ຂ່າວຫຼ້າສຸດ

ລາວ-ຕວັກກີ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື

185 09 ພ.ຈ. 2018 ຂ່າວໜ້າ​ໜຶ່ງ
ລາວ-ຕວັກກີ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື

    ໂດຍ​ຕອບ​ສະ­ໜອງ​ຕາມ​ການ​ເຊີນ​ຂອງ​ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ທ່ານ Mevlut Cavusoglu ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ສ ຕວັກ​ກີ ພ້ອມ​ຄະ­ນະ ໄດ້​ເດີນ­ທາງ​ມາ​ຢ້ຽມ­ຢາມ ສປປ ລາວ ເປັນ​ທາງ​ການ ໃນ​ວັນ​ທີ 7-8 ພະ­ຈິກ ເພື່ອ​ເສີມ​ຂະ­ຫຍາຍ​ສາຍ​ພົວ­ພັນ​ມິດ​ຕິດ​ຕະ​ພາບ ແລະ ການ​ຮ່ວມ​ມື​ອັນ​ດີ ລະ­ຫວ່າງ ສປປ ລາວ-ສ ຕວັກ​ກີ ໂດຍ​ພິ­ທີ​ພົບ​ປະ​ສອງ​ຝ່າຍ ຈັດ​ຂຶ້ນ​ວັນ​ທີ 8 ພະ­ຈິກ 2018 ຢູ່​ກະ­ຊວງ​ການ​ຕ່າງ­ປະ­ເທດ ເຊິ່ງ​ຝ່າຍ​ລາວ​ນຳ​ໂດຍ​ທ່ານ ສະ­ເຫຼີມ​ໄຊ ກົມ​ມະ​ສິດ ຝ່າຍ​ຕວັກ​ກີ​ນຳ​ໂດຍ ທ່ານ Mevlut Cavusoglu.

    ການ​ພົບ​ປະ​ຄັ້ງ​ນີ້ ສອງ​ຝ່າຍ​ໄດ້​ຕີ​ລາ­ຄາ​ສູງ​ຕໍ່​ການ​ພົວ­ພັນ​ຮ່ວມ​ມື ແລະ ການ​ສະ­ໜັບ­ສະ­ໜູນ​ຊ່ວຍ­ເຫຼືອ​ເຊິ່ງ​ກັນ ແລະ ກັນ ໃນ​ໄລ­ຍະ​ຜ່ານ​ມາ ເຊິ່ງ​ນັບ​ແຕ່ ສປປ ລາວ ແລະ ສ ຕວັກ​ກີ ໄດ້​ສ້າງ​ສາຍ​ພົວ­ພັນ​ທາງ​ການ​ທູດ​ນຳ​ກັນ ວັນ​ທີ 26 ມິ­ຖຸ­ນາ 1958 ສອງ​ປະ­ເທດ ກໍ່​ໄດ້​ມີ​ການ​ພົວ­ພັນ​ທີ່​ດີ​ນຳ​ກັນ​ຕະ­ຫຼອດ​ມາ ເຊິ່ງ​ເຫັນ​ໄດ້​ຈາກ​ການ​ແລກ­ປ່ຽນ​ການ​ສະ­ໜັບ­ສະ­ໜູນ​ເຊິ່ງ​ກັນ ແລະ ກັນ​ໃນ​ເວ­ທີ​ສາ­ກົນ ການ​ແລກ­ປ່ຽນ​ການ​ຢ້ຽມ­ຢາມ​ລະ­ຫວ່າງ​ຄະ­ນະ​ຜູ້​ແທນ​ຂອງ​ສອງ​ປະ­ເທດ.

    ພ້ອມ​ນີ້ ສອງ​ຝ່າຍ​ຍັງ​ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ການ​ສ້າງ­ຕັ້ງ​ສາຍ​ພົວ­ພັນ​ການ​ທູດ ລາວ-ຕວັກ​ກີ ຄົບ­ຮອບ 60 ປີ ພ້ອມ​ທັງ​ໄດ້​ມີ​ການ​ເປີດ​ສະ­ຖານ​ເອກ​ອັກ​ຄະ​ລັດ​ຖະ​ທູດ ສ ຕວັກ​ກີ ປະ­ຈຳ ສປປ ລາວ ເປັນ​ທາງ​ການ ໃນ​ວັນ​ທີ 7 ພະ­ຈິກ 2018 ເພື່ອ​ເປັນ​ນິ­ມິດ​ໝາຍ​ອັນ​ສຳ­ຄັນ ໃຫ້​ແກ່​ການ​ຊຸກ­ຍູ້​ການ​ພົວ­ພັນ​ຮ່ວມ​ມື​ຂອງ​ສອງ​ປະ­ເທດ ໃຫ້​ກ້າວ​ຂຶ້ນ​ສູ່​ລະ­ດັບ​ໃໝ່ ນອກ​ນີ້ ສອງ​ຝ່າຍ​ຍັງ​ໄດ້​ປຶກ­ສາ​ຫາ­ລື​ກ່ຽວ​ກັບ​ການ​ເສີມ​ຂະ­ຫຍາຍ ສາຍ​ພົວ­ພັນ​ຮ່ວມ​ມື​ສອງ​ຝ່າຍ ແລະ ຫຼາຍ​ຝ່າຍ​ໃນ­ຕໍ່­ໜ້າ ທັງ​ໄດ້​ແລກ­ປ່ຽນ​ຄຳ​ຄິດ​ຄຳ​ເຫັນ​ຕໍ່​ບັນ­ຫາ​ທີ່​ພົ້ນ​ເດັ່ນ​ໃນ​ພາກ​ພື້ນ ແລະ ສາ­ກົນ ພາຍ­ຫຼັງ​ສຳ­ເລັດ​ການ​ພົບ​ປະ​ສອງ​ຝ່າຍ ທັງ​ສອງ​ລັດ­ຖະ­ມົນ­ຕີ ກໍ່​ໄດ້​ລົງ​ນາມ​ສັນ­ຍາ​ວ່າ​ດ້ວຍ​ການ​ຍົກ­ເວັ້ນ​ວີ​ຊາ ສຳ­ລັບ​ຜູ້​ຖື​ໜັງ­ສື­ຜ່ານ­ແດນ​ການ​ທູດ ລະ­ຫວ່າງ​ລັດ­ຖະ­ບານ ສປປ ລາວ ແລະ ລັດ­ຖະ­ບານ ສ ຕວັກ​ກີ ຕື່ມ​ອີກ.

ຂ່າວທີ່ກ່ຽວຂ້ອງ