນ 2 ຈຳ­ນວນ 10 ທ່ານ 2 ກົມ​ກອງ ຫຼຽນ​ໄຊ​ແຮງ​ງານ​ຊັ້ນ 3 ຈຳ­ນວນ 21 ທ່ານ 3 ກົມ​ກອງ ປະ­ດັບ​ຫຼຽນ​ກາ​ແຮງ​ງານ 49 ທ່ານ 1 ກົມ​ກອງ ໃບ​ຍ້ອງ­ຍໍ​ລັດ­ຖະ­ບານ 70 ທ່ານ 2 ກົມ​ກອງ ທີ່​ມີ​ຜົນ­ງານ​ດີ­ເດັ່ນ​ປະ­ກອບ­ສ່ວນ​ໃນ​ໂຄງ­ການ​ກໍ່­ສ້າງ​ເຂື່ອນ​ໄຟ­ຟ້າ​ເທີນ-ຫີນ​ບູນ​ພາກ​ຂະ­ຫຍາຍ ໄດ້​ຮັບ​ຜົນ­ສຳ­ເລັດ​ເປັນ​ຢ່າງ​ດີ ເຊິ່ງ​ປະ­ກອບ­ສ່ວນ​ສຳ­ຄັນ ໃນ​ການ​ພັດ­ທະ­ນາ​ປະ­ເທດ​ຊາດ ນອກ​ນີ້ ທ່ານ ຄຳ​ມະ­ນີ ອິນ​ທິ​ລາດ ໃຫ້​ກຽດ​ມອບ​ໃບ​ຍ້ອງ­ຍໍ​ຂັ້ນ​ກະ­ຊວງ​ພະ­ລັງ­ງານ ແລະ ບໍ່​ແຮ່​ໃຫ້​ບຸກ­ຄົນ​ທີ່​ມີ​ຜົນ­ງານ​ດີ­ເດັ່ນ ໃນ​ການ​ປະ­ຕິ­ບັດ​ໜ້າ­ທີ່​ວຽກ​ງານ​ດັ່ງ­ກ່າວ 140 ທ່ານ.

ຂ່າວທີ່ກ່ຽວຂ້ອງ